ჯასტინ ბიბერი ბავშვობაში ძალადობის მსხვერპლი იყო? - რეპერ P Diddy-ს სკანდალური საქმე: სექს ტრეფიკინგი, ნარკოტიკები და ძალადობა: რა კადრები ვრცელდება მედიაში
რამდენიმე დღის წინ ცნობილი რეპერი P Diddy სექს ტრეფიკინგის ბრალდებით დააკავეს. სკანდალურ საქმეს არაერთი ადამიანი, მათ შორის ცნობილი სავარაუდო მსხვერპლი ჰყავს. ნიუ იორკის სასამართლოს დოკუმენტების მიხედვით, რეპერს ბრალად ედება წლების განმავლობაში ადამიანებზე ძალადობა, შანტაჟი და ძალადობის გზით მსხვერპლთა შანტაჟი.
მას ასევე ბრალად ედება როგორც ქალი, ასევე მამაკაცი სექს-მუშაკების ჩაბმა სექსუალურ წარმოდგენებში, სადაც უხვად იყო ნარკოტიკები.
- მედია წერს, რომ აღნიშნული საქმის გახმაურების შემდეგ, განსაკუთრებით რთულია ჯასტინ ბიბერის ფსიქიკური მდგომარეობა. ის საკუთარ თავში "ჩაიკეტა".
ვრცელდება ინფორმაცია, რომ წარსულში, როცა ჯასტინი ჯერ კიდევ ბავშვი იყო, რეპერის ერთ-ერთი მსხვერპლი გახდა (ეს ინფორმაცია დადასტურებული არ არის) თუმცა ამავდროულად, ისიც აღსანიშნავია, რომ P Diddy-მ და ჯასტინმა დაახლოებით წელიწადნახევრის წინ ითანამშრომლეს.
- როგორც წყარო "დეილი მეილთან" ამბობს, ჯასტინი ძალიან ნანობს ამ თანამშრომლობას და რომ სცოდნოდა, რა საქმეებში იყო გახვეული P Diddy, მასთან საქმეს არ დაიჭერდა.
"ჯასტინს დიდისთან ურთიერთობაში ხანგრძლივი პაუზა ჰქონდა. სავარაუდოდ, სწორედ ამ პერიოდში იყო დაკავებული დიდი იმ საქმეებით, რის გამოც ახლა დააკავეს. მან რეპეთან დისტანცია დაიჭირა. მოგვიანებით კი P Diddy-ის უახლესი ალბომისთვის ითანამშრომლეს, რამე რომ სცოდნოდა, ამას არ გააკეთებდა", - ამბობს წყარო.
როდესაც ბიბერისა და P Diddy-ს ურთიერთობა დაიწყო, ჯასტინი ბავშვი იყო. გასული წლის ოქტომბერში, მან რეპერთან პირველი შეხვედრა გაიხსენა:
"მახსოვს, როგორ მივედი ჩემი ძმის, დიდის ოფისში, რომ მემღერა სიმღერა. დაახლოებით 14 წლის ვიყავი. სამწუხაროდ, სიმღერა ნაგავი იყო და მისგან მკაცრი უარი იქნებოდა. რამდენიმე წლის შემდეგ მთხოვა, თუ შევძლებდი რაიმე freestyle-ის გაკეთებას მისი მომავალი ალბომისთვის. გასაოცრად შეიკრა წრე, მიყვარხარ დიდი", - წერდა ბიბერი "ინსტაგრამზე".
ეჭვები იმის შესახებ, რომ ბიბერიც P Diddy-სგან ძალადობის მსხვერპლია, მას შემდეგ გაჩნდა, რაც წლების წინ გადაღებული ვიდეო გავრცელდა. ვიდეოში ჩანს რეპერი 15 წლის ჯასტინის გვერდით და კამერაში ამბობს: "ის დიდისთან 48 საათს გაატარებს, რას ვაკეთებთ, ამას ვერ გავამჟღავნებთ. მაგრამ ეს ყველაფერი ნამდვილად 15 წლის ბიჭის ოცნებაა."
ჰიპ-ჰოპის ვარსკვლავმა დაამატა: "მომდევნო 48 საათის განმავლობაში ის ჩემთანაა და თავიდან ბოლომდე გავიგიჟებთ თავს."
ბიბერი იღიმის და თან მცირე კომენტარებს აკეთებს, როგორიცაა "კი" და "ბოლომდე ვიგიჟებთ".
- ვიდეო სოციალურ მედიაში გამოქვეყნდა და კრიტიკისა და შეშფოთების ტალღა მოჰყვა:
კიდევ ერთ კადრში ჩანს რეპერი, რომელიც 16 წლის ბიბერს ეკითხება, თუ რატომ აღარ ელაპარაკებოდა მას ჯასტინი ისე ხშირად.
"რა ხდება, ხომ კარგად ხარ? განსხვავებულად მოქცევა დაიწყე, ხომ? აღარ მირეკავ და ჩემთან ერთად დროს აღარ ატარებ ისე, როგორც ადრე ვატარებდით", - მიმართავს რეპერი ბიბერს, ეს უკანასკნელი კი პასუხის გაცემის დროს აღელვებული და შეშფოთებული ჩანს.
P Diddy ბრალს არ აღიარებს, პროკურორებმა განაცხადეს, რომ მათ გამოკითხეს 50-ზე მეტი სავარაუდო მსხვერპლი და მოწმე და ელოდებიან, რომ ეს რიცხვი გაიზრდება.
- რაც შეეხება ჯასტინ ბიბერს, აღსანიშნავია, რომ სოციალურ ქსელში აქტიურად აზიარებენ ჯასტინის ძველ ფოტოებსა და ვიდეოებს, სადაც მაშინ არასრულწლოვან ვარსკვლავს როგორც ასაკით უფროსი ქალები, ასევე - მამაკაცები გადამეტებულად ეხებიან ფიზიკურად - მათ შორისაა კოცნა, ჩქმეტა, უკანალზე ხელის მოკიდება და ა.შ.
სოციალური ქსელის მომხმარებლები წერენ, რომ სამყარო მხოლოდ ახლა იაზრებს, რისი გადატანა მოუწია კანადელ მომღერალს, რომელიც 15 წლის ასაკში აღმოაჩინა შოუ ბიზნესის სამყარომ. ის ახლა 30 წლისაა, დაქორწინებულია ჰეილი ბალდვინზე და სულ ცოტა ხნის წინ ბიჭის, ჯეკ ბლუზის მამაც გახდა.
რაც შეეხება მედიაში გამოქვეყნებულ ინფორმაციებს, ის ამ თემაზე ოფიციალურ კომენტარს არ აკეთებს და როგორც წყარო ამბობს - "ძალიან განიცდის და არავისთან არ სურს კომუნიკაცია".