"პუტინის დამქაშები მაბრალებენ საქართველოს შიდა საქმეებში ჩარევას და "მაიდანი 2"-ის პროვოცირებას, ეს სიცრუეა" - როთი

პუტინის დამქაშები მუდმივად მაბრალებენ საქართველოს შიდა საქმეებში უხეშად ჩარევას, ქუჩაში გამოსული ქართველები საკუთარი თავისუფალი და სუვერენული ნებით მოქმედებენ, - ამის შესახებ გერმანიის პარლამენტის (ბუნდესტაგის) საგარეო ურთიერთობათა კომიტეტის თავმჯდომარე, მიხაილ როთი X-ის საკუთარ გვერდზე წერს.

"პუტინის დამქაშები მუდმივად მაბრალებენ საქართველოს შიდა საქმეებში უხეშად ჩარევას და „მაიდანი 2“-ის პროვოცირებას. ეს სიცრუეა და სამართლიანი არაა საქართველოსა და უკრაინის თავისუფლების მოყვარე ხალხთან მიმართებაში.

ევროკავშირსა და ნატოში წევრობისთვის მუშაობას კონსტიტუციური სტატუსი აქვს საქართველოში. ეს ყოველი მთავრობისა და ყოველი საპარლამენტო უმრავლესობის ვალდებულებაა. ქვეყანა უკვეა ევროკავშირის კანდიდატი და ნატოში წევრობა ჰორიზონტზეა. რამდენიმე პირობა უნდა დაკმაყოფილდეს.

განცხადებები, თითქოს მაიდანი უცხოურმა ძალებმა (CIA, ევროკავშირი, მარსიანელები) მოიტანეს, კრემლის საშინელი პროპაგანდაა და გამეორებით სიმართლე არ ხდება. პრო-ევროპელმა უკრაინელებმა პრო-რუსული რეჟიმი საკუთარი ნებითა და ძალით ჩამოაგდეს.

ასევე არ სჭირდებათ ჩემი წინამძღოლობა ქართველებს, რომლებიც ქუჩებში როგორც კონსტიტუციონალური პატრიოტები გამოვიდნენ. ისინი საკუთარი თავისუფალი, სუვერენული ნებით მოქმედებენ და ჩემთვის პატივია მათი წახალისება ევროპული ღირებულებებისთვის მათ ბრძოლაში ძალადობრივი რეჟიმის წინააღმდეგ,“ - წერს როთი.

წაიკითხეთ ასევე:

• "გუშინ ყველა კიდევ ერთხელ დარწმუნდა, რომ საქართველოში "ნაცმაიდანი" ვერ შედგება" - პრემიერი