1
მაისიდღის ზოგადი ასტროლოგიური პროგნოზი
მსახიობმა ჯორჯ კლუნიმ ჟურნალ Hollywood Reporter-სთვის მიცემულ ინტერვიუში აღიარა, რომ თავს მარტოსულად გრძნობს. ეს განცხადება ყველასთვის მოულოდნელი იყო, რადგანაც ჰოლივუდში ის ერთ-ერთ ყველაზე სასურველ მამაკაცთა სიაშია.
50 წლის მსახიობმა აღიარა, რომ ის მარტოობამ და უძილობით გამოწვეულმა პრობლემებმა დაღალა. ინტერვიუში ვარსკვლავმა განაცხადა, რომ უძილობას ტელევიზორის ყურებით ებრძვის. "როდესაც ტელევიზორს არ ვუყურებ, ფიქრს ვიწყებ და ეს მაგიჟებს. შეკითხვები არ დამიწყოთ - ყოველ ღამე ხუთჯერ ვდგები ლოგინიდან", - განაცხადა მან.
მსახიობი მიიჩნევს, რომ ყველა ადამიანი იტანჯება მარტოობით. "დამიჯერეთ, ყველა მათგანი იტყუება, ვინც გიმტკიცებთ, რომ არასდროს უგრძვნია თავი მარტოსულად. რასაკვირველია, ვერსად ვემალები პაპარაცებს. ჩემი პირადი ცხოვრება მუდამ საჯაროდ განიხილება", - განაცხადა მსახიობმა.
ინტერვიუში მან აღიარა, რომ ხშირად ღალატის მსხვერპლიც ყოფილა. ცნობილია, რომ ვარსკვლავის ყველა სასიყვარულო რომანი იმიტომ დასრულდა, რომ მას ვალდებულებების ეშინია. "ერთხელ ბრედ პიტს ჰკითხეს, როდის დაქორწინდებოდა ანჯელინაზე, მან კი უპასუხა, ეს მაშინ მოხდება, როცა ჯორჯი დაქორწინდებაო", - ღიმილით იხსენებს მსახიობი. (ჯორჯი და ბრედ პიტი ახლო მეგობრები არიან).
შეკითხვაზე, ყოფილა თუ არა ალკოჰოლური სასმელის მომხმარებელი, მსახიობმა განაცხადა, რომ ეს დრო წარსულს ჩაბარდა და ახალი წლის დღესასწაულის შემდეგ, აღარ დაულევია. "იყო დრო, როდესაც სასმელი ჩემთვის ბედნიერების გარანტი იყო. ღვინოს მაშინაც კი ვსვამდი, როდესაც ამის მიზეზი არ მქონდა. ბედნიერი ვარ, ეს პრობლემა დავამარცხე", - განაცხადა მსახიობმა.
მსახიობს ჯანმრთელობის სერიოზული პრობლემები ქონდა. 2005 წელს, როდესაც ფილმზე "სირიანა" მუშაობდა, მას ხერხემლის საშინელი ტკივილები დაეწყო. მას ზურგის ტვინის გაჟონვის დიაგნოზი დაუსვეს. ტკივილი იმდენად აუტანელი იყო, რომ ვარსკვლავი თვითმკვლელობაზეც ფიქრობდა. "ეს საშინელება იყო! ისეთი შეგრძნება მქონდა, თითქოს დამბლა დამეცა. მეგონა მატარებელმა გადამიარა, ვერ ვმოძრაობდი, ვერ ვხედავდი", - იხსენებს მსახიობი. 9 საათიანი ოპერაციის შემდეგ, ის ცხოვრების ჩვეულ რიტმს თანდათან დაუბრუნდა. მსახიობს ტკივილები დღესაც აწუხებს.
კლუნი ამჟამად მსახიობ სტეისი კეიბლერს ხვდება.
მომზადებულია dailymail.co.uk- ის მიხედვით.
