ცნობილების შვილები

ვაგრძელებ ცნობილების შვილების თემას და წარმოგიდგენთ კიდევ 4 ცნობილი ადამიანის მემკვიდრეებს.

თაკო ჩხეიძემ მოახერხა და საქმე პირად ცხოვრებას შეუთავსა. მოდელი დიდი ხანია გათხოვილია, ჰყავს სამი ვაჟი და მესამეზე ორსულად რომ იყო, თბილისის მოდის კვირეულის პოდიუმებს წარმატებით ლაშქრავდა. თაკოს მეუღლე დიპლომატიურ სამსახურშია, მოდელი თავის შვილებთან ერთად წლების განმავლობაში ხან ესტონეთში იყო, ხან - თბილისში, ახლა კი თბილისში დაფუძნება გადაწყვიტა. თაკოს პირველი შვილი 11 წლის სერგია, რომელიც ისე ჰგავს დედას, რომ მოდელის "ფეისბუქზე" გამოქვეყნებულმა ამ ფოტომ თაკოს მეგობრებში დიდი აჟიოტაჟი გამოიწვია, დედა-შვილი ერთმანეთს გაჭრილი ვაშლივით ჰგავსო.

სალომე ღვინიაშვილი კიდევ ერთი მოდელია წარმატებული კარიერითა და პირადი ცხოვრებით. მართალია, ბევრი ამბობს, რომ სალომეს, თავისი ეგზოტიკური გარეგნობის დამსახურებით, შეეძლო, საზღვრებს გარეთ მშვენიერი კარიერა გაეკეთებინა, მან პატარა ასაკიდანვე დაოჯახება ამჯობინა, ტატო აბულაძეს გაჰყვა ცოლად, რომელთანაც ვაჟი, დათუნა შეეძინა.

შემდეგ კი ახალგაზრდობაში შექმნილი ოჯახი დაინგრა და სალომემ თავისი ბედი ცნობილ ქართველ ფეხბურთელ ზურა ხიზანიშვილს დაუკავშირა, რომელთანაც ორი გოგონა ჰყავს, ოჯახი სახალისო ფოტოსესიებს "ფეისბუქზე" ხშირად აქვეყნებს.

"რუსთავი-2"-ის ჟურნალისტ თეა ადეიშვილს ერთადერთი გოგონა ნიტა არდიშვილი პირველი ქორწინებიდან ჰყავს. ნიტა სტუდენტი გახლავთ, ძალიან მხიარული და აქტიური გოგონაა და გარეგნულად დედას ძალიან ჰგავს.

თეასა და ნიტას დედაშვილურის გარდა მეგობრული ურთიერთობაც აკავშირებთ. რამდენიმე კვირის წინ ნიტას დაბადების დღეზე თეამ მისი ფოტოების ალბომი გამოაქვეყნა "ფეისბუქზე" და გულის ამაჩუყებელი მინაწერიც გაუკეთა, რომ, როგორც ყველა დედას, მასაც აქვს შენიშვნები შვილის მიმართ, მაგრამ ნიტა ძალიან სწორი პრინციპების მქონე და კარგი ადამიანია.

მაკა ასათიანს სამი ვაჟი ჰყავს: კახი და ლევან ჟორდანიები ფეხბურთის ფედერაციის ყოფილი პრეზიდენტის, ამჟამად კი ჰოლანდიური არნემის "ვიტესის" მფლობელის, მერაბ ჟორდანიასგან, ხოლო მე­ორე და ამჟამინდელ ქმართან, კოტე გოგელიასთან - უმცროსი შვილი, კონსტანტინე გოგელია.

ალბათ ყველას გა­ხსოვთ პატარა გოგონა "ბასტი-ბუბუდან", ფერიას კაბაში რომ იყო გამოწყობილი, მარიანა აჩბა, ანუ მანუ, როგორც მას საყვარელი დეიდა ეძახის ბავშვობიდან. ის უკვე დიდია, საზღვარგარეთ ცხოვრობს და სწავლობს. მარიანა მაკას დის, სალომეს შვილია. სალომე პრესასთან არასდროს გამოჩენილა, თუმცა მის სილამაზეზე ლეგენდები დადიოდა. სალომე მაკას ნაკვთებით ძალიან ჰგავს, თუმცა ქერათმიანი და მწვანეთვალებაა. დისშვილი მარიანა დეიდას არ ჰგავს. რაც შეეხება მაკას შვილებს, ყველაზე მეტად მას პატარა კონსტანტინე ჰგავს.

DJ ბუკლე

ჟურნალი "რეიტინგი"

(გამოდის ორშაბათობით)