1
მაისიდღის ზოგადი ასტროლოგიური პროგნოზი
იმას, რომ მიხეილ სააკაშვილი ერთი წლის მანძილზე სიტყვებს "ბიძინა ივანიშვილი" და "ქართული ოცნება" არ ახსენებდა, ფსიქოლოგები თავისებურად ხსნიდნენ - როდესაც ადამიანს დიდი პრობლემა აქვს, ერთგვარი თავდაცვის მექანიზმია - პრობლემაზე არ უნდა ისაუბრო, თითქოს ის არც არსებობსო.
პრეზიდენტმა "დუმილის აღქმა" 2012 წლის 2 ოქტომბერს დაარღვია, როდესაც არჩევნებში "ნაციონალური მოძრაობის" მარცხი აღიარა და პირველად ახსენა "ქართული ოცნება". ბიძინა ივანიშვილმა კი მას ავლაბრის რეზიდენციაში მიაკითხა, სადაც მხარეებმა დიდი ზავი გააფორმეს.
სააკაშვილი ბოკერია, უგულავა, ბაქრაძესთან ერთად ივანიშვილს სასახლის შესასვლელთან დახვდა. "ქართული ოცნების" ლიდერს მხარს სუბარი, ღარიბაშვილი, უსუფაშვილი და ალასანია უმშვენებდნენ. ვიხილეთ სააკაშვილ-ივანიშვილის "ისტორიული" ხელის ჩამორთმევა, რომლის დროსაც ისინი ცდილობდნენ, ერთმანეთისთვის არ შეეხედათ.
აი, ის ეპიზოდი კი, რომლის დროსაც სააკაშვილი და ივანიშვილი ერთმანეთის თანაგუნდელებს მიესალმნენ, ალბათ, ზოგიერთს საფეხბურთო მატჩს გაახსნებდა, როდესაც ფეხბურთელები თამაშის დაწყების წინ მეტოქეებს ხელს ართმევენ. თუ ისევ ფეხბურთთან გავავლებთ პარალელებს ალბათ, ავლაბრის შეხვედრა დიდ "ელ კლასიკოს" ჰგავდა, რომლის დროსაც ერთმანეთს მოსისხლე მტრები "ბარსელონა" და "რეალი" ხვდებიან ხოლმე.
რეალურად რაზე ისაუბრეს სააკაშვილმა და ივანიშვილმა უცნობია. თუმცა საუბარი მსუბუქი რომ არ ყოფილა, ამაზე მათი სახეების გამომეტყველებაც მიუთითებდა. შესაბამისად, ისინი რთული "გამოცდის" წინაშე იყვნენ - პრესისთვის განცხადებები ისე გაეკეთებინათ, რომ ერთმანეთის მიმართ "ნეიტრალურები" დარჩენილიყვნენ.
თუმცა დახურულ კარს მიღმა გამართული მძიმე საუბარი ერთგვარად მიკროფონებთანაც გაგრძელდა. მაგალითად, ივანიშვილმა განაცხადა, რომ ოპონენტებს მოექცევიან არა ისე, როგორც იმსახურებენ, არამედ ისე, როგორც იმსახურებს ქვეყანა და ქართველი ხალხი. სხვათა შორის, "ნაციონალების" მომხრეებმა უფრო მტკივნეულად აღიქვეს ივანიშვილის ნათქვამი - სააკაშვილს შევუქე ის განცხადება, არჩევნების შემდეგ რომ გააკეთაო. "ნაციონალების" მხარდამჭერების აზრით, "ქართული ოცნების" ლიდერმა პრეზიდენტი ცელქ, პატარა ბიჭად გამოიყვანა.
სახეზე და ინტონაციაზე გაბრაზება მიხეილ სააკაშვილსაც შეეტყო. მან "ქართული ოცნების" ლიდერს სამაგიეროც გადაუხადა, როდესაც განაცხადა - ძალიან ბევრ ეროვნულ საკითხზეა ჩვენს შორის განხვავებაო. ეს "ქართული ოცნების" მომხრეებმა ივანიშვილის ანტიეროვნულობაზე მინიშნებად აღიქვეს. თუმცა ისიც უნდა აღინიშნოს, რომ სააკაშვილი თავის მთავარ ოპონენტზე საუბრისას ასე დიპლომატიური არასოდეს ყოფილა.
განცხადებების შემდეგ პრეზიდენტმა და მომავალმა პრემიერმა "სასწრაფოდ" ერთმანეთს კიდევ ერთხელ ჩამოართვეს ხელი და დაადასტურეს ავლაბრის ზავის გაფორმება. ვნახოთ, რამდენ ხანს გაგრძელდება ეს "სამშვიდობო ხელშეკრულება".
გიორგი კვიტაშვილი
