მექსიკიდან აშშ-ში მიგრაცია აიკრძალება? - დონალდ ტრამპი მექსიკის ახალ პრეზიდენტთან საუბრის დეტალებს ასაჯაროებს

დონალდ ტრამპმა მექსიკის პრეზიდენტთან სატელეფონო საუბრისას მიგრაციის საკითხი განიხილა. ინფორმაციას აშშ-ის არჩეული პრეზიდენტი, დონალდ ტრამპი ავრცელებს.

• “მექსიკის ახალ პრეზიდენტთან, კლაუდია შეინბაუმთან შესანიშნავი საუბარი მქონდა. ის მექსიკის გავლით ამერიკის შეერთებულ შტატებში მიგრაციის შეჩერებას დათანხმდა, ფაქტობრივად ჩვენი სამხრეთ საზღვრის დაკეტვას“, - წერს დონალდ ტრამპი საკუთარ Truth Social-ის პლატფორმაზე.

მექსიკის პრეზიდენტის, კლაუდია შეინბაუმის ცნობით, დონალდ ტრამპს მიგრაციასთან დაკავშირებით მექსიკის ყოვლისმომცველი სტრატეგია აუხსნა, რომელიც ადამიანის უფლებების დაცვას ითვალისწინებს.

“კიდევ ერთხელ ვიმეორებთ, რომ მექსიკის პოზიციას არა საზღვრების ჩაკეტვა, არამედ მთავრობებსა და ხალხებს შორის ხიდების აშენება წარმოადგენს“, - წერს მექსიკის პრეზიდენტი X-ის საკუთარ გვერდზე.

შეგახსენებთ, აშშ-ის არჩეულმა პრეზიდენტმა, დონალდ ტრამპმა განაცხადა, რომ მექსიკიდან და კანადიდან იმპორტირებულ ყველა პროდუქტზე 25%-იან ტარიფს დააწესებს, რომელიც ძალაში იქამდე დარჩება, სანამ აღნიშნული ქვეყნები აშშ-ში ნარკოტიკებისა და მიგრანტების უკანონოდ შესვლას არ შეზღუდავენ.

წყარო

იხილეთ ასევე:

• ტრამპის მუქარა - ის 25%-იანი ტარიფის დაწესებას გეგმავს მექსიკურ და კანადურ პროდუქტზე, ჩინეთიდან იმპორტირებულზე კი - 10%-იანს
• "ქორები" ტრამპის მომავალ ადმინისტრაციაში: რას უნდა ველოდოთ აშშ-ს საკვანძო თანამდებობებზე დასახელებული ადამიანებისგან: "რუსეთი უკმაყოფილოა წარმოდგენილი ფიგურებით"