"ქალიშვილობის აღდგენა 800 ლარი ღირს"
საქართველოში "ქალიშვილობის საკითხზე" რამდენიმე კვირის წინ აჟიოტაჟი ატყდა და დღემდე არ ცხრება. სხვათა შორის, ჩვენს თანამოქალაქეებში განსაკუთრებულ ინტერესს ის იწვევს, ხშირად აკითხავენ თუ არა სუსტი სქესის წარმომადგენლები კლინიკებს ქალიშვილობის აღსადგენად.
კლინიკა "მედის" მარკეტინგის მენეჯერი თათა მიჩიტაშვილი:
- ჩვენს გინეკოლოგს ქალიშვილობის აღდგენის ოპერაცია რამდენჯერმე გაუკეთებია. სხვათა შორის ერთი და იმავე პაციენტისთვის რამდენჯერმეც. უფრო მეტად თბილისელი საზოგადოება გვაკითხავს. საერთოდ, ასეთი ინფორმაცია კონფიდენციალურია. ჯერ გინეკოლოგთან ვიზიტს ითხოვენ, შემდეგ იურისტთან აფორმებენ ხელშეკრულებას და ამ ინფორმაციის გაცემის უფლება არ გვაქვს. …ამ თემაზე აჟიოტაჟი ექსპერტიზის ეროვნული ბიუროს შესახებ გაკეთებულ რეპორტაჟს მოჰყვა. საინტერესოა, ასეთი რა აპარატი აქვს სამხარაულის სახელობის ექსპერტიზის ბიუროს, მისი მეშვეობით რომ ამას ადგენენ?! გამორიცხულია, ვინმეს დანადგარი დაადო და გაიგო, ქალიშვილია თუ არა, ან აღდგენილი აქვს თუ არა ქალიშვილობა.
- და მაინც, რა ღირს "ქალიშვილობის აღდგენა"?
- ჰიმენოპლასტიკა ჩვენთან 800 ლარი ღირს.
მარინა დარჩიაშვილი, ტატიშვილის კლინიკის გინეკოლოგი:
- ქალიშვილობის აღდგენით ოპერაციებს ჩვენ არ ვაკეთებთ. მორწმუნე ადამიანი ვარ და ეს პირველ რიგში, ცოდვად მიმაჩნია. თუ არ ვცდები, ამას კანონიც კრძალავს. ასეთ ოპერაციებზე უფრო პროვინციებიდან აკითხავენ სტაციონარებს. სამაგიეროდ, შემიძლია გითხრათ, რომ ქალიშვილ გოგონებს უკვე ძალიან იშვიათად ვხედავ. სხვა კლინიკაშიც ვმუშაობ და არც იქ ვაკეთებთ მსგავს ოპერაციებს. პირადად მე ქალიშვილობის მომხრე ვარ. დღეს გოგონები ყველაფერს კადრულობენ, ბევრი ქალიშვილი არაქალიშვილზე უარესია. სულით გარყვნილები არიან და ხშირად სამი პარტნიორიც ჰყავთ.
ზაზა გიგაური
ყოველკვირეული გაზეთი "ყველა სიახლე"
(გამოდის ოთხშაბათობით)