მთავრობა განმარტავს, ვისთვის იქნება დასაშვები 27 და 28 აპრილს თბილისში, რუსთავში, ბათუმში და ქუთაისში შესვლა-გასვლა

4 დიდ ქალაქში - თბილისში, ქუთაისში, რუსთავსა და ბათუმში შესვლა-გამოსვლაზე დაწესებული შეზღუდვა საგანგებო მდგომარეობის ვადით, 22 მაისამდე გაგრძელდება.

თუმცა როგორც ანტიკრიზისული გეგმის წარდგენისას პრემიერმა განაცხადა, მხოლოდ ორი დღე დაუშვებენ გამონაკლისს, რომ აღნიშნულ ქალაქებში მოქალაქეებმა რეგისტრაციისა და სამუშაო ადგილებზე დაბრუნება შეძლონ.

როგორც მთავრობაში განმარტავენ, ოთხ დიდ ქალაქში შესვლა-გასვლა დასაშვები მხოლოდ გარკვეული პირებისთვის იქნება

"როგორ ცნობილია, 15 აპრილის 21:00 საათიდან აიკრძალა თბილისში, რუსთავში, ბათუმში და ქუთაისში შესვლა და ამ ქალაქებიდან გასვლა.

27 და 28 აპრილს, საგამონაკლისო წესით, დასაშვებია ზემოაღნიშნულ ქალაქებში შესვლა და ამ ქალაქებიდან გასვლა მხოლოდ იმ პირებისთვის, რომლებიც გადაადგილდებიან ფაქტობრივ საცხოვრებელ მისამართზე დაბრუნების მიზნით.

ამ ქალაქებში შესვლა და გასვლა, რეგისტრირებულ მისამართზე დაბრუნების მიზნით, შესაძლებელია ნებისმიერ დროს. სხვა მიზნებით ამ ქალაქებში შესვლა და გასვლა კვლავ აკრძალულია. კომენდანტის საათის მოქმედება რჩება ძალაში", - აღნიშნულია მთავრობის ადმინისტრაციის მიერ გავრცელებულ ინფორმაციაში.

• იხილეთ დეტალურად რას გულისხმობს მთავრობის ანტიკრიზისული გეგმა