"მსგავსი გამეტებით ადამიანების ცემა ე.წ. სისხლიანი 9 წლის დროსაც არ მახსოვს... ერთი საათი მხედველობა არ ჰქონდა" - რას ჰყვება ქაცარავას მეუღლე?
"ანტისაოკუპაციო მოძრაობის" წევრის, დავით ქაცარავა დაკავებული და ნაცემია. ინფორმაცია თავდაპირველად ქაცარავას მეუღლემ სოფიო ხაჭაპურიძემ სოციალურ ქსელში გაავრცელა. ცოტა ხანში კი ფოტოც გავრცელდა, სადაც ჩანს, რომ სახეზე მძიმე დაზიანებები აღენიშნება. ნაცემი დავით ქაცარავას მეუღლე სოფო ხაჭაპურიძე "მთავარ არხთან" საუბრისას ამბობს, რომ მსგავსი გამეტებით ცემა, იმ ე.წ. სისხლიანი 9 წლის დროსაც კი არ ახსოვს
სოფო ხაჭაპურიძე:
- დამირეკა რაღაც ნომრიდან და რომ ავიღე ხმაზეც კი ვერ ვიცანი, რომელი ბრძანდებით მეთქი და დათო ვარ შენი მეუღლეო, ხმაზე ვერ ვიცანი. გადავყავარ ინგოროყვაშიო, სასტიკად გამისწორდნენ, დალეწილი ვარო, ასე მითხრა პირდაპირ.
სერიოზული დაზიანებები აქვს თავის არეში არის გამეტებით არის ნაცემი, ყბა-სახის, ყვრიმალის მოტეხილობა აქვს. "კატეც" გადაუღეს. გამეტებით მირტყამდა ძალიან ბევრი ადამიანიო. აქცია არ ჩაუდგია, სიცხიანიც კი იდგა აქციაზე, როდესაც სახეში შეასხეს სპრეი და შემდეგ ახალგაზრდები დაეხმარნენ, გამოიყვანეს მდგომარეობიდან. ერთი საათი მხედველობა არ მქონდაო. ეს იყო 30 აპრილს დარბევის დროს.
ყოველდღე იქ იყო, ყველამ იცის, რომ აქტივისტია, გუშინ და დღეს არ გაგვიგია ეს ამბავი. დღეს რატომ იყო განსაკუთრებული სამიზნე ჩემი მეუღლე ამას ვერ გეტყვით. უბრალოდ ჩვენ ვხვდებით, რომ ეს ძალოვანი სტრუქტურის წარმომადგენლები არიან არაადეკვატურად აგრესიულები. ჩვენ წლებია ყველანაირი ტიპის აქციაზე გამოვსულვართ, ყველანაირი ძალადობის გასაპროტესტებლად, მაგრამ მსგავსი გამეტებით ადამიანების ცემა, ე.წ. სისხლიანი ცხრა წლის დროსაც არ მახსოვს.
საბოლოო ჯამში ეს ხალხი ასეთი ძალადობით ამ ომს რომ წააგებს უნდა ხვდებოდნენ. ალბათ ბოლო წუთებს ითვლიან თავის ჩაბღაუჭებულ მდგომარეობას ხელისუფლებაზე, სკამებზე თუ ქონებაზე. წარმოუდგენელი ამბავია რაც ამჟამად ხდება. იმ ახალგაზრდების სულისკვეთება, რომლებიც არიან ამ წუთას ქუჩაში, გუშინაც ვნახეთ, იმის წინათ, სუფთა ხელებითა და გონებით, გახსნილი აზროვნებით, იმას როგორ ეხებიან საერთოდ წარმოუდგენელია, ვერც შეეხებიან ვერასოდეს.
დავით ქაცარავას მიმართ სამსახურებრივი უფლებამოსილების ძალადობით გადამეტების ფაქტზე, საქართველოს სისხლის სამართლის კოდექსის 333-ე მუხლის მესამე ნაწილის „ბ“ ქვეპუნქტით გათვალისწინებული დანაშაულის ნიშნებით გამოძიება დაიწყო.
"სპეციალურმა საგამოძიებო სამსახურმა, 2024 წლის 14 მაისს, სამართალდამცავების მხრიდან დავით ქაცარავას მიმართ სამსახურებრივი უფლებამოსილების ძალადობით გადამეტების ფაქტზე, საქართველოს სისხლის სამართლის კოდექსის 333-ე მუხლის მესამე ნაწილის „ბ“ ქვეპუნქტით გათვალისწინებული დანაშაულის ნიშნებით გამოძიება დაიწყო.
გამოძიების დაწყების საფუძველი დავით ქაცარავას მეუღლის მიერ ცხელ ხაზზე დაფიქსირებული შეტყობინება გახდა, სადაც მან განაცხადა, რომ მის მეუღლეს დაკავებისას სამართალდამცავებმა ფიზიკური შეურაცხყოფა მიაყენეს.
სპეციალური საგამოძიებო სამსახური მომხდარი ფაქტის შესასწავლად ატარებს ყველა საჭირო საგამოძიებო და საპროცესო მოქმედებას ობიექტური გამოძიების უზრუნველსაყოფად. სპეციალური საგამოძიებო სამსახური დანაშაულის შემცველ ყველა შეტყობინებაზე ატარებს ყოველმხრივ გამოძიებას, მიმდინარეობს მოწმეთა და განმცხადებელთა გამოკითხვა, მონაწილე პირების იდენტიფიცირება, შემთხვევის ადგილის დათვალიერება, დოკუმენტაციის გამოთხოვა, ტარდება სასამართლო-სამედიცინო და სხვა რელევანტური ექსპერტიზები, მიმდინარეობს კერძო და საჯარო დაწესებულებებიდან ვიდეო კამერის ჩანაწერების ამოღება და მათი დეტალური შესწავლა. სპეციალური საგამოძიებო სამსახური საზოგადოებას მიაწვდის ინფორმაციას გამოძიების მიმდინარეობის და შედეგების შესახებ”, - ნათქვამია საგამოძიებო სამსახურის განცხადებაში.
- ცნობისთვის, დღეს შინაგან საქმეთა სამინისტრომ პოლიციელთა კანონიერი მოთხოვნისადმი დაუმორჩილებლობისა და წვრილმანი ხულიგნობისთვის ადმინისტრაციულ სამართალდარღვევათა კოდექსის 166-ე და 173-ე მუხლების შესაბამისად 13 პირი დააკავა. ამის შესახებ განცხადებას შინაგანს საქმეთა სამინისტრო ავრცელებს.
როგორც შსს-ს განცხადებაშია აღნიშნული, სამინისტრო შეისწავლის აქციის მსვლელობისას მომხდარ ყველა კანონსაწინააღმდეგო ფაქტს და თითოეულ ქმედებას მკაცრი სამართლებრივი რეაგირება მოჰყვება.
წაიკითხეთ ასევე: