23
აპრილიდღის ზოგადი ასტროლოგიური პროგნოზი
საქართველოს პრემიერ-მინისტრ ირაკლი ღარიბაშვილის დავალებით, საავტომობილო გზებზე დიდთოვლობის გამო შექმნილი შეფერხებების აღმოსაფხვრელად მთავრობის ყველა შესაბამისი უწყება მუშაობის საგანგებო რეჟიმზე გადავიდა.
როგორც მთავრობის პრესსამსახურის მიერ გავრცელებულ ინფორმაციაშია აღნიშნული, სტიქიის ყველა ზონაში მობილიზებულია საავტომობილო გზების დეპარტამენტის ტექნიკა. ამ დროისთვის გზის გაწმენდითი სამუშაოები მიმდინარეობს გუდამაყარში, უკანა ფშავთან დამაკავშირებელ გზაზე, დღის ბოლომდე გაიწმინდება სოფელ ჩოხამდე მისასვლელი გზა.
ამ ეტაპზე სრულად გაწმენდილია ჟინვალი-ბარისახოს დამაკავშირებელი 25-კმ-იანი გზის მონაკვეთი და ფშავის შიდა სასოფლო გზები, სადაც მობილიზებულია შესაბამისი მუნიციპალური ტექნიკა. დიდთოვლობის გამო შეწყვეტილი ელექტრომომარაგება უკვე აღუდგა სოფელ ანანურსა და დაბა ფასანაურს.
თოვლის საფარი 2 მეტრს გაუტოლდა გუდაურში, სადაც შინაგან საქმეთა სამინისტრომ საკვები პროდუქტები უკვე გაგზავნა. ზვავსაშიშროების მიუხედავად, აუცილებლობის შემთხვევაში, გუდაურში საკვებ პროდუქტებს სპეცტექნიკის გამოყენებით შეიტანენ საქართველოს რეგიონული განვითარებისა და ინფრასტრუქტურის სამინისტრო და საქართველოს საავტომობილო გზების დეპარტამენტი.
ზვავი ჩამოწვა ნაღვარევსა და მლეთაში, სადაც თოვლის საფარმა 1.7 მეტრს მიაღწია. გზის გასაწმენდად ყველა სოფელში მობილიზებულია შესაბამისი სამსახურები და მუნიციპალური ტექნიკა, თუმცა ზოგიერთ მონაკვეთზე სამუშაოებს უამინდობა აფერხებს.
ნინოწმინდის მუნიციპალიტეტში გზაზე ჩარჩენილი ავტომობილებისა და მოქალაქეების გამოსაყვანად, შესაბამისი სამსახურები მთელი ღამის განმავლობაში მუშაობდნენ, რის შედეგადაც, ქარბუქიდან 200 ადამიანის, მათ შორის მცირეწლოვანი ბავშვებისა და მოხუცების გამოყვანა მოხერხდა.
უამინდობის გამო საავტომობილო გზის რამდენიმე მონაკვეთზე შეზღუდვები რჩება. ამ დროისთვის, დიდთოვლობისა და ქარბუქის გამო, მოძრაობა შეზღუდულია ნინოწმინდის მუნიციპალიტეტში. გარემოს ეროვნული სააგენტოს ინფორმაციით, ზვავსაშიშროებაა მოსალოდნელი მცხეთა-სტეფანწმინდა-ლარსის საავტომობილო გზის ფასანაური-მლეთა-გუდაური-კობისა და სტეფანწმინდა-ლარსის მონაკვეთზე (დარიალის ხეობა), რის გამოც, აქ ყველა სახის ავტოტრანსპორტის მოძრაობა აკრძალულია.
რთული მეტეოროლოგიური პირობებისა და ინტენსიური თოვის გამო, შეზღუდვები საავტომობილო გზების სხვა მონაკვეთებზეც დაწესდა. კერძოდ, ახალციხე-ნინონწმინდის (სომხეთის საზღვარი) საავტომობილო გზის კმ90-კმ112 (ნინოწმინდა-სომხეთის საზღვარი) მონაკვეთზე. შეზღუდვა, ასევე, მოქმედებს ქუთაისი-ტყიბული-ამბროლაურის საავტომობილო გზის კმ36-კმ72 (ტყიბული-ამბროლაური) მონაკვეთზე, სადაც აკრძალულია მისაბმელიანი, ნახევრადმისაბმელიანი და 3- ადგილზე მეტი ტევადობის ავტობუსების გადაადგილება, დანარჩენი სახის ავტოტრანსპორტის მოძრაობა კი, დასაშვებია მოცურების საწინააღმდეგო ჯაჭვების გამოყენებით.
ყველა ამ მონაკვეთზე მობილიზებულია შესაბამისი ტექნიკა და გზის გაწმენდა ინტენსიური თოვის შეწყვეტისა და ზვავსაშიშროების მოხსნისთანავე დაიწყება.
უგზოობის გამო, მიმოსვლა დროებით შეზღუდულია დარიალის სასაზღვრო-გამშვებ პუნქტში, როგორც ქვეყანაში შემომავალი, ისე ქვეყნიდან გამავალი ყველა სახის ავტომობილისთვის. ასევე დიდთოვლობის გამო მოძრაობა აიკრძალა სამცხე-ჯავახეთის რეგიონში, კერძოდ, ნინოწმინდიდან სომხეთთან დამაკავშირებელ სასაზღვრო გამშვებ პუნქტ "სამებამდე". მოძრაობა აგრეთვე აკრძალულია ყველა სახის სატრანსპორტო საშუალებისთვის ქვემო ქართლის რეგიონში, ქალაქ წალკიდან ნინოწმინდის მიმართულებით. ორივე მონაკვეთზე მიმდინარეობს გზის ინტენსიური გაწმენდითი სამუშაოები.
სტიქიის ზონაში იმყოფებიან ყველა შესაბამისი უწყების წარმომადგენლები, ასევე გარემოს ეროვნული სააგენტოს სპეციალისტები - გეოლოგები და ჰიდროლოგები, რომლებიც საგანგებო რეჟიმში მუშაობენ.
მოსახლეობის მდგომარეობისა და იმ სამუშაოების შესახებ, რომლებსაც საგანგებო შტაბები ახორციელებენ, უწყვეტ რეჟიმში იღებს დეტალურ ინფორმაციას სახელმწიფო უსაფრთხოებისა და კრიზისების მართვის საბჭო. პრობლემურ ადგილებზე შექმნილია საგანგებო შტაბები, რომლებშიც გაერთიანებულები არიან ადგილობრივი მუნიციპალიტეტების, შინაგან საქმეთა, რეგიონული განვითარებისა და ინფრასტრუქტურის, ენერგეტიკის, გარემოს დაცვისა და ბუნებრივი რესურსების, შრომის, ჯანმრთელობისა და სოციალური დაცვის სამინისტროების წარმომადგენლები.
