1
მაისიდღის ზოგადი ასტროლოგიური პროგნოზი
ბედი მომეცი და სანაგვეზე გადამაგდეო", ეს ქართული ანდაზა ზედგამოჭრილი იყო კაკოსთვის და თვითონაც ბევრჯერ უთქვამს საკუთარ თავზე ეს სიტყვები. 16 წლის იყო, პირველად რომ შეუყვარდა და იმ დღის მერე თვლას ვეღარ აუდის, იმდენ ქალთან ჩაფლავდა და იმდენთან ვერ მიაღწია მიზანს უამრავ მიზეზთა გამო, რომელიც არა და არ ილეოდა. ჯერ კიდევ შორეულ ბავშვობაში, მაშინ, როცა კაკო ბაღში დადიოდა, თEემური გაიცნო და იმ დღიდან მოყოლებული, ერთად არიან. თემური დღესაც უცოლოა. სამაგიეროდ, სახლიც აქვს, მანქანაც ჰყავს და ფულსაც ბლომად შოულობს. კაკოს ყველანაირად ეხმარება და ამ სიკეთესთან ერთად, ცოლიც მოაყვანინა... თავიდან დიდად კმაყოფილი დარჩა კაკო მეგობრის კეთილი საქმით, მაგრამ უღელდადგმული კაკო როცა უყურებდა, როგორ არხეინად დადიოდა თემური და ერთობოდა, გულზე სკდებოდა და მეგობარს წამოაძახებდა ხოლმე, - შენ დამღუპე, რად მინდოდა ცოლიო, თუმცა გულში ასე სულაც არ ფიქრობდა. განსაკუთრებით მაშინ, როცა ბერბიჭად დარჩენილ თემურს უყურებდა.
ყოველ ზაფხულს, კაკოს ტრადიციულად ზღვაზე მიჰყავდა ცოლ-შვილი დასასვენებლად, რა თქმა უნდა, თემურის წყალობით. ერთხელაც ვერ შეძლო თემურმა დასასვენებლად წასვლა და კაკო ოჯახითურთ ზღვაზე გაუშვა... მზეს მიფიცხებული, უამრავი ახალგაზრდა, შიშველ-ტიტველი ლამაზი გოგონების შემხედვარე კაკოს გული ყმაწვილივით აუჩქროლდა და ერთი-ორჯერ ცოლისგან მალულადაც გადაწყვიტა, ამ სილამაზით დამტკბარიყო. პლაჟზე 25 წლის ბიჭივით მონებივრე კაკო ლამაზმანებს ხარბად მისჩერებოდა და გულში ფიქრობდა, - აქ რომ ახლა თემური იყოს, უეჭველი, რომელიმეს დაითრევდა და მე რატომ ვერ უნდა შევძლო ესო? დიდხანს ატრიალა თვალები "სოჩიკივით" ღრმად ჩაფიქრებულმა კაკომ და ბოლოს გეგმაც შეიმუშავა. თავდაპირველად ცოლი შეამოწმა, რათა მისთვის ხელი არ შეეშალა, შემდეგ თავსაც შთააგონა, რომ სულაც არ იყო ბებერი და საქმეს შეუდგა. ძლივძლივობით დაკერა ერთი რუსქართველა ლამაზმანი და მის დალოცვილ დაქალთან ერთად სულ მალე პლაჟზე გაიშოტა, აქეთ-იქით მოიწვინა "ნადავლი" და გეგმის შემდეგი ეტაპის შესრულებას შეუდგა...
ტყუილების გუდას მოხსნა თავი და რაც მანამდე არ უთქვამს, ერთად იჯერა გული. ის იყო, ერთ-ერთისთვის ხელი უნდა წაეტანებინა გახარებულ კაკოს, რომ ცოლის ხმა ექოსავით ჩაესმა და დაფეთებულმა შეხედა თავზე წამომდგარ, დოინჯშემოყრილ ცოლს. დენდარტყმულივით წამოხტა და გაცეცხლებული ცოლი ძლივს მოაცილა იქაურობას, შეიქნა ერთი ვაი-უშველებელი, წივილ-კივილი, გაგიჟებულ ნათიას ხან იმ ოჯახის წევრები აწყნარებდნენ, სადაც სტუმრად იყვნენ, ხან - ნირწამხდარი კაკო, მაგრამ ნათია მაინც არ ცხრებოდა და დაზეპირებულივით გაიძახოდა: - მიღალატე, ხომ? აღარ მოგწონს ბებერი ცოლი, არა? მე შე გაჩვენებ სეირსო... შეშინებული კაკო უცებ გამოცოცხლდა და შეტევაზე გადავიდა, - შენ, ქალო, მართლა გაგიჟდი? თემური ჩამოვიდა და ის გოგონები იმასთან იყვნენ, თემური სადღაც გავიდა და მე გვერდიდან ხომ არ ავეცლებოდი, კაცი ვარ თუ ვინ ვარ, ერთი მითხარიო?! - შეუტია ცოლს და ცოტათი ამოისუნთქა, იქნებ გამოვძვრეო, მაგრამ ამ შემთხვევაში, თავდაცვისთვის თავდასხმამ არ გაამართლა მანამ, სანამ თემური მართლაც არ გაჩნდა მათთან, დაბარებულივით. არც მისალმებია ნათია, ეგრევე პირში ეცა, - მართლა შენთან იყვნენ ის გოგონები? არ მოიტყუო, იცოდე... "ვინ გოგონები?" - კაკოს ამ სიტყვებმა გაუელვა თავში და თემურს ისეთი საცოდავი თვალებით შეხედა, ქვას აატირებდა.
- ჰო, ჰო, ჩემთან იყვნენ, რა იყო? - ცოლს ნიშნის მოგებით გადახედა და შვებით ამოისუნთქა კაკომ. კაკოსთან მარტო დარჩენილმა თემურმა მეგობარს ნახევრად ხუმრობით უთხრა, - ვიცოდი, რა ფათერაკა იყავი, გულმა არ მომითმინა და მაგიტომ ჩამოვედიო. ასე გადაარჩინა მეგობარმა. იმ დღეს კარგად მოილხინეს, აბა, ისე როგორ იქნებოდა, კაკოს "გადარჩენის" არ დაელიათ? ლუნა".
