2
მაისიდღის ზოგადი ასტროლოგიური პროგნოზი
უმცროსი შვილი ნოდარი 13 წლისაა და მეორე წელია, ამერიკაში სწავლობს. უფროსი ტასო - მალე დედა გახდება, ჯეჯი კი წელს თეატრალურის სტუდენტი გახდა. ეკა ნიჟარაძე "ცეკვავენ ვარსკვლავებში" მონაწილეობს და ამაყობს, გაზრდილ შვილიშვილს რომ ეტყვის, შენ რომ დაიბადე, იმ წელს "ცეკვავენ ვარსკვლავებში" ვმონაწილეობდიო.
- ბევრად უფრო რთული პროექტი აღმოჩნდა, ვიდრე მეგონა, მიუხედავად იმისა, რომ ბალეტზე დავდიოდი და დიდხანს ვცეკვავდი, გამიჭირდა სამეჯლისო ცეკვების ცეკვა. ახლა, როცა უკვე მეოთხე ცეკვისთვის ვემზადებით, აზარტი გამიჩნდა. ძალიან ვიღლები რეპეტიციებზე. ყველაფერი მტკივა. სახლში საშინლად დაღლილი მოვდივარ. გარდა ამისა, ხერხემალზე პრობლემები მაქვს და თიაქარი. ამ ბოლო დროს მუხლი მაწუხებს. სულ ნემსებს ვიკეთებ და მალამოებს ვისვამ, მაგრამ პროექტში მაინც ძალიან კარგად ვგრძნობ თავს, რადგან ეს ყველაფერი მსიამოვნებს.
- როდესაც ახლო მეგობარი თეა გობეჯიშვილი ჟიურის წევრია, უფრო მშვიდად ხარ?
- არანაირად. თეა ეწინააღმდეგებოდა ჩემს პროექტში მონაწილეობას, რადგან ბევრს ინერვიულებდა ჩემზე. მაშინ თეას ჟიურის წევრობა არც განიხილებოდა. ამ პროექტში მონაწილეობა ორივესთვის მოულოდნელი იყო. თეასი ყველაზე მეტად მეშინია. ვიცი, რომ არ დამინდობს. ეს ჩანს კიდეც. რა ქულასაც მიწერს, ყოველთვის ობიექტურია.
- რატომ ვერ იცეკვეთ კარგად მეორე ტურში?
- ამის მიზეზები ტელეეკრანზე არ გამოჩნდა. ტექნიკური პრობლემა იყო. უშუალოდ ეთერის წინ მომიწია ტრიუკის გაკეთებამ. მაღლა ვეკიდე რამდენიმე ხანი. ზუსტად იყო გათვლილი, რამდენ ხანში უნდა ჩამოვსულიყავი. ოდნავ დაგვაგვიანდა ცეკვის დაწყება, რაზეც მეც და ჩემმა მეწყვილემაც ძალიან ვინერვიულეთ. საბედნიეროდ, ყველაფერი კარგად დამთავრდა და შემდეგ ტურში გადავედი.
- ამ პროექტმა რა შეცვალა შენს ცხოვრებაში?
- დავიკელი წონაში. აბსოლუტურად შეიცვალა ჩემი ფორმები. დამიბრუნდა ჩემი ნავარჯიშევი სხეული, რომელიც მქონდა დაახლოებით 20 წლის წინ. მხოლოდ სამი დღე გვაქვს ცეკვის მოსამზადებლად. მინდა ვთხოვო მაყურებელს, ძალიან კრიტიკულები ნუ იქნებიან. სოციალურ ქსელში რატომღაც გაბოროტებულ კომენტარებს წერენ. მარტო ჩემს თავს არ ვგულისხმობ.
- საკუთარ თავზეც წაგიკითხავთ ასეთი კომენტარი?
- რა თქმა უნდა. ერთს ეწერა, ფუუ, ვერ ვიტან ეკა ნიჟარაძესო. ამით რა მოხდა, ეს რომ დაწერა? თუ ვერ იტან, საერთოდ ნუ დაწერ. ეს ბოროტებაა და მგონი, ამას ჯობია, წიგნი წაიკითხონ და სიკეთე შემატონ საკუთარ თავს.
- ოჯახის წევრებიც კრიტიკულები არიან?
- თუ არ მოსწონთ, მეუბნებიან, რადგან იციან, რომ კრიტიკას ჯანმრთელად ვიღებ. შვილები ერთ-ერთი პირველები იყვნენ, რომლებმაც მითხრეს, უნდა იცეკვოო. ახლა ცოტა დამეჩაგრნენ. დილით გავდივარ სახლიდან და ღამე მოვდივარ. ვერც მეგობრებს ვნახულობ. მთლიანად ამ პროექტით ვცხოვრობ.
- მალე ბებია გახდები. ეს ამბავი როდის მოხდება?
- თებერვლის დასაწყისში ტასო დედა გახდება.
- როგორც მახსოვს, ტასო მეუღლესთან დაშორებული იყო.
- ტასო და კოტე თაყაიშვილი ერთი წელია, შერიგდნენ.
- მახსოვს, მათი დაშორების გამო გულნატკენი იყავი.
- ძალიან მეწყინა, რომ დაშორდნენ ერთმანეთს და ახლა ძალიან გახარებული ვარ მათი ბედნიერებით.
- გოგოს ელოდებით თუ ბიჭს?
- გოგოს. რომ გაიზრდება, აუცილებლად ვასწავლი სამეჯლისო ცეკვებს.
- ეკას დაარქმევენ?
- არ მგონია. ჯერ არ ვიცით, მე არ მინდა, ეკა რომ დაარქვან.
- ჯეჯისა და ნოდარს მოუნდათ ცეკვა?
- არანაირად. ჯეჯიმ წელს ჩააბარა თეატრალურ ინსტიტუტში. მომავალი მსახიობია და აუცილებლად მოუწევს ცეკვასთან შეხება, მაგრამ არა სამეჯლისო ცეკვებთან. თუ ოდესმე დიდი ვარსკვლავი გახდება და ეს პროექტი კიდევ იარსებებს, მერე შეიძლება, მოიწვიონ.
- როგორ ფიქრობ, ვინ იმსახურებს და ვინ შეიძლება, გახდეს გამარჯვებული?
- ეს ძალიან არაპროგნოზირებადია, როგორც მივხვდი, შეცდომის გამო ბოლოდან მეორე ადგილზე აღმოვჩნდი ქულებით. ბოლო ტურში კი მესამეზე ვიყავი. რუსკა არაჩვეულებრივია და დამსახურებულად მიიღო ქულები, რატი წითელაძე და ანი ჯაჯანიძეც შესანიშნავად ცეკვავენ, რატი ძალიან ბევრს მუშაობს და შედეგიც სახეზეა. შეიძლება, ჯვარი მწერია და, ისევ გადავინაცვლო ბოლო ადგილას. ბევრს ვმუშაობთ, მაგრამ რა მოხდება, არავინ იცის.
- ამ პროექტმა მოგცა იმის სტიმული, რომ ჯანსაღი ცხოვრების წესით დაგეწყო ცხოვრება?
- სამწუხაროდ, ვერ გავაკეთე ის, რაც ჩავიფიქრე. გადაწყვეტილი მქონდა, ვარჯიშს რომ დავიწყებდი, სიგარეტის მოწევას თავს დავანებებდი. სამწუხაროდ, ახლაც ვზივარ და ვეწევი.
- როგორ ფიქრობ, რომელ ტურამდე მიხვალთ?
- მოგება ყველას გვინდა, თუმცა სიმართლე რომ გითხრათ, არ მოველოდი, ამ ეტაპამდე თუ მივიდოდი.
- ალბათ ასაკს არ გულისხმობ. გივი სიხარულიძე ყველა თქვენგანისთვის ალბათ მაგალითის მომცემია.
- რა თქმა უნდა. ბატონი გივი არის იმის მაგალითი, რომ ადამიანს ძალიან დიდი შესაძლებლობები აქვს ნებისმიერ ასაკში. მთავარია, მოინდომო.
- წარმომიდგენია, თქვენი რეპეტიციები როგორ მიდის. ალბათ ბატონი გივი ლექსებით გახალისებთ...
- ჩვენ ერთად გვაქვს რეპეტიციები. ლექსებით გვამხნევებს ხოლმე, მაგრამ ძირითადად ცეკვაზე ვართ გადართულები. პოეზიის საღამოებს ჯერ არ ვაწყობთ, ვცეკვავთ.
მერი კობიაშვილი
(გამოდის ორშაბათობით)
