არ დაქორწინდეთ: სიყვარულის პლანეტა ვენერა რეტროგრადული ხდება
ასტროლოგიაში ვენერა სილამაზის, სიყვარულისა და ფულის პლანეტაა. ახლა იგი კონსერვატიულ, სერიოზულ და თავშეკავებულ თხის რქაშია. 19 დეკემბრიდან კი რეტროგრადულ სვლას დაიწყებს თხის რქის 26-ე გრადუსიდან და დაბრუნდება მე-11-ში, 2022 წლის 29 იანვრამდე.
ვენერა ასტროლოგიაში არის ყველაფერი, რაც მომწონს (გემოვნური თვისებები, ჩაცმულობა, ვარცხნილობა, ადამიანები), რაც სიამოვნებასა და კომფორტს მანიჭებს. ჩვენი ღირებულებები. ამასთან ფინანსებსაც განაგებს და სილამაზესაც. ვენერას რეტროგრადული სვლის დროს ახალი ურთიერთობების დაწყებას პლასტიკური ოპერაციების და სილამაზის ნემსების გაკეთებას არ გირჩევთ. ეს პერიოდი უმჯობესია, დაუთმოთ არსებული კავშირების გაუმჯობესებას, გადაფასების, გადაკეთების დროა (თუნდაც ადრე ნაყიდი სამოსის). ან სულაც დრომოჭმული რომანტიკული კავშირის დასრულების. ღირებულებების გადაფასების - ადრე მომწონდა ახლა გემოვნება შემეცვალა.
რადგან ვენერა გრძნობების, ურთიერთობებისა და სიყვარულის პლანეტაა, გამორიცხული არაა, ყოფილებთან შეგახვედროთ. ახალი ძალით იფეთქოს ძველმა გრძნობამ. აი, აღადგენთ თუ არა მათთან კავშირს ეს უკვე თქვენზე და თქვენს ნატალურ რუკაზეა დამოკიდებული. მობრუნებულ ადამიანთან უნდა გადახედოთ თქვენს ურთიერთობას, გამოასწოროთ, დაასრულოთ, მიიღოთ ის შედეგი, რაც განშორების გამო ვერ მიიღეთ.
ვენერა არის ფინანსებიც და რეტროგრადული სვლის დროს დაფიქრდებით: მაკმაყოფილებს ჩემი შემოსავალი, რა უნდა მოვიმოქმედო, რომ გავიუმჯობესო ჩემი მატერიალური მდგომარეობა. შეიძლება დაბრუნდეთ ძველ სამსახურში, ან მიუბრუნდეთ ძველ პროექტებს, მიტოვებულ შემოქმედებით იდეებს.
ახლა რეტროგრადულ სვლას ვენერა თხის რქაში გააკეთებს. წლების წინ ასეთ მონაკვეთი მან გაიარა 2013 წლის 22 დეკემბრიდან 2014 წლის 31 იანვრამდე გაიხსენეთ, რა მოხდა მაშინ თქვენს ცხოვრებაში საყიდლების, ურთიერთობების სილამაზის სფეროებში.
რეტროგრადული ვენერას დროს არ გირჩევთ დაქორწინებას: შეიძლება მალევე განქორწინდეთ ან მიხვდეთ, რომ საყვარელ ადამიანთან ურთიერთობა სიამოვნებას არ გაინიჭებთ. ამ დროს არც ნიშნობას გირჩევთ. მოერიდეთ ექსპერიმენტებს ჩაცმულობაში, გარეგნობასა და ვარცხნილობაში. მოერიდეთ ფულის დაბანდებას, ძვირად ღირებული ნივთების (ძვირფასეულობის) შეძენას. აგრეთვე, არ გირჩევთ არც ვალის აღებას, შეიძლება გაგიჭირდეთ დაბრუნება და არც გაცემას, შეიძლება სულ დაკარგოთ ფული. ნუ გახსნით სილამაზისა და სამკერვალო სალონს, ტანსაცმლის მაღაზიას, ესთეტიკურ ცენტრს და საკონდიტროსაც - ვენერა გემოვნებაში ტკბილის სიმბოლოა.
დააკვირდით პერიოდებს 11-15, 24-28 დეკემბერი და 2022 წლის 28 თებერვალი-3 მარტი. ამ დროს რეტროგრადული ვენერა თხის რქაში შეხვდება პლუტონს. ეს უკანასკნელი არის მკაცრი ქირურგი და მოგაცილებთ ყველაფერ იმას, რამაც თავისი თავი ამოწურა. სერიოზული ტრანსფორმაცია გველის ფინანსებისა და სიყვარულის თემებში. გადაყარეთ დაზიანებული სამოსი, მოიცილეთ უსარგებლო ნივთები. გამორიცხული არაა ქირურგიული ჩარევით გადაიკეთოთ ადრე გაკეთებული ოპერაცია.
2022 წლის 9 იანვარს ვენერა შეხვდება მზეს და გამოანათებს თავის ყველა საუკეთესო თვისებას. ეს არის კარგი დღე სურვილის ჩასაფიქრებლადაც. სხვათა შორის, სურვილის ჩასაფიქრებლად, რა თქმა უნდა, სიყვარულის თემაზე, 5 იანვარიც საუკეთესო დღეა.
რაც შეეხება რეტროგრადული ვენერას გავლენას ფიზიკურ დონეზე. ვენერა რომ ტკბილეულია უკვე ვთქვი. შეამცირეთ ტკბილეულისა და ფქვილეულის ჭამა, ლუდის სმა. აკონტროლეთ ჰორმონალური ფონი, მოუფრთხილდით თირკმელებს, რეპროდუქციულ სისტემას.
ვისზე იმოქმედებს რეტროგრადული ვენერა ყველაზე მეტად? პირველ რიგში, რა თქმა უნდა, თხის რქებზე და განსაკუთრებით მათზე, ვინც დაბადების დღეს აღნიშნავს პირველ-16 იანვარს. 2-19 ივლისს დაბადებულ კირჩხიბებზე; 31 მარტიდან 16 აპრილის შუალედში დაბადებულ ვერძებსა და სასწორებზე, განსაკუთრებით მათზე, ვისი დაბადების დღეც უწევს: 3-20 ოქტომბრის პერიოდში. აგრეთვე, პირველ-17 მარტს დაბადებულ თევზებსა და 3-19 ნოემბერს დაბადებულ მორიელებზე; პირველ-17 მაისს დაბადებულ კუროზე; 3-19 სექტემბერს დაბადებულ ქალწულებზე.