საბერძნეთში ქართველები დააკავეს, რომლებიც სულ ცოტა, 24 ჯგუფურ ძარცვაში არიან ბრალდებულები - რას წერს ბერძნული მედია

ბერძნულ გამოცემაში iefimerida.gr გამოქვეყნდა ინფორმაცია, ქართველების ჯგუფის დაკავების თაობაზე, რომლებიც ქვეყნის სხვადასხვა რაიონში მრავალჯერად ძარცვაში არიან ეჭვმიტანილები. მედიაში ასევე გამოაქვეყნდა მათი ფოტოები.

"ესენი არიან ქართველი სამართალდამრღვევები, რომლებმაც მინიმუმ 24 ძარცვა ჩაიდინეს. ქართველების დაპატიმრებები მოხდა 4 დეკემბერს. საბერძნეთის პოლიციის ცნობით, რომელმაც ფოტოები გამოაქვეყნა, დაჯგუფებამ ჩაიდინა მინიმუმ 24 ქურდობა კიფსელში, ეგზარქიაში, ვირონასში, ნეა სმირნში, ნეოს კოსმოსში, დაფნიში, გალაციში, ალიმოსში, პალეო ფალიროში, კალითეაში, ზოგრაფუ ამპელოკიპოში, ილიონში, კიფისიაში და სხვა უბნებში", - წერს გამოცემა.

აღნიშნულს გამოეხმაურა "ქართული დიასპორის საზოგადოებრივი ცენტრის წარმომადგენელი".

"საბერძნეთის პოლიცია საქართველოს მოქალაქეების დაკავების შესახებ იტყობინება და კვლავ ყოველგვარი პერსონალური მონაცემების დაფარვის გარეშე აქვეყნებს ინფორმაციას", - წერს ავთანდილ გიუნაშვილი.

ის AMBEBI.GE -თან ამბობს, რომ პერსონალური მონაცემების უკონტროლოდ გავრცელება, აქამდეც არაერთხელ მომხდარა. არის შემთხვევები, როდესაც წარდგენილი ბრალდება ქართველ ემიგრანტს არ უმტკიცდება, შელახული იმიჯი კი ქვეყნებს შორისაც აფუჭებს ურთიერთობას და დაზარალებულზეც საკმაოდ მძიმედ მოქმედებს.

"ამ საკითხზე არაერთხელ გამოვთქვი მოსაზრება. აუცილებლად უნდა მოხდეს პერსონალური მონაცემების დაფარვა, ეს შეეხება ეროვნულ მახასიათებელსაც. აღნიშნული ფაქტი ყველა რეიტინგულ ბერძნულ პრესაში გამოქვეყნდა, რაც ქმნის განწყობას, რომ თითქოს ყველა ქართველი ამით არის დაკავებული. ეს აფერხებს ქვეყნებს შორის მეგობრობის განვითარებას. ასეთი დამოკიდებულება უამრავი ადამიანის იმიჯს ლახავს, რომლებიც საბერძნეთში სამუშაოდ არიან ჩამოსულნი და არავითარი დანაშაული არ ჩაუდენიათ.

მაგალითად ქალი, რომელიც ფოტოზეა აღბეჭდილი, სხვა პირებს საერთოდ არ იცნობდა. რა კრიმინალურ დაჯგუფებაზეა ლაპარაკი, როდესაც შეიძლება ბრალი ვერც დაუმტკიცონ. სასამართლოს არ აქვს დამტკიცებული, რომ მათ ეს დანაშაული ჩაიდინეს. როდესაც პირდაპირ აცხადებენ, რომ ქართულმა დაჯგუფებამ ჩაიდინა დანაშაული, ეს არასწორია. ასეთი რაღაც არც ერთ ქვეყანაში არ ხდება. ერთია, რომ ბრალი წარედგინათ და მეორე როდესაც ბრალი არ არის დამტკიცებული. შეიძლება ეს ადამიანები გაამართლონ, მერე არავინ აღარ დაწერს, რომ ქართველები არაფერ შუაში იყვნენ", - აცხადებს ავთანდილ გიუნაშვილი.

ავტორი: თეონა რამაზაშვილი