"არ მეგონა, იუმორით ჩაწერილი ვიდეო ასეთ განხილვას თუ გამოიწვევდა" - ულამაზესი ქართველი ქალი მონაკოდან, რომლის ვიდეოსაც ჩვენში დიდი რეზონანსი მოჰყვა: ვინ არის სოფია კოზმანაშვილი?
რამდენიმე დღის წინ, სოციალურ ქსელში გავრცელდა ვიდეო, რომელიც თავის გვერდზე ერთ-ერთმა ცნობილმა რუსმა ბლოგერმა ქალმა ატვირთა. ვიდეოში ვხედავთ, როგორ აჩერებს ბლოგერი ქუჩაში მიმავალ სასიამოვნოდ ჩაცმულ ქალს და კითხვებს უსვამს, თუ რომელი ბრენდის სამოსი აცვია, რა ღირს სამკაული, რომელსაც ატარებს.
რესპონდენტი ამბობს, რომ დიპლომატია საქართველოდან. ძვირადღირებული ბრენდებით შემოსილი ქართველი ქალის ვიდეოს განსხვავებული კომენტარები მოჰყვა. ქალი კი, რომელიც მონაკოს ქუჩაში გააჩერეს, სოფია კოზმანაშვილი აღმოჩნდა.
საკუთარ თავზე ბევრს არ საუბრობს, ასევე არ სურს პირად ცხოვრებაზე ლაპარაკი, თუმცა იმ გამოხმაურებაზე, რაც მის ვიდეოს სოციალურ ქსელში მოჰყვა, ambebi.ge-სთან გულახდილად ისაუბრა.
- სოფია, თქვენზე მოგვიყევით...
- მე ვარ სოფო კოზმანაშვილი, პროფესიით საერთაშორისო ურთიერთობების სპეციალისტი (დიპლომატი), დავამთავრე ივ. ჯავახიშვილის სახელობის თბილისის სახელმწიფო უნივერსიტეტი საერთაშორისო ურთიერთობების ფაკულტეტი. ცოტა ხანს ვმუშაობდი საგარეო საქმეთა სამინისტროში. სამოყვარულო დონეზე ასევე დაკავებული ვიყავი სამოდელო საქმიანობით. მოგზაურობა ყოველთვის იყო ჩემი ჰობი და აქედან გამომდინარე, რამდენიმე წელი ტურიზმის სფეროშიც ვმოღვაწეობდი, მქონდა ჩემი ტურისტული სააგენტო.
- რა რეაქცია გქონდათ, როდესაც სოციალურ ქსელში გავრცელდა ვიდეო, თავიდან ადამიანების დიდი ნაწილი ვერც მიხვდა, რომ ქართველი იყავით.
- ჩემთვის სრულიად მოულოდნელი იყო ის, რომ ჩემმა ვიდეომ ამხელა ყურადღება მიიქცია ქართული აუდიტორიის და განხილვის საგნად იქცა. ამ ზაფხულს ვისვენებდი მონაკოში, სადაც ერთ-ერთმა ბლოგერმა ქუჩაში სეირნობისას მოულოდნელად მთხოვა პასუხი რამდენიმე კითხვაზე. მე ამ ბლოგერის მიმდევარი არ ვარ, თუმცა იმდენად სახალისო კითხვები იყო, რომ მეც ასევე იუმორით მივუდექი მის თხოვნას და ვუპასუხე მის კითხვებს. ასევე, მინდა აღვნიშნო, რომ მითითებული ნივთები ჩემი ოჯახის მიერ არის შეძენილი. მე მყავდა ძალიან წარმატებული მამა. იგი წარმატებული იყო როგორც პროფესიულ, ასევე ბიზნესსაქმიანობაში.
- იყო განსხვავებული მოსაზრებები, საზოგადოების დიდმა ნაწილმა თქვენი გემოვნება დადებითად შეაფასა, თუმცა იყო უარყოფითი კომენტარებიც
- სიმართლე გითხრათ, მე არასოდეს ვაფასებ ნეგატიურად იმ ადამიანებს, ვისაც არ ვიცნობ, მითუმეტეს საჯაროდ. ამიტომ, ცოტა გამიკვირდა ამხელა ნეგატივი ჩემს მიმართ.
- როდესაც თქვენს სოციალურ ქსელს გადავხედე, ძალიან გემოვნებიანად იცვამთ, კარგად გამოიყურებით, როგორც ჩანს, გენეტიკაც ხელს გიწყობთ
- ჯანსაღი ცხოვრების წესით ვცხოვრობ, რეგულარულად ვვარჯიშობ, ვცურავ, არ ვეწევი, არ ვსვამ, ალბათ ეს არის რეცეპტი იმის, რომ კარგად გამოიყურებოდე.
- რამდენად ხშირად მოგზაურობთ, რომელია თქვენთვის ისეთი ქვეყანა, სადაც თავს განსაკუთრებულად გრძნობთ?
- მოგზაურობა ძალიან მიყვარს და ხშირად ვსტუმრობ სხვადასხვა ქვეყნებს. როგორც გითხარით, ჩემი ტურისტული კომპანიაც მქონდა წლების განმავლობაში. მსოფლიოს ბევრ ქვეყანაში ვარ ნამყოფი, ასევე მიცხოვრია ქვეყნის გარეთ, ავსტრალიაში გავატარე ბავშვობა, ვცხოვრობდი გერმანიაში, ავსტრიაში, დიდ ბრიტანეთში, თუმცა ვფიქრობ, რომ ჩემი ქვეყანა ყველაზე ლამაზია. საქართველოს გარდა ვერსად ვერ ვიცხოვრებდი ხანგრძლივად, ეს არის ჩემი სამშობლო, სადაც დავიბადე და გავიზარდე.
- პოლიტიკურ გემოვნებაზე გკითხავთ, ზოგი გაბრალებთ, რომ "ნაციონალურ მოძრაობასთან" ხართ დაახლოებული, ზოგიც - "ოცნების" მომხრეობას გაბრალებთ...
- ჩემი ვიდეოს პოლიტიკურ ჭრილში განხილვა ძალიან დამაბნეველი იყო ჩემთვის, რადგან ძალიან აპოლიტიკური ადამიანი ვარ. ჩემთვის მნიშვნელოვანია, რომ ჩემი ქვეყანა იყოს დამოუკიდებელი, განვითარებული და ევროპული ოჯახის განუყოფელი ნაწილი.
- სოფია, დასასრულ გკითხავთ, როგორ შეხვდით თუნდაც კრიტიკას, რომელიც თქვენი მისამართით წამოვიდა. ფოტოებზე რომ გიყურებთ, ძლიერი ქალი ხართ...
- რომ გითხრათ, რომ კრიტიკა ძალიან გამიხარდა, მოგატყუებთ. თუმცა, ისიც ვიცით, რომ ქართულ სოციალურ სივრცეში ადამიანებს მარტივად შეუძლიათ სხვისი განსჯა. ნამდვილად არ მეგონა, ხუმრობით და იუმორით ჩაწერილი ვიდეო ასეთ განხილვას თუ გამოიწვევდა. ამასთანავე, დიდი მადლობა მინდა გადავუხადო იმ ადამიანებს, ვინც პირადად ან საჯაროდ გვერდში დამიდგა, დადებითად და სწორად შეაფასა სიტუაცია.