28
აპრილიდღის ზოგადი ასტროლოგიური პროგნოზი
"ქართული ოცნების" წევრის აკაკი ზოიძის თქმით, შრომის უსაფრთხოების ნორმების დარღვევისთვის სანქციები, ალბათ, გამკაცრდება, თუმცა სწრაფ ეკონომიკურ ზრდასა და მოქალაქეების უსაფრთხოებასა და სიცოცხლეს შორის ბალანსი დაცული უნდა იყოს.
როგორც ზოიძემ ჟურნალისტებს განუცხადა, მისი გაუქმების დროისთვის შრომის ინსპექცია მართლაც კორუფციის წყარო იყო და რეალური ფუნქცია არ გააჩნდა, თუმცა უნდა მომხდარიყო სისტემის რეორგანიზაცია.
"მხოლოდ 75 ადამიანი იყო მთელ საქართველოში ამ ინსპექციაში და ისინი მცირე მოსაკრებლის, არაოფიციალურად ქრთამის მიღების მეტს არაფერს აკეთებდნენ. ნაცვლად იმისა, რომ მომხდარიყო ამ სისტემის რეორგანიზაცია და მისი რეალურ, მობილურ, ეფექტიან ერთეულად ჩამოყალიბება, მოხდა უბრალოდ პრობლემის მოცილება. ასევე, განხორციელდა ძალიან მნიშვნელოვანი ცვლილებები კანონმდებლობაში, გაუქმდა იმ დროს არსებული შრომის უსაფრთხოების ნორმები, კოდექსი და კარგად იცით, მთელი ამ წლების განმავლობაში შრომის უსაფრთხოების ნორმები და მოთხოვნები არ იყო რეალურად მიწოდებული. ეს გაუქმდა იმის გამო, რომ მომხდარიყო მაქსიმალური დერეგულირება და ბიზნესს შეწყობოდა ხელი, რაშიც არსებობს გარკვეული ლოგიკა და ეს ლოგიკა დღესაც უნდა გავითვალისწინოთ, რადგან ჩვენ არ შეგვიძლია ზედმეტი რეგულაციებით დავახრჩოთ ბიზნესი. ზედმეტი რეგულაციები აძვირებს მათთვის წარმოებას, რაც ამცირებს სამუშაო ადგილებს და ასევე, ამცირებს ეკონომიკურ ზრდას. ამიტომ ძალიან ფრთხილად უნდა ვიყოთ მომავალშიც. რა თქმა უნდა, აუცილებელია თანამედროვე შრომის უსაფრთოების ნორმების მიღება, რომელიც ევროკავშირთან ინტეგრაციის პროცესის ასევე სავალდებულო ნაწილია. მაგრამ ჩვენ ეს ნორმები უნდა მივიღოთ მაქიმალურად მიახლოებულად ჩვენს დღევანდელ რეალობასთან, რომ ერთი მხრივ, არ მოვახდინოთ ბიზნესის მობილურობის, სამუშაო ძალის მობილურობის და წარმოების გაძვირება და ზედმეტ ტვირთად არ დააწვეს ეს ბიზნესს და მეორე მხრივ, დავიცვათ ჩვენი მოქალაქეების ინტერესები", - განაცხადა აკაკი ზოიძემ.
მისივე თქმით, წელიწადში საშუალოდ 25 ადამიანი იღუპება შრომის უსაფრთხოების ნორმების დარღვევის გამო, რაც მიუღებელია. ამასთან, ზოიძემ სამძიმარი გამოუცხადა მშენებარე კორპუსიდან ჩამოვარდნის შედეგად გარდაცვლილი 26 წლის მუშის, თემურ გურგენაშვილის ოჯახს.
"აქ უნდა გავითვალისწინოთ, რომ მხოლოდ საკანონმდებლო ნორმები და შრომის ინსპექციაზე კი არა, საუბარი უნდა იყოს უფრო მოქნილ მეთოდებზე, რომელიც ეხება დაზღვევას, ისეთი წარმოების დაზღვევას, რომელიც შედარებით სახიფათოა ჯანმრთელობისთვის და სხვა მექანიზმებს, რომლებიც შედარებით უფრო საბაზრო მეთოდით შეგვაძლებინებს იმას, რომ დავიცვათ ჩვენი მოქალაქეების ასეთი ტიპის ტრაგედიებისგან, როგორიც მოხდა 26 წლის ადამიანის დაღუპვის შემთხვევაში. იმედია, რომ მომავალში თავიდან ავიცილებთ ასეთ ტრაგედიებს. როგორც კი პარლამენტი დაიწყებს მუშაობას, ვიმუშავებთ ამ მიმართულებით, რომ, ერთი მხრივ, არ შევაფერხოთ ეკონომიკური წინსვლა, მაგრამ მეორე მხრივ, ასევე ავიცილოთ თავიდან ტრაგედიები, რომლებზეც ახლა ვისაუბრეთ", - განაცხადა აკაკი ზოიძემ.
