"კადრებზე ჩანს, რომ ის სახურავზე შეიარაღებულია და სამიზნეს უსაფრდება..." - რა დეტალები ხდება ცნობილი ტრამპზე თავდამსხმელის შესახებ - ვინ არის მეთიუ კრუქსი
აშშ-ის ექსპრეზიდენტი და პრეზიდენტობის კანდიდატი, დონალდ ტრამპი პენსილვანიის შტატში მხარდამჭერებთან შეხვედრის დროს მომხდარი სროლის შედეგად დაშავდა.
- შეხვედრის ერთ-ერთი მონაწილე დაიღუპა, ორი მონაწილე კი - მძიმედ დაშავდა. დაღუპულია თავად შეიარაღებული პირიც, რომელიც აშშ-ის საიდუმლო სამსახურის თანამშრომლებმა გაანეიტრალეს
აშშ-ის ფედერალური გამოძიების ბიურომ (FBI-მ) ყოფილი პრეზიდენტის, დონალდ ტრამპის მკვლელობის მცდელობაში მონაწილე პირის იდენტიფიცირება მოახდინა და განაცხადა, რომ ის 20 წლის თომას მეთიუ კრუკქსია. დონალდ ტრამპმა საავადმყოფო შესაბამისი სამედიცინო დახმარების გაწევის შემდეგ მალევე დატოვა.
- რა არის ცნობილი მეთიუ კრუქსის შესახებ?
როგორც ცნობილია, ის პენსილვანიის მკვიდრი იყო. შემთხვევის დროს საიდუმლო სამსახურმა ესროლა და გაანეიტრალა. მეთიუ კრუქსი ცხოვრობდა დაახლოებით ერთი საათის სავალ მანძილზე იმ ადგილიდან, სადაც სროლა მოხდა. მედიის ცნობით, მან 2022 წელს დაამთავრა საშუალო სკოლა. არსებული ინფორმაციით, ის სკოლაში საუკეთესო მოსწავლე იყო და მათემატიკასა და მეცნიერებაში გამოჩენილი ინიციატივებისთვის სკოლაში ჯილდოს სახით, 500 დოლარიც კი მიიღო.
საინტერესოა, რომ როგორც პენსილვანიის შტატის ამომრჩეველთა ჩანაწერები აჩვენებს, კრუქსი რეგისტრირებული იყო როგორც რესპუბლიკელი. ასევე არსებობს ჩანაწერი, რომლის მიხედვით, მან 17 წლის ასაკში 15 დოლარი შესწირა "დემოკრატებს".
- როგორც TMZ-ის მიერ გავრცელებულ ვიდეო კადრებზე ჩანს, კრუქსი სახურავზე, მუცელზე მწოლიარე მდგომარეობაში იყო იარაღით ხელში და ასე ესროდა სამიზნეს.
"ბიჭს გრძელი თმა აქვს და როგორც ჩანს, ნაცრისფერი/ხაკისფერი შარვალი აცვია, როგორც ხედავთ, ის საგულდაგულოდ ცდილობს სამიზნე შორიდან დაადგინოს“, - წერს TMZ.
FBI აცხადებს, რომ გამოძიება გრძელდება, რათა დადგინდეს თავდასხმის მოტივი, რომელიც საპრეზიდენტო არჩევნებამდე რამდენიმე თვით ადრე მოხდა. კრუქსის მამამ, 53 წლის მეთიუ კრუქსმა CNN-თან საუბრისას თქვა, რომ ცდილობს გაერკვეს, რა მოხდა და სანამ შვილზე რაიმეს იტყვის, სურს, რომ დაელოდოს სამართალდამცველებს და გამოძიებას.