"გადაცემა გავაჩერეთ... დავხურავთ თუ არა, გაირკვევა" - რას აცხადებს ირმა სოხაძე ინფორმაციაზე, რომ ე.წ. აგენტების კანონზე გამოთქმული აზრის გამო "პოსტივიზე" გადაცემა დაუხურეს?
გავრცელდა ინფორმაცია, რომ ''რუსული კანონის'' წინააღმდეგ გაკეთებული განცხადების შემდეგ, მომღერალს და ტელეწამყვანს ირმა სოხაძეს "პოსტვზე" გადაცემა დაუხურეს.
ცნობილია, რომ მან რამდენიმე დღის წინ "უცხოური გავლენის გამჭვირვალობის კანონისა" და საპროტესტო აქციების შესახებ "კვირის პალიტრასთან“ შემდეგი განაცხადა:
"ჩვენ იქ ვცდებით, როდესაც განსხვავებული აზრისა და კუდიანების დევნას ვიწყებთ, შეთქმულების თეორიებს განვიხილავთ. აქ არ არის განსხვავებული აზრი, აქ ყველა ერთ აზრზე ვართ, რომ ჩვენი მომავალი - ევროპისკენ სვლა კონსტიტუციით, 78-ე მუხლითაა დამტკიცებული. ნუ დავყოფთ, რომ თითქოს ახალგაზრდებს უნდათ ევროპა და ჩემს თაობას კი - რუსეთი. არა, ბატონო, მე უფრო არ მინდა რუსეთი, რადგან უკვე ვიცხოვრე იმ ქვეყანაში და ვიცი, რაც არის, და როგორღა უნდა მინდოდეს იმ წარსულში დაბრუნება? ვინ დაგვაბრალა ეს ჩემს თაობას? ეს არ არის თაობათა ომი და საერთოდ, ეს არავის ომი არ არის. შეიძლება გამჭვირვალობა მართლაც აუცილებელია, მაგრამ არ მინდა ყველა ნიუანსი ვიცოდე ქვეყნის შუაზე გახლეჩის ფასად. ხომ გახსოვთ, რა ბედნიერები ვიყავით ამ კანონის დაინიცირებამდე? მართლაც გვჯეროდა, რომ "ზღაპრის ბოლო კეთილია", და უცებ კვლავ შუაზე რატომ გავიხლიჩეთ? ღამეები არ მძინავს, ვზივარ, ეკრანს ვუყურებ და ვტირი. გავიგოთ, რომ ყველა ვართ ერთ აზრზე! რაც უფრო მალე გავიგებთ და ვაღიარებთ, უკეთესი იქნება ჩვენთვისაც და ქვეყნისთვისაც“ - აღნიშნა ირმა სოხაძემ "კვირის პალიტრასთან“ ინტერვიუში.
ამ ინფორმაციის დასაზუსტებლად ambebi.ge ირმა სოხაძეს დაუკავშირდა:
"გადაცემა გავაჩერეთ. ეს საერთო აზრია, ხოლო დავხურავთ თუ არა, გაირკვევა. საერთოდ არ არის სწორი ფორმულირება, რომ დამიხურეს გადაცემა.
მით უმეტეს ჩემი კომენტარისა თუ ინტერვიუს გამო?! არავის არაფერი დაუხურავს, საყვედურიც არავის უთქვამს.
ასე რომ, გავაჩერეთ გადაცემა. ახლა ასეთი მდგომარეობაა. განუსაზღვრელი დროით გავაჩერეთ და გადავწყვეტთ, გავაახლებთ, სხვას გავაკეთებთ, თუ, წამოვალ მაგ არხიდან. ვნახოთ, შევხედავთ მოვლენების განვითარებას".