მოლდოველი დეპუტატი კრაზანის ნაკბენით გარდაიცვალა - რა არის ცნობილი მომხდარის შესახებ
მოლდოვაში, პარტიის "მოქმედება და სოლიდარობა“ (PAS) დეპუტატი, იური პასატი დღეს დილით, 51 წლის ასაკში გარდაიცვალა. გარდაცვალების მიზეზი კრაზანების ნაკბენით გამოწვეული ანაფილაქსიური შოკი გახდა.
- "დიდი ტკივილით გამცნობთ ჩვენი კოლეგის, დეპუტატ იური პასატის გარდაცვალების შესახებ. უბედური შემთხვევა დღეს დილით მოხდა, ანაფილაქსიური შოკის გამო, რომელიც გამოწვეული იყო კრაზანას ნაკბენით. იური პასატი იყო ერთგული, შრომისმოყვარე, პატიოსანი კოლეგა. წლების განმავლობაში თავი მიუძღვნა ქვეყნის სამსახურს. იყო სოფელ ბალჩეანას მერი... ვუსამძიმრებთ ოჯახს და მათ გვერდით ვართ ამ ძალიან რთულ დროს",- წერს პარტია "მოქმედება და სოლიდარობა".
დეპუტატის გარდაცვალებას მოლდოვის პარლამენტის თავმჯდომარე იგორ გროსუც გამოეხმაურა:
"ის იყო პატიოსანი, საქმისადმი თავდადებული და ძალიან კარგი კოლეგა. ღმერთმა ნათელი დაუმკვიდროს", - წერს იგი სოციალურ ქსელში.