15-თვიანი ორსულობის შედეგად "გაჩენილი" ჩვილი, გამოკეტილი ფეხმძიმე გოგონები და "სასწაულებრივი ნაყოფიერების" თაღლითური სქემა - რას მიაგნო ნიგერიაში BBC-მ
ნიგერიელი გოგონა ჩიომა დარწმუნებულია, რომ ჰოუპი, ბავშვი, რომელიც ხელში უჭირავს, მისი ვაჟიშვილია. 8 წლის უშედეგო მცდელობების შემდეგ, ის მას სასწაულით მოვლენილ ბავშვად მიიჩნევს.
ის თავის მეუღლესთან, აიკთან ერთად ნიგერიის სახელმწიფო მოხელის ოფისში ზის და კითხვებს პასუხობს. აიკის ოჯახის ხუთ წევრს, რომლებიც ასევე ოთახში იმყოფებიან, არ სჯერათ, რომ ჰოუპი წყვილის ბიოლოგიური შვილია.
- ჩიომა ამტკიცებს, რომ ბავშვი 15 თვის განმავლობაში "ატარა". კომისარი და აიკის ოჯახი ამ აბსურდულ განცხადებას არ იჯერებენ.
სასოწარკვეთის გამო მან მიაკითხა "კლინიკას", რომელიც არატრადიციულ "მკურნალობას" სთავაზობდა - ეს საშინელი თაღლითობა აღმოჩნდა, რომელიც დედობაზე მეოცნებე ქალების უიმედობით სარგებლობს და ბავშვებით ვაჭრობას მოიცავს.
ნიგერია მსოფლიოში ერთ-ერთი ყველაზე მაღალი შობადობის მაჩვენებელი აქვს. ქვეყანაში ქალები წნეხს განიცდიან და თუ ბავშვის ჩასახვა არ ხდება, შესაძლოა, ისინი გარიყონ ან მათზე იძალადონ.
ე.წ. "კრიპტული ორსულობის" თაღლითობას BBC ერთი წლის განმავლობაში იძიებდა.
ნიგერიაში თაღლითები, რომლებიც თავს ექიმებად ან ექთნებად ასაღებენ, ქალებს არწმუნებენ, რომ "ნაყოფიერების სასწაულებრივი მკურნალობა" შეუძლიათ, რომელიც დაორსულებას გარანტირებულად უზრუნველყოფს. საწყისი "მკურნალობა" ჩვეულებრივ, ასობით დოლარი ღირს და სასქესო ორგანოში ინექციას, სასმლისა ან ნივთიერების შეყვანას მოიცავს.
- კონკრეტულად რა არის ამ წამლებში, არც ერთმა ქალმა არ იცის, რომელთაც BBC ესაუბრა. მაგრამ რამდენიმე ქალმა აღნიშნა, რომ “მკურნალობამ” მათ სხეულში ცვლილება გამოიწვია - მაგალითად, მუცლის შეშუპება - რამაც ისინი კიდევ უფრო მეტად დაარწმუნა, რომ ორსულად იყვნენ.
ქალებს აფრთხილებენ, არ მიმართონ ტრადიციულ ექიმებს ან საავადმყოფოებს, რადგან ვერც ერთი სკანირება თუ ორსულობის ტესტი ვერ აღმოაჩენს "ბავშვს", რომელიც, თაღლითების მტკიცებით, საშვილოსნოს გარეთ იზრდება.
როდესაც ბავშვის "გაჩენის" დრო მოდის, ქალებს ეუბნებიან, რომ მშობიარობა მხოლოდ მაშინ დაიწყება, როდესაც ისინი "იშვიათ და ძვირ წამალს" მიიღებენ, რაც ფულის კიდევ ერთხელ გადახდას გულისხმობს. "მშობიარობა" სხვადასხვანაირად ხდება, მაგრამ ყოველი მათგანი შემაწუხებელია. ზოგს აძინებენ და საკეისრო კვეთის მსგავსი ნაიარევით იღვიძებენ. ზოგს ისეთ ინექციას უკეთებენ, რომელიც ჰალუცინაციურ მდგომარეობას იწვევს, რომლის დროსაც მათ სჯერათ, რომ ბავშვს აჩენენ. ყველა შემთხვევაში, ქალებს იმ ბავშვებს აძლევენ, რომლებიც მათ “უნდა გაეჩინათ”.
-
BBC-ის გუნდმა ერთ-ერთ ასეთ საიდუმლო "კლინიკაში" შეღწევა - "ექიმ რუთთან" დაკავშირება ისეთი წყვილის სახელით მოახერხა, რომელიც ბავშვის ყოლას უკვე წლებია ცდილობს.
როდესაც BBC-ის გადაცმული რეპორტიორები “ექიმ რუთს” ხვდებიან, ის მათ ეუბნება, რომ გარანტიას იძლევა, რომ მკურნალობა იმუშავებს. "ექიმი" ქალს ინექციას სთავაზობს და აღნიშნავს, რომ ის წყვილს საშუალებას მისცემს, ბავშვის სქესი აარჩიონ - ეს კი სამედიცინოდ შეუძლებელია.
მას შემდეგ, რაც წყვილი ინექციაზე უარს ამბობს, “ექიმი რუთი” მათ აბებს სახლში ატანს და ინსტრუქციებს აძლევს იმასთან დაკავშირებით, თუ როდის ჰქონდეთ სექსუალური ურთიერთობა.
ეს თავდაპირველი “მკურნალობა” 350,000 ნაირა ($205) ჯდება.
BBC-ის რეპორტიორები არც ინექციას იკეთებენ და არც აბებს სვამენ, თუმცა 4 კვირის შემდეგ “ექიმის” სანახავად ბრუნდებიან. მას შემდეგ, რაც “ექიმი რუთი” ექოსკოპიის სკანერის მსგავსი მანქანით ქალის მუცელს ამოწმებს, ის აცხადებს, რომ ქალი ორსულადაა. მისი თქმით, წყვილს ბავშვის გასაჩენად "იშვიათი" და ძვირადღირებული წამლის შეძენა დასჭირდება, რომელიც 1.5-დან 2 მილიონ ნაირამდე ($1,180) ღირს.
“ექიმი რუთის” თქმით, ამ წამლის გარეშე ორსულობა 9 თვეზე მეტ ხანს გაგრძელდება.
ოფიციალური პირების თანახმად, "მკურნალობის" დასასრულებლად თაღლითებს ახალშობილი ჩვილები სჭირდებათ, ამის გამო ისინი ისეთ ქალებს ეძებენ, რომლებიც სასოწარკვეთილები და დაუცველები, ხშირ შემთხვევაში, ახალგაზრდები და ორსულები არიან. ქვეყანაში აბორტი აკრძალულია.
2024 წლის თებერვალში, სახელმწიფო ჯანდაცვის სამინისტრომ ის დაწესებულება გაჩხრიკა, რომელშიც ჩიომამ ჰოუპი "გააჩინა". BBC-იმ რეიდის ვიდეომასალა მოიპოვა, რომელშიც უზარმაზარი ორ შენობიანი კომპლექსი ჩანს. ერთ მათგანში იყო ოთახები, სადაც სამედიცინო აღჭურვილობა ინახებოდა, როგორც ჩანს, კლიენტებისთვის, ხოლო მეორეში არაერთი ორსული ქალი, მათი ნების საწინააღმდეგოდ ჰყავდათ გამოკეტილი. მათგან რამდენიმე ძალიან ახალგაზრდა - 17 წლის იყო. ზოგიერთ წყაროს ინფორმაციით, ისინი იქ შეიტყუეს და არ იცოდნენ, რომ მათ ბავშვებს თაღლითები გაყიდდნენ.