“ბატონი ზვიადი და ბატონი ლაგაზაური მართლა გმირები არიან... მინდა მათ მადლობა ვუთხრა“ - შს მინისტრი სანქცირებულ ძალოვნებზე
შინაგან საქმეთა მინისტრი ვახტანგ გომელაური სიცრუეს უწოდებს ინფორმაციას იმის თაობაზე, თითქოს უწყება სარჩევნო უბნებზე პოლიციის დანაყოფებს სპეციალურად გზავნის და მათ არჩევნებს “აბარებს“.
როგორც გომელაურმა ჟურნალისტებს განუცხადა, ყველა საარჩევნო უბანზე ნაწილდება პოლიციის დანაყოფი, რადგან “ძალიან ბევრი უბანია და მარტო კრიმინალური პოლიცია და საპატრულო არ ჰყოფნის“.
“არ შეიძლება ამდენი სიცრუის ტირაჟირება. ყველა საარჩევნო უბანზე ნაწილდება პოლიციის დანაყოფი, მათ შორის განსაკუთრებულ დავალებათა დეპარტამენტის, დაცვის პოლიციის თანამშრომლებიც. ძალიან ბევრი უბანია და მარტო კრიმინალური პოლიცია და საპატრულო არ ჰყოფნის. აქედან გამომდინარე, ჯგუფი კეთდება, ეს თელავი იქნება თუ ზუგდიდი. შედის კრიმპოლის, პატრულის, გდდ-ის რამდენიმე თანამშრომელი, ასევე დაცვის პოლიციის თანამშრომლები. კეთდება ჯგუფი და მუშაობენ. ხელმძღვანელი ჰყავს რეგიონს და მუშაობენ. ეს არის სიცრუე, რასაც სამწუხაროდ, თქვენი ტელევიზიები ავრცელებთ“, - მიმართა გომელაურმა ჟურნალისტს.
მან უწყების ყველა თანამშრომელს, მათ შორის შსს-ის განსაკუთრებულ დავალებათა დეპარტამენტის დირექტორს, ზვიად ხარაზიშვილს მადლობა გადაუხადა.
“რაც შეხება მადლობის თქმას, მინდა შსს-ის ყველა თანამშრომელს მადლობა ვუთხრა. დღეს ვართ განსაკუთრებულ დავალებათა დეპარტამენტის სპეცდანიშნულების ბაზაზე და მინდა მათ ვუთხრა მადლობა, ზუსტად ბატონ ზვიადს თავის ქვეყნისთვის, რაც გაუკეთებია და ამ ადამიანებს. ეს ადამიანები ყოველთვის თავის სამშობლოს იცავენ. ომი იყო, ომშიც მონაწილეობდნენ, ყველაფერს თავისი ქვეყნისთვის აკეთებენ. მართლა გმირები არიან ბატონი ზვიადიც და ბატონი ლაგაზაურიც“, - განაცხადა გომელაურმა.
ცნობისთვის, აშშ-მა ადამიანის უფლებების სერიოზული დარღვევისთვის ქართველი ოფიციალური პირები და ექსტრემისტები 16 სექტემბერს დაასანქცირა. კერძოდ, აშშ-ის სახაზინო დეპარტამენტმა მშვიდობიანი დემონსტრანტებისა და პოლიტიკური ოპონენტების ძალადობრივ დარბევასთან დაკავშირებით საქართველოს მთავრობის ორ ოფიციალურ პირსა და ორ კერძო პირს სანქციები დაუწესა. აშშ-ის სახაზინო დეპარტამენტის მიერ დასანქცირდნენ განსაკუთრებულ დავალებათა დეპარტამენტის ხელმძღვანელი, ზვიად ხარაზიშვილი, იგივე "ხარება" და მისი მოადგილე მილერი ლაგაზაური, „ალტ-ინფოს“ დამფუძნებელი კონსტანტინე მორგოშია და ზურაბ მახარაძე.