"უკრაინამ თავად უნდა გადაწყვიტოს ომში რომელ კომპრომისებზე წასასვლელად არის მზად" - იენს სტოლტენბერგი
"უკრაინამ თავად უნდა გადაწყვიტოს ომში რომელ კომპრომისებზე წასასვლელად არის მზად", - ამის შესახებ ნატო-ს გენერალურმა მდივანმა, იენს სტოლტენბერგმა BBC-სთან ინტერვიუში განაცხადა, რომლის სრული ვერსიაც დღეს, 7 აპრილს გამოქვეყნდება.
- ინტერვიუს ანონსის თანახმად, მიუხედავად იმისა, რომ სტოლტენბერგმა აღნიშნა, რომ სამხედრო დახმარება სასიცოცხლოდ მნიშვნელოვანია, რათა უკრაინამ რუსი სამხედროები განდევნოს და რუსეთის ლიდერს ვლადიმირ პუტინს აიძულოს ოკუპაციის თავის მიზნებზე უარი თქვას, მან ასევე ივარაუდა, რომ კიევს, შესაძლოა, ასევე დათმობებზე მოუწიოს წასვლა.
"ბოლოს და ბოლოს, სწორედ უკრაინამ უნდა გადაწყვიტოს, რომელ კომპრომისებზე წასასვლელად არის მზად, შესაძლებლობა უნდა მივცეთ ისეთ მდგომარეობაში იყოს, რომ მაოლაპარაკების მაგიდასთან სასურველი შედეგი მიაღწიოს", - განაცხადა სტოლტენბერგმა.
ნატო-ს გენერალური მდივნის თქმით, ის არ მოუწოდებს უკრაინას დათმობებზე ახლა წავიდეს, ხოლო "ნამდვილი მშვიდობა” მაშინ იქნება მიღწეული, როდესაც "უკრაინა გაიმარჯვებს“.
სტოლტენბერგმა ასევე აღნიშნა, რომ არსებობს რუსეთისგან, ჩინეთისგან, ირანისგან და ჩრდილოეთ კორეისგან შემდგარი “ავტორიტარული ალიანსი,” რომლის წევრებიც ერთმანეთს პრაქტიკულ დახმარებას უწევენ და რომელიც "სულ უფრო მჭიდრო ხდება“.
“თავდაცვითი მრეწველობისთვის საკვანძო დეტალების მიწოდებით ჩინეთი მხარს უჭერს რუსეთის სამხედრო ეკონომიკას, რისთვისაც მოსკოვი პეკინს თავის მომავალს აძლევს გირაოთი,” - განაცხადა სტოლტენბერგმა.