1
მაისიდღის ზოგადი ასტროლოგიური პროგნოზი
შესავლის ნაცვლად
ირაკლი ოქრუაშვილი იქნება დღევანდელი "პროვოკაციის" ერთ-ერთი მთავარი "გმირი"...
საიდან დავიწყო... საიდან და, ნოდარ დუმბაძის იმ ერთი პერსონაჟისა არ იყოს ("ბოლოდან დეიწყე, ბოლოდან!"), "ბოლოდან" დავიწყებ: დღეს (სამშაბათს, 11 დეკემბერს) გავრცელდა ინფორმაცია, რომ ოქრუაშვილს უარი ეთქვა გათავისუფლებაზე; სასამართლომდე გათავისუფლებას ვგულისხმობ.
ამას წინ უსწრებდა პარლამენტის ადამიანის უფლებათა კომიტეტის წევრის, გედევან ფოფხაძის განცხადება, - ოქრუაშვილი ავანტიურისტიაო! ამას კიდევ ის უსწრებდა წინ (რადგან "ბოლოდან დევიწყეთ", ასევე გამოვყვეთ), რომ ოქრუაშვილი, სწორედ ამ კომიტეტმა, პოლიტპატიმართა სიიდან ამოიღო, ხოლო ამ (ანუ ფოფხაძე რომ მუშაობს, - იმ) კომიტეტს ეკა ბესელია ხელმძღვანელობს; ეკა ბესელიას კი, სწორედ ოქრუაშვილის "ჯინი აქვსო"; მერე ისიც გაახსენდათ, ერთ დროს რომ თანაპარტიელები იყვნენ ბესელია და ოქრუაშვილი, მერე ოქრუაშვილის ახლანდელმა თანაპარტიელებმა (უფრო ზუსტად - თეო ტლაშაძემ, ეგღა დარჩა), - ამას ასე არ დავტოვებთო... აი, ხომ არ არის რაც დავწერე დიდად საინტერესო და საპროვოკატორ-სახალისო, არა? სამაგიეროდ, ამ ამბებამდე ორი დღით ადრე, ციხეში, ოქრუაშვილმა ახალაიას რომ სულ "ვაგინა აგინა"! - აი, ეს უკვე საინტერესოა!
საერთოდ, ოქრუაშვილი რომ საფრანგეთიდან საკუთარი ნებით ჩამოვიდა, პირადად მე რაღაცნაირი, გაორებული გრძნობა გამიჩნდა: ჯერ ერთი, რომ იცოდა, აეროპორტშივე დაიჭერდნენ, მაგრამ ცხადია, იმედი ჰქონდა, რომ გაათავისუფლებდნენ, როგორც სიმართლისათვის დევნილ გმირს; მეორე მხრივ - თუკი პარლამენტის ერთ-ერთი მთავარი კომიტეტის უფროსობასთან ასეთი აწეწილი ურთიერთობა ჰქონდა, რას მორბოდა?! ყოფილიყო პარიზში, დილ-დილობით კაკაოში ჩამბალი კრუასანები ეჭამა და დალოდებოდა აქ მოვლენების განვითარებას... ვითომ ასე მოენატრა სამშობლო?.. ისე, რატომაც არა? და კრუასანს, ჩემი არ იყოს, ალბათ, მაგასაც ხინკალი ურჩევნია.
თუმცა, მაინც მგონია, რომ... "გადააგდეს"! იმიტომ, რომ აეროპორტიდან გლდანის ციხეში გადაყვანისთანავე, "საქმეში ჩახედული" ხალხი დამაჯერებლად ამტკიცებდა, - კარგ დროს ჩამოვიდა, ორი-სამი კვირა მაინც ხომ უნდა იჯდეს, სანამ ყველაფერს გააფორმებენ და რომ დაეგვიანა, ახალ წელს სახლში ვერ შეხვდებოდაო!
ჰოდა, ახლა ძალიან მაინტერესებს: რომელ ახალ წელს შეხვდება ოქრუაშვილი საკუთარ სახლში?
არადა, ჯერ კიდევ "მატროსოვის" ციხეში მომხდარი ინციდენტის დროს, დარწმუნებულები ვიყავით (პირველ რიგში, თვითონ იყო დარწმუნებული), რომ იქაც "ხაზეინობდა", რადგან კი ითქვა ოფიციალურად: "ოქრუაშვილსა და ახალაიას შორის შეხლა-შემოხლა მოხდაო", მაგრამ ყველამ იცოდა, რომ მხოლოდ "შეხლა" მოხდა, "შემოხლა" კი - არა...
კარგი, ოქრუაშვილისგან განსხვავებით, ციხიდან გამოშვებულ პატიმრებზე გადავიდეთ (მით უმეტეს, რომ ეჭვი მაქვს, ოქრუაშვილის თემა ძალიან გააქტუალურდება ახალ წლამდე. ხომ გახსოვთ, ჩემი რამდენი წინასწარმეტყველება ახდა): პრეზიდენტის მიერ შეწყალებულ პატიმართაგან ერთ-ერთმა, გათავისუფლებიდან მესამე დღესვე ვიღაცის მოკვლა სცადა. საბედნიეროდ, მსხვერპლი სიკვდილს გადაურჩა, ის მათხოვარი კი, ცხელ კვალზე დააკავეს... მერე დაიწყო "საინტერესო" ამბები: "ნაცმოს" მომხრე ჟურნალისტებმა და სოცქსელების აქტივისტებმა ამბავი ატეხეს, სააკაშვილს "სატოპკე აუწიეს", იმანაც საკუთარი პრესმდივნის პირით შემოგვითვალა: მაგ კაცის გამოშვება არ მინდოდა, მაგრამ სუბარმა მაგაზე პირადად იშუამდგომლაო! მერე სუბარის უწყებამ - ავად იყო, ციხეში მოკვდებოდაო, - ოფიციალურად განაცხადა!!! მოკვდებოდა, თურმე, ციხეში... ახლა მაინც დასაჭერი რომ გაგიხდათ, აღარ მოკვდება?!
ამ დროს, მართლა წესიერ, "კრისტალ" ხალხს დაკითხვებზე ატარებენ და აშკარად, დაჭერას უპირებენ! მე კიდე რა მიჭირს, გადავიტან, მაგრამ ნინა წკრიალაშვილის და ნინო ჩხეიძის ცრემლების არ გრცხვენიათ?! ეგენი არავის დაანებებენ ვანო მერაბიშვილის დაჩაგვრას და ფრთხილად იყავით: შეეშვით მაგ კაცს, თორემ მოვლენ წკრიალაშვილი და ჩხეიძე და გიმღერებენ!
ეეეჰ, ვერ გაამართლა ამ ახალმა ხელისუფლებამაც, რა... თქვე კაი ხალხო, დაიჭირეთ დროზე, ვინც დასაჭერია; გამოუშვით, ვინც გამოსაშვებია; დაგვირიგეთ ყველა ამომრჩეველს ის "პა ტიში დოლარი", რომელსაც დაგვპირდით და მიხედეთ საქმეს: აგერ ლუკაშენკომ, საჯაროდ დაგიჩოქებთ, ოღონდ ეს-ენ-გეში შემოდითო! ცოტა თავს თუ დავიფასებთ (ოღონდ მთლად ისეც ნუ, რომ არ მიგვიღონ), იქნებ არა მხოლოდ დაგვიჩოქოს, არამედ ერთ ადგილზეც გვაკოცოს და მერე რაღა გვიჭირს!
თანაც მედვედევმა მთლად გამაგიჟა: ტელეინტერვიუში თქვა, ოფიციალურად ვაცხადებ, რომ რუსეთში უცხოპლანეტელები იმყოფებიანო! რამდენი ხანია, მაგათი გაცნობა მინდა... უფრო სწორად, უცხოპლანეტელობა მინდა...
P.P.S. ძალიან ვხალისობ წინასწარ: წაიკითხავენ ამ "პროვოკაციას" ნაციონალ-მიშისტები და ხელებს მოიფშვნეტენ - ესეც ჩვენკენ გადმოსულაო...
პროვოკატორი
(გამოდის ხუთშაბათობით)
