13
აპრილიდღის ზოგადი ასტროლოგიური პროგნოზი
ჩვენ ვართ მართლები და ჩვენ ვმოქმედებთ ღირსებით და ქვეყნის ინტერესებიდან გამომდინარე, ამიტომ არ ჭრის არც ხელისუფლებაზე და არც ქართველ ხალხზე უსაფუძვლო შანტაჟი და მუქარა, - ამის შესახებ პრემიერ-მინისტრმა ირაკლი კობახიძემ თოქ-შოუების წამყვანებთან შეხვედრისას დასავლელი პარტნიორების მხრიდან დასანქცირების შესაძლებლობაზე დასმული კითხვის საპასუხოდ განაცხადა.
ირაკლი კობახიძის განცხადებით, „ქართული ოცნების“ საპატიო თავმჯდომარე ფაქტობრივად უკვე დასანქცირებულია, თუმცა „სადაც ქვეყანას პოზიციების დაცვა ჭირდება, იქ შანტაჟს ვერ დაექვემდებარება“.
„ჩვენ ასეთი შანტაჟი და მუქარა გვესმის უკვე რამდენიმე წელია, ხან ერთი სუბიექტის მხრიდან, ხან მეორე, ხან მესამე. აქეთ რუსეთი გვაშანტაჟებს, იქით კონკრეტული პოლიტიკოსები დასავლეთში გვაშანტაჟებენ. მიჩვეული ვართ ჩვენ ამ ყველაფერს. ეს გრძელდება უკვე წლებია, მაგრამ სადაც ხარ მართალი და სადაც ხარ მყარად შენს პოზიციაში და ღირსებაში, იქ ბოლომდე მიაღწევ შედეგს შენი ქვეყნისთვის. ასე მოხდა ზუსტად შარშან დეკემბერში. იქაც იყო შანტაჟი, მუქარა, მაგრამ საბოლოო ჯამში მივაღწიეთ შედეგს.
მე შეგახსენებთ, რომ ჩვენი პარტიის საპატიო თავმჯდომარეზე, ბატონ ბიძინა ივანიშვილზე ფაქტობრივი სანქცია უკვე დიდი ხანია მოქმედებს. რეალურად 2008 წელს დაიწყო მისი ანგარიშის ძარცვა, თუმცა რაც იყო დარჩენილი, ის თანხები ერიცხებოდა და ომის დაწყებისთანავე ამ თანხების გადმორიცხვაც შეუჩერდა. მისი პოზიცია არის ცხადი, სადაც ქვეყანას პოზიციების დაცვა ჭირდება, იქ შანტაჟს ვერ დაექვემდებარება შანტაჟის მიხედვით ვერ მიიღებს გადაწყვეტილებებს.
როგორიც არ უნდა იყოს შანტაჟი და მუქარა, ჩვენ ვართ მართლები, ჩვენ ვმოქმედებთ ღირსებით, ჩვენ ვიცავთ ამ ქვეყნის ინტერესებს, აქედან გამომდინარე ამ გზაზე ვერაფერი შეგვაჩერებს. და მეორე, დარწმუნებული ვართ, რომ ჩვენი პოლიტიკა იქნება შედეგიანი. როგორც შარშან დეკემბერში იყო შედეგიანი და მივიღეთ კანდიდატის სტატუსი, ასეთივე შედეგიანი იქნება ჩვენი ღირსეული პოლიტიკა მომავალშიც. მოლაპარაკებებსაც გაგვიხსნიან“, - განაცხადა ირაკლი კობახიძემ.
მისი თქმით, დღეს „ქართული ოცნების“ მხარდაჭერა, დაახლოებით, 60%-ია.
როგორც მან აღნიშნა, მმართველი გუნდი ისევე დაიცავს ქვეყანას რევოლუციისგან, „როგორც ბევრჯერ დაიცვა ბოლო სამი წლის განმავლობაში“.
კობახიძის თქმით, საქართველოში ვერავითარი არეულობა ვერ შედგება და მთავრობა სახელმწიფოებრივ ამოცანებს აუცილებლად შეასრულებს.
„როგორც ბევრჯერ დავიცავით ქვეყანა რევოლუციიდან ბოლო სამი წლის განმავლობაში, ახლაც ასე დავიცავთ. კოლექტიურ „ნაციონალურ მოძრაობას“ რა თქმა უნდა, არანაირი რესურსი არ აქვს რევოლუციის. თუ საუბარია მაიდანზე, ეს იანუკოვიჩის უკრაინა არ არის. არც 2003 წლის საქართველოა. აქედან გამომდინარე, დღევანდელ საქართველოსთან ტოლობის ნიშნის დასმა შეუძლებელია. სახელმწიფო თავის ადგილზე დგას, ჩვენი ინსტიტუტები ისეთი ძლიერია, როგორც არასდროს. სახელისუფლებო გუნდი ძლიერი და ერთიანია. ასეთ ვითარებაში ვერც ძალადობით და ვერც მსგავსი აქტები რადიკალები ვერანაირ მიზანს ვერ მიაღწევენ. ეს არის გარანტია იმისა, რომ საქართველოში ვერავითარი არეულობა ვერ შედგება და ჩვენ სახელმწიფოებრივ ამოცანებს აუცილებლად შევასრულებთ.
მთავარი ფაქტორი ხალხის მხარდაჭერაა. დღეს „ქართული ოცნების“ მხარდაჭერა, დაახლოებით, 60%-ია. ასეთ ვითარებაში პოლიტიკური უმცირესობა რევოლუციას ვერ მოაწყობს. ხალხმა მშვიდობის ფასი იცის და აქედანაა განპირობებული ის რეკორდული მხარდაჭერა, რომელიც „ქართულ ოცნებას“ 2012 წლიდან მოყოლებული აქვს“, - განაცხადა პრემიერ-მინისტრმა.
ამასთან, როგორც კობახიძემ აღნიშნა, "კეზერაშვილს, ხაზარაძეს, გვარამიას, სააკაშვილს და სხვებს ამ ქვეყანას არცერთ შემთხვევაში არ დაუთმობენ".
"ხელისუფლების ცვლილებას რაც შეეხება, გპირდებით, რომ კეზერაშვილს, ხაზარაძეს, გვარამიას, სააკაშვილს და სხვებს აქ ამ ქვეყანას არცერთ შემთხვევაში არ დავუთმობთ“, - მიმართა პრემიერ-მინისტრმა ჟურნალისტს.
