22
აპრილიდღის ზოგადი ასტროლოგიური პროგნოზი
პირველი საკეტი ჩვენს წელთაღრიცხვამდე 550 წელს დაამზადეს, იერუსალიმის ძველი ჭიშკრის საკეტი ხის იყო, დიდი და მარტივი კონსტრუქციის. მას შემდეგ ადამიანი ცდილობს, კარი ისე დაკეტოს, ქურდმა ვერ გააღოს. ახლახან ქართველმა მძარცველებმა მრავლისმნახველი იტალიელი კარაბინერებიც კი გააკვირვეს: კარს ისეთი ხელსაწყოთი აღებდნენ, რომელიც საკეტს არც კი აზიანებდა. ტექნიკურ მეცნიერებათა კანდიდატის, გამომგონებელ თამაზ მუშკუდიანის მიერ შექმნილი საიდუმლო საკეტი მრავალმხრივ საინტერესოა... მისი შექმნის ისტორიასა და პრაქტიკულ დანიშნულებაზე თვითონ ავტორი გვესაუბრება:
- ეს საკეტი სხვა ჩამკეტი სისტემებისაგან იმით განსხვავდება, რომ საკლიტულში გასაღები თავსდება პერპენდიკულარულად და არა ჰორიზონტალურად, როგორც ტრადიციულ საკეტებშია. გასაღები საკლიტულის ხვრელიდან გერმანული წარმოების მოქნილი ბაგირით, მიმმართველის გავლით, ეშვება მექანიზმში. ხელის ერთი მოძრაობა და, საკეტი ირაზება ან იღება! საიდუმლო ლითონის ღეროსგან დამზადებულ გასაღებშია. მასზე მაგრდება ერთმანეთისგან მკაცრად განსაზღვრული მანძილით (რაც კოდირების ერთ-ერთი ელემენტია) დაშორებული რგოლები, რომელთა დიამეტრიც ასევე კოდირებულია. საკეტის მექანიზმში რგოლებთან დაკავშირებული ფირფიტები სწორედ გასაღების კოდის შესაბამისად მონტაჟდება; სხვადასხვა დიამეტრის რამდენიმე რგოლის ერთმანეთისაგან 0,1 მმ სიზუსტით დაყენება კი ურთულესია, თითქმის შეუძლებელი. სწორედ ამაშია საკეტის საიდუმლო.
- რა დანიშნულება აქვს თქვენს გამოგონებას ყოველდღიურ ცხოვრებაში?
- საკეტი შეიძლება გამოვიყენოთ სახლის, ავტოფარეხის კარის, სეიფის დასაკეტად. მას რამდენიმე მილიონი, შესაძლოა, რამდენიმე მილიარდი საიდუმლო კოდი აქვს, რომლის ამოცნობა საკეტის არასანქცირებული გამღებისთვის ანუ ქურდისთვის შეუძლებელია. გარდა ამისა, საკეტს აქვს სასიგნალო სისტემა, რომელიც გატეხის მცდელობისთანავე ირთვება, კერძოდ, ჩაირთვება სირენა და ავტოდამრეკი საკეტის მფლობელს მსოფლიოს ნებისმიერ წერტილში მიაწვდის ინფორმაციას, რომ მისი კარი იღება, მის მობილურზე დაირეკება ნომრიდან, თუნდაც ჩვეულებრივი ტელეფონიდან, რომელიც მას წინასწარ აქვს ჩანიშნული და მიხვდება, რომ მისი სახლის კარი საფრთხეშია, შესაძლებელია, გემის სირენის ან მოციმციმე შუქის ჩართვაც. ეს ყველაფერი, ცხადია, სახლის კარის გაღებამდე ხდება. შესაძლოა, პროფესიონალმა ქურდმა კარი ვერც კი გააღოს, პატრონს კი სიგნალი მიეწოდება. დაუპატიჟებელი სტუმრის მიერ კარის ხელყოფისთანავე, მის გაღებამდე ბერკეტი ჩართავს გადამრთველს, რაც თავის მხრივ, აამოქმედებს სასიგნალო სისტემას; ხმოვანი სასიგნალო სისტემის ჩართვისას მძარცველი დაფრთხება, პატრონს კი დრო ექნება ზომების მისაღებად. ამ სასიგნალო სისტემის უპირატესობაა ისიც, რომ სხვა სისტემები მხოლოდ კარის გაღების შემდეგ რეაგირებს, ან ვიბრაციაზე, რაც ხშირად ცრუ განგაშის მიზეზი ხდება. ჩემი გამოგონება დაპატენტებულია როგორც საქართველოში, ისე საერთაშორისო საპატენტო უწყებაში, შვეიცარიაში.
- რამდენი ასეთი საკეტი გაქვთ დაყენებული?
- რამდენიმე ათეული საკეტი მაქვს დამზადებული. ჩემი სახლის, აგარაკის, ასევე ჩემი ახლობელ-მეგობრების სახლის კარზე დავაყენე. თითოეულს მრავალფეროვანი ფუნქცია აქვს და თამამად შეიძლება, გაუღებელი საკეტი ეწოდოს.
- დარწმუნებული ხართ, რომ მის გატეხას ვერავინ შეძლებს?
- რაც ადამიანის გონებამ და ხელმა შექმნა, საპირწონე ყოველთვის მოეძებნება, მაგრამ შემიძლია ვთქვა, რომ ამ საკეტის გახსნა დაუზიანებლად ჯერჯერობით ვერავინ შეძლო! ამისათვის სოლიდური ფულადი ჯილდოც კი დავაწესე, მაგრამ თანხა დღემდე ჩემთანაა.
ნინო კვიტაშვილი
ყოველკვირეული გაზეთი "ყველა სიახლე"
(გამოდის ოთხშაბათობით)
გამარჯობათ. და სად შეიძლება ამ საკეტის შეძენვა ? ასევე ფასი მაინტერესებს?