ოპოზიციის ბოიკოტი არჩევნებს - საუბნო საარჩევნო კომისიები არასრული შემადგენლობით მუშაობენ

საპარლამენტო არჩევნების მეორე ტურზე საუბნო საარჩევნო კომისიები 12-კაციანი შემადგენლობით არ მუშაობენ. მიზეზი ის გარემოებაა, რომ „ნაციონალურ მოძრაობას" და "ევროპულ საქართველოს" არჩევნების მეორე ტურზე, უბნებზე კომისიის წევრები აღარ ჰყავთ.

როგორც ცესკოს სპიკერმა ნათია იოსელიანმა გუშინდელ ბრიფინგზე განაცხადა, „ნაციონალურ მოძრაობას" ასევე არ ჰყავს უბნებზე სუბიექტების წარმომადგენლები და საოლქო საარჩევნო კომისიებიდან გაწვეული ჰყავთ კომისიის წევრები.

იოსელიანის თქმით, უბნებზე რჩება, "ქართული ოცნების" და "პატრიოტთა ალიანსის" წარმომადგენლები და ასევე ოლქის მიერ არჩეული წევრები.

ამასთან, იოსელიანის განმარტებით, წევრების და წარმომადგენლების გაწვევის მოთხოვნით აღნიშნულმა პარტიებმა ცესკოს უკვე მიმართეს. მისივე თქმით, ასევე ფორმალურად კანდიდატი გაიწვია "ლეიბრისტულმა პარტიამაც".

"ნაციონალურმა მოძრაობამ" და "ლეიბორისტულმა პარტიამ" მოგვმართა წერილობით, რომ მათი მაჟორიტარობის კანდიდატები მოგვეხსნა არჩევნებიდან, თუმცა, საარჩევნო კანონმდებლობის შესაბამისად მათი კანდიდატები რჩებიან საარჩევნო ბიულეტენზე. იცით, რომ საარჩევნო კომისიები 12-კაციანი შემადგენლობით მუშაობენ, ახლა კი იქნება 10-კაციანი შემადგენლობები. თუმცა, ეს არ შეუშლის ხელს საარჩევნო პროცესს და ჩვეულებრივი წესით წარიმართება პროცედურა. რაც შეეხება შემაჯამებელ ოქმზე ხელმოწერას, საუბნო საარჩევნო კომისიის მაჟორიტარულ ოქმზე ხელს მოაწერენ ის წევრები, ვინც ადგილზე იქნებიან. ეს არჩევნების პროცესზე არანაირ გავლენას არ მოახდენს. იცით, რომ თუ 7 კაცზე ნაკლები იქნება კომისიაში, ამ შემთხვევაში სპეცუბნის სტატუსი მიეცემა ამ საუბნო საარჩევნო კომისიას, მივა შეტყობინება საოლქო საარჩევნო კომისიაში და საოლქო საარჩევნო კომისია უზრუნველყოფს წევრების მივლინებას უბნებზე. საუბნო საარჩევნო კომისიას 7-კაციანი შემადგენლობითაც შეუძლია გააგრძელოს მუშაობა. ეს კანონით დაცული ნორმაა და არანაირი გამონაკლისი არ არსებობს“,- განაცხადა იოსელიანმა გუშინ გამართულ ბრიფინგზე.