სტამბოლი მასშტაბურმა პროტესტმა მოიცვა: სტუდენტები დაკავებული მერის გათავისუფლებას მოითხოვენ - ქვეყანაში დაჭერების მორიგი ტალღა დაიწყო
მას შემდეგ, რაც თურქეთის პოლიციამ სტამბოლის მერი - ექრემ იმამოღლუ დააკავა, ქვეყნის რამდენიმე ქალაქში მასობრივი დემონსტრაციები გაიმართა. დაკავებული იმამოღლუ თურქეთის ლიდერის რეჯეფ თაიფ ერდოღანის მთავარ კონკურენტად მიიჩნევა და მომავალ საპრეზიდენტო არჩევნებში გეგმავდა მონაწილეობას.
აქციის მონაწილე დაკავებული ექრემ იმამოღლუს პლაკატით
მიუხედავად იმისა, რომ სტამბოლის გუბერნატორმა საგანგებო მდგომარეობა გამოაცხადა და მომდევნო ოთხი დღის განმავლობაში დემონსტრაციები აკრძალა, მოსახლეობა შეზღუდვას არ დაემორჩილა.
პოლიციამ ალყა შემოარტყა მერიას, გადაკეტა რამდენიმე გზა და ცენტრალური მოედანი. მომიტინგეები შეიკრიბნენ ქალაქის რამდენიმე ლოკაციაზე და მათ შორის, პოლიციის იმ განყოფილების წინ, სადაც იმამოღლუა დაკავებული.
“რაც მოხდა გადატრიალების მცდელობა იყო. ეკრემ იმამოღლუს ვერ წაართმევენ უფლებას, იყოს პრეზიდენტობის კანდიდატი, სინამდვილეში ერს ართმევენ არჩევანის თავისუფლებას“, - განაცხადა რესპუბლიკური სახალხო პარტიის ლიდერმა ოზგურ ოზელმა მერიის წინ შეკრებილთა წინაშე სიტყვით გამოსვლისას.
მერის მეუღლემ, დილეკ იმამოღლუმ მის დაკავებას უწოდა "მიზანმიმართული პოლიტიკური ოპერაცია, რომელიც მიზნად ისახავს თურქეთის მომავალი პრეზიდენტის ლიკვიდაციას".
“ეს არის პირდაპირი დარტყმა ერისთვის და ჩვენ ვიბრძოლებთ“, - განაცხადა მან.
გავრცელდა ინფორმაცია შეტაკების შესახებ. მედიის ინფორმაციით, სტამბულის უნივერსიტეტის ტერიტორიაზე სტუდენტების დასაშლელად, პოლიციამ სპეციალური საშუალებები, მათ შორის წიწაკის სპრეი გამოიყენა. სტუდენტები აპროტესტებენ იმამოღლუსთვის დიპლომის გაუქმებასაც.
უმაღლესი განათლების დიპლომი პოლიტიკოსის დაკავებამდე ცოტა ხნით ადრე გაუუქმეს - მისი არქონა იმამოღლუს საპრეზიდენტო კანდიდატად ოფიციალურად კენჭისყრის საშუალებას არ აძლევს.
იმოღლუ ეჭვმიტანილია კორუფციასა და ტერორისტულ ორგანიზაციებთან კავშირში. გავრცელებული ინფორმაციით, გამოძიების ფარგლებში 100-მდე პირი, მათ შორის პოლიტიკოსები, ჟურნალისტები და ბიზნესმენები დააკავეს.
იმამოღლუს დაკავების შემდეგ მის სოციალურ ქსელში გამოჩნდა განცხადება.
ეკრემ იმამოღლუ
“ხალხის ნება არ შეიძლება დაითრგუნოს დაშინებით ან უკანონო ქმედებებით. მე მტკიცედ ვდგავარ და ვენდობი არა მხოლოდ სტამბოლის 16 მილიონ ადამიანს, არამედ თურქეთის 86 მილიონ მოქალაქეს და ყველას, ვინც მხარს უჭერს დემოკრატიას და სამართლიანობას მთელ მსოფლიოში“, - ნათქვამია განცხადებაში.
თურქეთის იუსტიციის მინისტრმა ილმაზ თუნჩმა გააკრიტიკა ისინი, ვინც თვლის, რომ სტამბოლის მერი პოლიტიკური დევნის მსხვერპლია. მისი თქმით, თურქეთში არავინ დგას კანონზე მაღლა.
კვირას მასშტაბური საპროტესტო აქციები იგეგმება მთელი ქვეყნის მასშტაბით.
