2
მაისიდღის ზოგადი ასტროლოგიური პროგნოზი
16 აპრილს ამიკო ჩოხარაძე ქალიშვილის მამა გახდა. მსახიობმა ოჯახი 3 წლის წინ შექმნა ანა ონიანთან. 2 წლის საბას შემდეგ წყვილს ემილი შეეძინა. ანა პროფესიით ჟურნალისტია, წყვილმა ურთიერთობა ვირტუალურად, სკაიპით დაიწყო. ცხოვრების მთავარ სიყვარულზე ამიკო დღეს თავად გიამბობთ.
- ამიკო, გილოცავ ქალიშვილის დაბადებას. როგორ განწყობაზე ხარ?
- ჩემს ცხოვრებაში ცოლის მერე მეორე ქალი გამოჩნდა. გახარებული ვარ, დაბნეულიც კი, მიუხედავად იმისა, რომ მამა მანამდეც ვიყავი. ჩემი ბიჭები ყველანი იქ იყვნენ, მგულშემატკივრობდნენ. რომ დაიბადა, ყველანი ერთად წავედით რესტორანში. დავიმხეთ ყველაფერი თავზე. თუ იცით, "იუთუბის" პროექტია "ჰარლემ შეიქი", კონკრეტულ მუსიკაზე ორმოცდაათი წამი გიჟობ. ჩვენ ამის ქართული ვერსია გადავიღეთ რესტორანში. ხალხი გაოცებული გვიყურებდა, რა ხდებაო.
- ვინ ეხმარება შენს მეუღლეს?
- ჩემი სიდედრი.
- სიდედრთან ცხოვრობ?
- არა, სიდედრი ცხოვრობს ჩემთან (იცინის). ჩასიძებული არ ვარ. სიდედრად მეკუთვნის, თორემ ისე ჩემი მეგობარია, კარგი ადამიანია ძალიან.
- ამიკო, "რეიტინგის" მკითხველისთვის არასდროს მოგიყოლია შენი სიყვარულის ამბავი. როგორ გაიცანი მომავალი მეუღლე?
- სკაიპით გავიცანით ერთმანეთი. პროფესიით ჟურნალისტია, სანამ ცოლად მოვიყვანდი, სხვადასხვა ჟურნალთან თანამშრომლობდა. ჩემი მეუღლე გვარით სვანია. ისე, ქუთაისში დაიბადა და გაიზარდა. დიდხანს ვირტუალური ურთიერთობა გვქონდა, ფიზიკურადაც არ ვიცნობდით ერთმანეთს. შესაბამისად, თამამად შემიძლია ვთქვა, რომ ჩვენ ნამდვილი სიყვარული გვქონდა. მაშინ ანა საბერძნეთში ცხოვრობდა დედასა და დასთან ერთად. რვა თვე ვიკონტაქტეთ ასე სკაიპით. ჩემი ცოლისდა საბერძნეთში "ბე-ემ-ვეს" ფირმის მენეჯერი იყო, ჩემი სიდედრი "სვაროვსკის" საამქროში მუშაობდა, ჩემი ცოლი კი საბერძნეთში ერთ-ერთი ცნობილი ხმის ჩამწერი სტუდიის ხელმძღვანელი გახლდათ. მოკლედ, ასეთი ტკბილი და კარგი ცხოვრება დავუნგრიე (იცინის). 8-თვიანი ურთიერთობის შემდეგ ჩავაკითხე საბერძნეთში.
- პირდაპირ სახლში მიხვედი?
- პირდაპირ! ვეღარ მოვითმინე, აღარ შემეძლო. საბერძნეთში ყოველ შაბათ-კვირას ვერ ჩახვალ, ვერც თვეში ერთხელ. მივედი, გავიცანი ოჯახის წევრები, რომლებიც მანამდე სკაიპით მიცნობდნენ. მოვიკითხავდი ხოლმე, მაქსიმალურად ვცდილობდი, კარგი შთაბეჭდილება დამეტოვებინა. ჩემს სასიდედროს შევპირდი, 10 დღეში შენი ქალიშვილი ჩემთან იქნება-მეთქი. მერვე დღეს გამოპარვას აპირებდა თურმე, ამტყდარა ერთი ამბავი. მეათე დღეს მაინც მოახერხა და ჩამოვიდა. მოვაწერეთ ხელი, მერე გვეყოლა საბა. ამ ზაფხულს ჯვარიც დავიწერეთ.
- ანა საბერძნეთში ცხოვრობდაო, მითხარი, გიცნობდა, როგორც მსახიობს?
- კი, უყურებდა ჩვენს შოუებს. საბერძნეთში კონცერტიც ხომ გვქონდა იქაური ქართველებისთვის... ერთი სიტყვით, ჩვენი ურთიერთობა ისე აეწყო, რომ აგერ უკვე მეორე შვილი მაჩუქა, რისთვისაც მთელი ცხოვრება მისი მადლიერი ვიქნები.
- წლების მერე რა გითხრა, როგორ მოვიხიბლე შენითო?
- ასე ძნელია თქმა. მეც რომ მკითხოს, შეიძლება, არ მქონდეს ამ შეკითხვაზე პასუხი. შეგვიყვარდა ერთმანეთი. გულს ვერ უბრძანებ.
- როგორი მამა ხარ?
- შეიძლება, მეტი უნდა გავაკეთო, მაგრამ ასე მგონია, მაქსიმუმს ვაკეთებ. სანამ ემილი დაიბადებოდა, ასეთი რეჟიმით ვცხოვრობდით, საბას ძილის წინ 2 საათს მაინც ვეთამაშებოდი, რომ დამეღალა, მერე ან ის მაძინებდა მე, ან მე მას (იცინის). დილა-საღამოს მხედავს მარტო და მაინც ჩემი რიდი უფრო აქვს. ჩემი ცოლი მეუბნება, დღეში ორჯერ გხედავს და მაინც შენ უყვარხარ ყველაზე მეტადო. სხვას არავის უჯერებს. ცელქი და მეტისმეტად ენერგიულია. ჩემი ერთი სიტყვა საკმარისია, რომ გაჩერდეს. რომ დავუყვირებ, ძალიან სწყინს, არ იცის, სად დაიმალოს.
- სამსახურებრივ ამბებზეც გვესაუბრე.
- 26 აპრილს ახალი პროექტი გავა "ჯი დი ეს"-ის ეთერში. პროექტს ჰქვია "ნოკაუტი". ეს არის თამაში ფულზე, სადაც გუნდები ერთმანეთს იუმორში ეჯიბრებიან. გუნდები კასტინგის შედეგად შევარჩიეთ. გადაცემის წამყვანია ფაქო, ლევან გოგორელიანი. თამაშს ჟიურის სამი წევრი ჰყავს, ორი მუდმივი (შალვა რამიშვილი და თემო მჟავია) და ერთიც მოწვეული, ყველა გადაცემაში სხვადასხვა. გადაცემებს ბერას კლუბში ვწერთ. გამარჯვებული კარიერასაც აიწყობს, ჩვენს ტელევიზიასთან ითანამშრომლებს.
- შენ ჩანხარ ამ გადაცემაში?
- არა, მე არა. მე შავ საქმეს ვაკეთებ (იღიმის).
- შენ სად გამოჩნდები?
- მე ერთ საკმაოდ ამბიციურ პროექტზე ვმუშაობ, რომელიც ერთ კაცზე გათვლილი პროექტია. თუ ყველაფერი ისე გაკეთდა, როგორც ჩავიფიქრე, შემიძლია, პროექტი ევროპის მასშტაბით გავყიდო. ერთ კვირაში პილოტს გადავიღებთ.
- ამიკო, შენ გყავს ძალიან ნიჭიერი, სიმპათიური ძმა, ბექა ჩოხარაძე, საოცარი ვოკალური მონაცემები აქვს, რატომ არ არის ის თქვენს გუნდში?
- იუმორისტულ გუნდში ბექას არაფერი ესაქმება. ბექა მუსიკალურ პროექტ "დრიმერსში" იღებს მონაწილეობას. ჩემმა ძმამ უკვე ჩაწერა სიმღერა, გუშინ კლიპიც გადაიღეს. ვნახოთ, რა იქნება.
ნინო მჭედლიშვილი
(გამოდის ორშაბათობით)
