ქვეყანაში შემოსული პირების მხოლოდ 57%-ია ტურისტი

მიმდინარე წლის პირველი კვარტლის მონაცემებით, საქართველოში შემოსული პირების მხოლოდ 57%-ია ტურისტი. ტურიზმის ეროვნული ადმინისტრაციის ხელმძღვანელმა გიორგი სიგუამ დღეს სასტუმრო "რედისონში" ტურიზმის ადმინისტრაციის სამოქმედო გეგმა და მიმდინარე წლის პირველ კვარტალში ჩატარებული კვლევის შედეგები წარმოადგინა.

გიორგი სიგუას თქმით, ქვეყანაში შემოსული პირების მხოლოდ 57%-ია ტურისტი, დანარჩენი კი ერთდღიანი ვიზიტორები არიან, რომელთაც ქვეყანაში ღამე არ გაუთევიათ.

კონფერენციას ტუროპერატორების, სასტუმროების, რესტორნების, ბარებისა და ავიაკომპანიების წარმომადგენლები ესწრებიან. შეხვედრა ეკონომიკის მინისტრის პირველმა მოადგილე დიმიტრი ქუმსიშვილმა გახსნა.

გიორგი სიგუას თქმით, ამ დრომდე ქვეყანაში ტურიზმთან დაკავშირებით ქვეყანას სტრატეგია არ შეუქმნია და ერთი ადამიანის ნება-სურვილზე იყო დამყარებული ამ სფეროში აქტივობები.

მისივე განცხადებით, იგეგმება სტრუქტურული ცვლილებები, შეიქმნება რეგიონალური მართვის ორგანიზაციები. ადგილებზე გაძლიერდება საქართველოს ჩართულობა ტურიზმის საერთაშორისო ორგანიზაციებთან, რათა საქართველოში იმართებოდეს ტურიზმისადმი მიძღვნილი საერთაშორისო კონფერენციები, მომზადდება კანონი ტურიზმის შესახებ და დიდი ყურადღება მიექცევა შიდა ტურიზმის განვითარებას.

ტურიზმის ადმინისტრაციის სამოქმედო გეგმის პრეზენტაციაზე ტურიზმის ადმინისტრაციის ხელმძღვანელი ამ სფეროში დასაქმებულ პირებს მათ კონკრეტულ ქმედებებზე ესაუბრება და მათ წინადადებებს მოისმენს.

"ინტერპრესნიუსი"