უკრაინელთა მასიური თავდასხმა დრონებით ოკუპანტის სამხედრო-ლოჯისტიკურ ობიექტებზე ანექსირებულ ყირიმისა და რუსეთის ტერიტორიაზე  - ყველაფერი, რაც ამ დროისთვის არის ცნობილი

წუხანდელი ღამე ძალიან მძიმე გამოდგა რუსეთის სამხედრო-ლოჯისტიკური ობიექტებისთვის, რომლებიც მდებარეობს ანექსირებულ ყირიმსა და რუსეთის შავი ზღვის სანაპიროზე. უკრაინის უსაფრთხოების სამსახურმა და თავდაცვის სამინისტროს მთავარმა სადაზვერვო სამმართველომ ერთობლივად "დაანთეს ცეცხლი“ სევასტოპოლის ყურეში. ასევე, მთავარი სადაზვერვო სამმართველოს ოფიცრები ცალ-ცალკე მუშაობდნენ ნოვოროსიისკის საზღვაო პორტში და უსაფრთხოების სამსახურის წარმომადგენლები - ტუაფსეს ნავთობგადამამუშავებელ ქარხანაში.

"პარასკევს ღამით რუსეთის სამ რეგიონსა და ყირიმს თავს დაესხა ასზე მეტი დრონი", - ნათქვამია რუსეთის თავდაცვის სამინისტროს შეტყობინებაში. მათი მტკიცებით, 51 კამიკაძე დრონი განადგურდა ყირიმის ტერიტორიაზე, 44 დრონი კი კრასნოდარის ოლქის თავზე, კიდევ ექვსი უპილოტო საფრენი აპარატი ჩამოაგდეს ბელგოროდის რეგიონში და ერთიც კურსკის თავზე, თუმცა ის ფოტო და ვიდეო მასალა, რაც ვრცელდება ცხადყოფს, რომ საკმაოდ ბევრმა დრონმა მიაღწია სამიზნეს.

• მასიური თავდასხმა ნოვოროსიისკზე და დარტყმა ტუაფსეს ნავთობგადამამუშავებელ ქარხანაზე

კრასნოდარის რეგიონის გუბერნატორმა ვენიამინ კონდრატიევმა ღამით განაცხადა, რომ ნოვოროსიისკზე თავდასხმის დროს ხანძარი გაჩნდა. "ტელეგრამარხი" "Caution, News" კი ირწმუნება, რომ ქალაქში თავდასხმის დროს 30-ზე მეტი აფეთქება გაისმა.

"დაახლოებით ღამის სამი საათიდან გავიგეთ სროლების და აფეთქებების ხმა“, - განუცხადა არხს ადგილობრივმა მცხოვრებმა.

ეს იყო ყველაზე მასიური თავდასხმა ქალაქში რუსეთის უკრაინაში შეჭრის შემდეგ. ნოვოროსიისკში საჰაერო განგაში მხოლოდ 7:00 საათის შემდეგ გაუქმდა. დღის პირველ ნახევარში საზოგადოებრივი ტრანსპორტი არ ფუნქციონირებდა და ქალაქის მოსახლეობას სთხოვეს არ დაეტოვებინათ სახლები,

რუსეთის ხელისუფლებას არ უთქვამს, რა იყო ნოვოროსიისკში თავდასხმის მიზანი. "ტელეგრამისარხი" Astra კი აცხადებს, რომ დაზიანდა ნოვოროსიისკის ნავთობის ტერმინალი და კიდევ ერთი საწვავის ავზი, ასევე ორი ნავთობსაცავი, მაგრამ მსხვერპლი არ ყოფილა. ხელისუფლებას ამ განცხადებაზე კომენტარი არ გაუკეთებია.

შავი ზღვის კიდევ ერთ ქალაქში, კრასნოდარის მხარეში, დრონები თავს დაესხნენ ტუაფსეს ნავთობგადამამუშავებელ ქარხანას (ის "როსნეფტის" საკუთრებაშია), რომელიც აქამდეც არაერთხელ ყოფილა დრონების სამიზნე, ისევე, როგორც სხვა ნავთობგადამამუშავებელი ობიექტები რუსეთში. თვითმხილველებმა ქარხნის ტერიტორიაზე დრონის ჩამოვარდნისა და ხანძრის ვიდეო გადაიღეს. გავრცელებული ინფორმაციით, საჭირო გახდება სარემონტო სამუშაოების ხელახლა წარმოება.

არსებული ინფორმაციით, ნავთობგადამამუშავებელი ქარხნის ტერიტორიაზე დაშავებულები არ არიან. ხანძარი ღამის საათებში იყო ლოკალიზებული, სრულად მხოლოდ დილის 9:00 საათის შემდეგ ჩააქრეს.

• რა ხდებოდა ანექსირებულ სევასტოპოლში

ადგილობრივი წყაროების განცხადებით, სევასტოპოლის ყურეში მთელი ღამე იყო "ცეცხლოვანი შოუ", რომელმაც ასევე მიაღწია სევასტოპოლის ელექტრო ქვესადგურამდე და ელექტროენერგიის გათიშვა გამოიწვია. ანექსირებულ სევასტოპოლში ელექტროენერგიის გათიშვის გამო, სკოლებში, კოლეჯებსა და საბავშვო ბაღებში სწავლა გაუქმდა, - ამის შესახებ განაცხადა, გუბერნატორმა მიხეილ რაზვოჟაევმა.

მისი თქმით, ქვესადგურის სრული ფუნქციონირების აღდგენას მინიმუმ ერთი დღე დასჭირდება.

თავდაცვის სამინისტროს ცნობით, ღამის განმავლობაში რუსეთის შავი ზღვის ფლოტის საზღვაო ავიაციისა და საპატრულო კატარღების მიერ განადგურდა ექვსი საზღვაო უპილოტო აპარატი. საზღვაო დრონები ყირიმს თავს დაესხნენ წინა დღეს, 16 მაისსაც.

"დღევანდელმა სპეცოპერაციამ დაამტკიცა, რომ რუსებს არ შეუძლიათ დაიცვათ თავიანთი ძირითადი საზღვაო ბაზები სევასტოპოლსა და ნოვოროსიისკში“, - აღნიშნა უკრაინულმა წყარომ მედიასთან საუბარში.

• დაღუპულები ბელგოროდის მახლობლად

გუბერნატორმა ვიაჩესლავ გლადკოვმა განაცხადა, რომ ქალი და მისი ოთხი წლის ვაჟი ბელგოროდის მახლობლად დრონის დარტყმის შედეგად დაიღუპნენ.

”სოფელ ოქტიაბრსკში, კამიკაძე დრონი თავს დაესხა მანქანას, რომელშიც მძღოლი და სამი მგზავრი (დედა, მამა და შვილი) იმყოფებოდნენ,” - წერს ის "ტელეგრამარხზე".

გლადკოვის თქმით, აფეთქების შედეგად ქალი ადგილზე გარდაიცვალა, ბავშვი კი - საავადმყოფოში.