"კარგი ამბავი გვაქვს... ევროპაში გადატვირთულ ტურისტულ ადგილებს შორის არის ადგილი, სადაც მეტი ვიზიტორი სჭირდებათ" - რას წერს BBC საქართველოზე?
საქართველო BBC-ის იმ ქვეყნების ოთხეულში შევიდა, რომლებიც ტურისტებს აქტიურად ელიან. სტატიას ბრიტანული გამოცემა შემდეგი სათაურით აქვეყნებს: "ტურისტების ძიებაში: ოთხი ქვეყანა, რომელიც მოგზაურებს ფართოდ უღებს კარს".
- ჩამოთვლილ ოთხ ქვეყანას შორის შედის: გრენლანდია, მაროკო, სერბეთი და საქართველო. სტატიის მთავარ ფოტოდაც თბილისის ხედია გამოყენებული.
შესავალში ვკითხულობთ:
"ამ ზაფხულის პროტესტების შემდეგ, რომელიც გადაჭარბებულ ტურიზმს ეხებოდა, კარგი ამბავი გვაქვს. ევროპაში გადატვირთულ ტურისტულ ადგილებს შორის უამრავი ადგილია მსოფლიოს გარშემო, სადაც მეტი ვიზიტორი სჭირდებათ.
ვენეციაში წმინდა მარკოზის მოედანზე შესაძლოა ტურისტები უფრო მეტი იყვნენ, ვიდრე მტრედები, ბარსელონაში მათ მიმართ აგრესია გამძაფრებულია, ხოლო იტალიის Cinque Terre-ის კლდოვან ბილიკებზე შეიძლება, სუპერმარკეტის რიგის შეგრძნება გაგიჩნდეთ. თუმცა, ამ (და სხვა) ცხელი წერტილების მიღმა არსებობს ადგილები, რომლებიც კულტურული სიმდიდრით არ ჩამორჩებიან, მაგრამ არც ხალხით არიან გადატვირთულნი. მსოფლიოს გარშემო არის ქალაქები, რომლებიც ტურისტებს ელიან და მიმართულებები, სადაც მთელი დღის განმავლობაში ერთ ადამიანსაც კი ვერ შეხვდებით.
მიუხედავად იმისა, რომ ხშირად ვისმენთ, როგორ აზიანებს ტურიზმი დიდ კულტურულ მიმართულებებს, ნაკლებად განვითარებულ ქვეყნებს ტურიზმის მოტანილი ფული საჭირო ინფრასტრუქტურისა და საზოგადოებრივი სივრცეების აშენებაში ეხმარება. ეს სამუშაო ადგილებსა და ტრენინგების შესაძლებლობებს ქმნის, აძლევს ადგილობრივებს შესაძლებლობას, თავიანთი ქვეყნის კულტურა და ტრადიციები სიამაყით გაუზიარონ სტუმრებს. სწორად მართვის შემთხვევაში, ტურიზმი შეიძლება გამამდიდრებელი ეკონომიკური ნაკადი გახდეს, რომელიც ადამიანებს საერთო ღირებულებებისა და გამოცდილებების გარშემო გააერთიანებს. ამისთვის არ არის აუცილებელი იმ პრობლემების გამეორება, რაც ამ ზაფხულს ვნახეთ.
ეს ოთხი მიმართულება მხოლოდ მცირე ნაწილია იმ ქვეყნებისა, რომლებიც ტურიზმს ეკონომიკის განვითარების საშუალებად იყენებენ და სტუმრებს გაშლილი ხელებით ხვდებიან", - აღნიშნულია სტატიის დასაწყისში.
რაც შეეხება საქართველოს, მონაკვეთში აღწერილია ქვეყნის მდებარეობა და რამდენიმე მნიშვნელოვანი ობიექტი.
"საქართველოს, რომელიც თურქეთს, რუსეთსა და აზერბაიჯანს საზღვრავს და შავი ზღვის პირას იმყოფება, დიდი გეგმები აქვს, რომ ვიზიტისკენ ყველას უბიძგოს, დაწყებული შეზღუდული შესაძლებლობების მქონე ვიზიტორებიდან, დამოუკიდებელ მოგზაურებამდე და კრუიზის ტურისტებამდე, - ამ უკანასკნელთათვის ბათუმის, ქვეყნის მეორე ქალაქის პორტით. ქვეყნის ახალი 10-წლიანი განვითარების გეგმა მოიცავს ყველაფერს, საერთაშორისო განვითარებიდან, რათა ტურისტებმა დამოუკიდებლად შეძლონ გადაადგილება იმის მიუხედავად, იმყოფებიან თუ არა ქალაქებში, საჯარო ტრანსპორტისა და კრუიზის ნავმისადგომების გაუმჯობესებამდე.
"ტურიზმი საქართველოში შედარებით ახალია,“ - ამბობს ნატალი ფორდჰამი, Wild Frontiers-ის ტურისტული კომპანიის წარმომადგენელი, რომელიც უცნობ და ასე ვთქვათ, სათავგადასავლო მიმართულებებზე სპეციალიზდება, - „ეს ახალი კარიერული შესაძლებლობაა და ამის შედეგად მართლაც შესანიშნავ გიდებს ვხედავთ. ისინი ძალიან მონდომებული არიან, ამ საქმის ნაწილი იყვნენ, კარგად ლაპარაკობენ ინგლისურად და შეისწავლიან, როგორ მოერგონ სხვადასხვა ხალხს. ბევრი ჩვენი ვიზიტორი მათ უმეგობრრდება და დაბრუნების სურვილი აქვთ.“
როგორც ტურიზმის განვითარებად ქვეყანაში, შეიძლება ზოგიერთი რამ, რაც დასავლეთ ევროპაში გაქვთ – მაგალითად, განვითარებული გზების ქსელი – ჯერ კიდევ არ იყოს მზად. თუმცა, იმედია, რომ ტურიზმის შემოსავლები ამ ტიპის ინფრასტრუქტურულ ინიციატივებს წაახალისებს.
"თბილისი ჩემი საყვარელი დედაქალაქია მსოფლიოში,“ - ამბობს ფორდჰამი, - „მისი მომხიბლავი ქუჩებით, ნამდვილი ესთეტიკით, ძველი ციხესიმაგრის კედლებით, მუზეუმებით და სხვა ყველაფრით. კიდევ არის მღვიმის ქალაქები, საბჭოთა არქიტექტურა და ისტორია — სტალინი აქ დაიბადა — და ჩრდილოეთ და სამხრეთის მთები, იუნესკოს ეკლესიები და მონასტრები, საოცარი ღვინისა და სამზარეულოს სცენა. აქ იმდენია სანახავი, რომ ერთკვირიანი მოგზაურობა მაინც გჭირდებათ".