"მშობლებმა უნდა იცოდნენ, რომ ეს არის ბავშვის ღირსების შელახვა" - რას ამბობენ უფლებადამცველები ბავშვების პოლიტიკურ კამპანიებში მონაწილეობაზე

სოციალურ ქსელში გავრცელებულ კლიპს, რომელიც საარჩევნო კამპანიაში მცირეწლოვანთა მონაწილეობას ასახავს, ბავშვთა უფლებადამცველი ორგანიზაციების მწვავე კრიტიკა მოჰყვა. მმართველი გუნდის მაჟორიტარი კანდიდატების, ცოტნე ანანიძისა და ზაალ მიქელაძის მხარდასაჭერი კლიპი "ფეისბუქში" გუშინ გავრცელდა. ვიდეორგოლში მოზარდებს "ქართული ოცნების" მაისურები აცვიათ და მმართველი გუნდის მხარდამჭერი პლაკატები უჭირავთ.

მმართველი გუნდის წევრებმა კატეგორიულად უარყვეს მათი კავშირი აღნიშნულ ვიდეორგოლთან. მაჟორიტარმა კანდიდატებმა მედიასთან განაცხადეს, რომ კლიპი რამდენიმე აქტივისტი მშობლის ინიციატივა იყო და მათ ამის შესახებ ინფორმაცია არ ჰქონიათ.

ეს კონკრეტული ფაქტი შესაძლოა მართლაც არ იყო პოლიტიკოსების შეკვეთა, თუმცა ქართული პოლიტიკისთვის საარჩვენო კამპანიაში ბავშების მონაწილეობის შემთხვევები უცხო არ არის.

ბოლო პერიოდში არჩევნების მონაწილე პარტიების საარჩევნო კამპანიას თუ გადავხედავთ, შევამჩნევთ, რომ სარეკლამო პოსტერები, ვიდეორგოლები, ამომრჩეველთა შეხვედრების ამსახველი ფოტოალბომები, სავსეა ბავშვებთან ჩახუტებული პოლიტიკოსების ფოტოებით.

პოლიტიკაში ბავშვების, როგორც მომავლისა და გულწრფელობის სიმბოლოს, გამოყენება დამკვიდრებული პრაქტიკაა არერთი სხვა ქვეყნისთვისაც. თუ ისტორიას გადავხედავთ, ამ ხერხს აქტიურად მიმართავდნენ ტოტალიტარული სახელმწიფოებიც. საარქივო მასალებში მრავლად მოიპოვება ლენინის, სტალინისა და ჰიტლერის ფოტოები ბავშვების გარემოცვაში.

"პარტნიორობა ადამიანის უფლებებისთვის" იურისტი ანა არგანაშვილი ამბობს, რომ თანამედროვე დემოკრატიულ სამყაროში, სადაც ბავშვთა უფლებების შესახებ ცნობიერება გაცილებით მაღალია, მოზარდების, როგორც უსულო საგნების გამოყენება საკუთარი ინტერესებისთვის, მიუღებელია.

"ეს კონკრეტული კლიპი არის კლასიკური მაგალითი იმისა, თუ როგორ გამოიყენეს ბავშვები, როგორც უსულო ობიექტები, რადგან მათ მიერ გახმოვანებული მესიჯები არ იყო მათი აზრი. უფროსებმა იმოქმედეს მარკეტინგული სტრატეგიებით ბავშვების მონაწილეობით, რაც არის ბავშვების ბოროტად გამოყენება. პასუხისმგებლობა ამ შემთხვევაში არის მშობელზე, რატომ მისცა ამის უფლება ვინმეს, რომ მისი შვილი ყოფილიყო ჩართული ამ კამპანიაში. შესაძლოა მათ არ აქვთ ინფორმირებულობის შესაბამისი დონე. თუ ეს ასეა, სახელმწიფოს ვალდებულებაა, რომ აუხსნას მშობელს, რატომ არის ეს საზიანო. მაგრამ აქ ჩვენ ვხედავთ სახელმწიფოს მხრიდან პასიურ რეაგირებას. რაც ბავშვთა უფლებების სფეროში არაკომპეტენტურობას მოწმობს. ამას ადასტურებს ისიც, რომ ჩვენ ვერ ვნახეთ რამე სახის რეაგიერება ამ კონკრეტულ შემთხვევაზე. თუნდაც ცეესკოსგან ველოდით რაიმე სახის რეაქციას, კომენტარის დონეზე მაინც" , - აცხადებს ambebi.ge -სთან ანა არგანაშვილი.

უფლებადამცველი გვიხსნის, რომ კონკრეტულად ბავშების საარჩევნო კამპანიაში ჩართვის საკითხზე საკანონმდებლო ნორმა არ არსებობს, თუმცა ზოგადად მოქმედი რეგულაციები მსგავს შემთხვევებსაც მოიცავენ.

"ჩვენ გვაქვს, როგორც საერთაშორისო, ისე ქვეყნის შიგნით კანონმდებლობა, რომელიც ამბობს, რომ ყველა გადაწყვეტილება უნდა იყოს მიღებული ბავშვთა ინტერესის გათვალისწინებით. ასეთ შემთხვევებში აშკარად ირღვევა ეს ნორმა. თუმცა ვინ უნდა მოითხოვოს ბავშვის უფლებების დაცვა?! გამოდის, რომ მშობლის წინააღმდეგ უნდა იდაონ სასამართლოში. ჩვენ, არასამთავრობო ორგანიზაციებს, არ გვაქვს უფლება, რომ მშობლის სურვილის გარეშე გავასაჩივროთ პოლიტიკოსების ქმედება და მოვითხოვოთ ამ პრაქტიკის აღკვეთა. ევროპისა და ამერიკის რიგ ქვეყნებში უფლებადამცველ ორგანიზაციებს შეუძლიათ საკუთარი ინიციატივით შეიტანონ სარჩელი სასამართლოში და ბავშვის კანონიერი წარმომადგენლის თანხმობა ამას არ სჭირდება", - გვეუბნება ანა არგანაშვილი.

• რატომ არის საზიანო ბავშების პოლიტიკურ კამპანიებში ჩართვა?

"გაეროს ბავშვთა ფონდის" კომუნიკაციის პროგრამის მენეჯერი მაია ქურციკიძე მიიჩნევს, რომ ბავშვის უფლებაა იყოს ისეთ საკითხებზე ინფორმირებული, რომელიც მას ეხება.

"დაუშველია ბავშვების მანიპულაციის ობიექტებად გამოყენება. მათი ისეთ ღონიძიებებში ჩართვა, სადაც მათი მონაწილეობა იქნება მინიმალური, სადაც ბავშვებს არ შეეძლებათ აქტიურად იყვნენ ჩართულნი და გამოხატონ თავიანთი აზრი. ეს შეეხება არა მხოლოდ წინასაარჩევნო პერიოდის აქტივობებს, არამედ ნებისმიერ სხვა ღონისძიებებს, სადაც შესაძლოა ბავშვები რაიმე მანიპულაციის ობიექტად იქცნენ", - ამბობს მაია ქურციკიძე.

"მშობლებმა უნდა იცოდნენ, რომ პირველი - ეს არის ბავშვის ღირსების შელახვა, რადგან მას ვეპყრობით როგორც ობიექტს და არა, როგორც - პიროვნებას. მეორე, ეს არის ბავშვის პერსონალური ინფორმაციის დარღვევა და მასზე სტიგმის მიყენება. შესაძლოა, ეს ბავშვები ძალიან მარტივად გახდნენ ბულინგის მსხვერპლები მომავალში. ძალიან კარგი მაგალითები არსებობს დასავლურ ქვეყნებში. როდესაც ბავშვებმა სამართლებრივად გააპროტესტეს მათი გამოჩენა მედიაში მას შემდეგ, რაც ისინი გაიზარდნენ და საკუთარი ხედვა ჩამოუყალიბდათ. " - განმარტავს ambebi.ge -სთან ანა არგანაშვილი.