11
აპრილიდღის ზოგადი ასტროლოგიური პროგნოზი
ცნობილი ქართველი პიანისტი და არაერთი საერთაშორისო მუსიკალური კონკურსის გრან-პრის მფლობელი ვალერიან შიუკაშვილი იანვარში საფრანგეთში მიემგზავრება და ქალაქ კანში მუსიკის საერთაშორისო ფესტივალზე დაუკრავს.
კანის საერთაშორისო ფესტივალამდე კვიპროსის და სანკტ-პეტერბურგის საერთაშორისო კონკურსზე ჟიურის წევრად არის მიპატიჟებული. გარდა ამისა, მას ორი სოლო კონცერტი ექნება ქალაქ მოსკოვში. 9-16 დეკემბერს კი ხელოვნების აკადემია, რომელიც შიუკაშვილმა დააფუძნა, კლასიკური მუსიკის მე-3 ეროვნული კონკურსს ჩაატარებს.
საკმაოდ დატვირთული გრაფიკის მიუხედავად, ვალერიან შიუკაშვილი მაინც ახერხებს მუშაობას ვიქტორ დოლიძის ნაწარმოებზე და მსმენელის წინაშე მალე წარადგენს საფორტეპიანო ფანტაზიას "ქეთო და კოტეს" თემებზე, რომლის ნაწილი ცნობილია საზოგადოებისთვის სათაურით "როიალის ანატომია".
გარდა ამისა, "ხელოვნების აკადემიას" მომავალ წელს დაგეგმილი აქვს არაერთი გამოფენა, თეატრალური და ლიტერატურული საღამოები, ეროვნული კონკურსები და ფესტივალები.
- უამრავი კულტურული პროექტი მაქვს დაგეგმილი, რომელსაც მომავალ წელს აუცილებლად განვახორციელებ. მასში მონაწილეობას ღვაწლმოსილი და ცნობილი ხელოვანები მიიღებენ. კონკურსები და ფესტივალები კი მომავალი თაობის წარმოჩენას, აღზრდასა და ხელისშეწყობას მოემსახურება.
- ხელოვანთა ნაწილს სურს კულტურისა და ძეგლთა დაცვის მინისტრის მოადგილედ გიხილოთ.
რამდენად შეძლებთ თავი გაართვათ ამ მისიას?
- ამ ეტაპზე თავი მინდა შევიკავო იმაზე საუბრისგან, თუ რისი გაკეთება შემიძლია, რადგან ჩემი კანდიდატურა განიხილება კულტურისა და ძეგლთა დაცვის მინისტრის მოადგილის თანამდებობაზე - არ მინდა საზოგადოებამ ჩათვალოს, რომ მე ამით პიარს ვიკეთებ. მე ვთვლი, რომ საკმარისად სწორად მოხდა ჩემი წარდგინება. მოდით, ნუ გავუსწრებთ მოვლენებს წინ, დაველოდოთ მოადგილეების დანიშვნას და მერე ჩემთვის გაცილებით ადვილი იქნება თქვენთან საკუთარ წარმატებებზე საუბარი.
გიორგი ბერიძე
