25
მარტიდღის ზოგადი ასტროლოგიური პროგნოზი
პარიზის მახლობლად მდებარე ველური ბუნების პარკში სავარჯიშოდ გასულ ქალს არქტიკული მგლები დაესხნენ თავს. ფრანგული მედიის ცნობით, ახლა ის რეანიმაციაში იმყოფება.
მედიის ინფორმაციით, კვირას დილით 36 წლის ქალი თოარის პარკში მანქანებისთვის განკუთვნილ ტერიტორიაზე სარბენად იყო გასული, როცა მას სამი არქტიკული მგელი დაესხა თავს. მსხვერპლს, კბენის შედეგად, დაზიანებები კისრის, ზურგისა და ფეხის არეებში აქვს მიყენებული.
თოარის ღია ზოოპარკი, რომელიც პარიზიდან დაახლოებით 40 კმ-ის მოშორებითაა, საფრანგეთის ერთ-ერთი ყველაზე პოპულარული ველური ბუნების პარკია. აქ 800-მდე ცხოველი ბინადრობს და თავისუფლად გადაადგილდება, ვიზიტორებს კი თავიანთი მანქანებიდან შეუძლიათ მათი ყურება. პარკი სტუმრებს მგლებისა და დათვების მახლობლად საცხოვრებელსაც სთავაზობს, რომელიც ველური ცხოველებისგან ელექტრო ღობეებითა და თხრილებითაა დაცული.
უცნობია ის, თუ რატომ გადაწყვიტა ქალმა სამანქანე ზონაში სავარჯიშოდ შესვლა. "ამ ეტაპზე არ ვიცით, სტუმარმა შეცდომა დაუშვა თუ საგზაო ნიშნებთან შეექმნა რაიმე პრობლემა",- განუცხადა გაზეთ Le Parisien-ს პოლიციის წარმომადგენელმა.
ქალი მას შემდეგ გადაარჩინეს, რაც პარკის თანამშრომლებმა მისი ყვირილი გაიგეს. ის დაუყოვნებლივ ახლომდებარე საავადმყოფოში გადაიყვანეს. პოლიციის ცნობით, გამოძიება გრძელდება.
წყარო: bbc
მოამზადა: ანა სიბოშვილმა
