2
მაისიდღის ზოგადი ასტროლოგიური პროგნოზი
ადმირალ ჯეიმს სტავრიდისის აზრით, ნატო ყირიმისკენ უნდა დაიძრას. როგორც სტავრიდისი თავის სტატიაში წერს, "მოქმედება შეიძლება, პროვოკაციული იყოს, თუმცა უმოქმედობაც - ასევე".
"ახლა, როდესაც პუტინის ოლიმპიადა დასრულდა, რუსეთის პრეზიდენტმა ნათლად აჩვენა თავისი საგარეო პოლიტიკის პრიორიტეტი - ჰქონდეს გავლენა, თუ სრული კონტროლი არა, უკრაინაზე. მან ფორმალურად მიმართა რუსეთის პარლამენტს, რომ მიეღო ნებართვა იმაზე, რაც უკვე გააკეთა - უკრაინაში ჯარების გაგზავნაზე. რუსეთის ჯარებმა ყირიმი დაიკავეს", - აცხადებს სტავრიდისი.
ადმირალი, ასევე, პარალელს ავლებს რუსეთის მოქმედებებთან საქართველოში, როდესაც მან აფხაზეთისა და ე.წ. სამხრეთ ოსეთის "დამოუკიდებელი" სახელმწიფოები შექმნა და დნესტრისპირეთზე და სვამს კითხვას, "იქნება თუ არა ყირიმი შემდეგი?!".
"მინდა, იმედი ვიქონიო, რომ მაღალი დონის დიპლომატიური განხილვები გაერო-ში, ევროკავშირსა და სხვა საერთაშორისო ორგანიზაციებში, უკრაინის ტერიტორიულ მთლიანობას უზრუნველყოფს. თუმცა, იმედი სტრატეგია არ არის, ამიტომ სამომავლო ნაბიჯები უნდა დაიგეგმოს. ნატო-მ სასწრაფოდ უნდა მოიწვიოს რიგგარეშე სესია, გათვალოს ყველა შესაძლო სტრატეგიული ნაბიჯი, იყოს მჭიდრო კონსულტაციების რეჟიმში უკრაინასთან, გაუწიოს კონსულტაცია სამხედრო სფეროში, თუ რა უნდა მოიმოქმედონ შესაძლო კონფლიქტის შემთხვევაში", - აცხადებს სტავრიდისი და დასძენს, რომ ჩრდილოატლანტიკურმა ალიანსმა უნდა შეიმუშაოს სარეზერვო გეგმა, რათა რეაგირება მოახდინოს ყირიმში სამხედრო ინტერვენციის შემთხვევაში.
"ბევრი პროვოკაციად ჩათვლის ნატო-ს ყველა მოქმედებას. სამწუხაროდ, ფსონები დიდია და რუსეთი მოქმედებს. უმოქმედობა ჩრდილოატლანტიკური ალიანსის მხრიდან, შეცდომა და პუტინისთვის სიგნალის გაგზავნაა, რომ მისთვის გზა ხსნილია", - წერს ჯეიმს სტავრიდისი.
ამასთან, აშშ უკრაინაში საერთაშორისო დამკვირვებლების დაუყოვნებლივ გაგზავნას ითხოვს. როგორც გაერო-ში ამერიკის შეერთებული შტატების მუდმივმა წარმომადგენელმა სამანტა პაუერმა განაცხადა, უკრაინაში ეუთო-სა და გაერო-ს დამკვირვებლები უნდა ჩავიდნენ.
პაუერი მიიჩნევს, რომ ყირიმში დამკვირვებლების ჩასვლა დაძაბულობას შეამცირებს. მისივე თქმით, ვაშინგტონი უკვე მუშაობს იმაზე, რომ საერთაშორისო მისია შეიქმნას, რომელიც რუსეთსა და უკრაინის მთავრობას შორის დიალოგს ხელს შეუწყობს.
