"პირველად ვყვები ამ ამბავს და გეუბნებით, ჩემი ბრალი არ იყო" - 30 წლის წინ მომხდარი უმძიმესი ავარია: როგორ იხსენებს გია როინიშვილი და რას წერდა 2 წლის წინ ერთ-ერთი დაშავებული გოგონა?
გია როინიშვილმა გადაცემაში "ნიკოლოზის კითხვები" წლების წინ მომხდარი ავარიის მძიმე შედეგები გაიხსენა. მართალია, თავად უვნებლად გადარჩა, მაგრამ ამ ავარიის დროს დაზიანდა რამდენიმე მანქანა და ადამიანები.
"არ მიყვარს ძალიან მაგ თემაზე საუბარი, ძალიან რთული სიტუაცია იყო. ყველა ადამიანი გადარჩა, მაგრამ მძიმე მდგომარეობა იყო. გულწრფელად გეუბნებით, რომ ჩემი ბრალი არ იყო. ახლა პირველად ვყვები ამ ამბავს, ამ დღიდან 30 წელი გავიდა, ცუდი გზა იყო, ჩემს წინ დაამუხრუჭა მანქანამ და წავიდა, მეც დავამუხრუჭე და მოვცურდი. არ ვიცი, იმის ბრალი რამდენად იყო, მაგრამ ის წავიდა, აღარც ნომერი მახსოვს. მერე ჩემმა მანქანამ დააზიანა უკვე სხვები, ყველა.
მუხრუჭს დავაწექი და დიდხანს მათრია, სანაპიროზე მოხდა, მე სხვა მანქანას დავარტყი, მეც დამარტყეს და ასე სრიალით ავვარდი მტკვრის სანაპიროს ტროტუარზე. უცებ მოვარდა ხალხი და არცერთი კარი არ იღება. მარტო ვიჯექი მანქანაში და ვფიქრობდი, ეს არის სიკვდილი. მესმის ხალხის ლაპარაკი, ანუ მკვდარი არ ვარ, არაფერი არ მტკივა, ეს იყო შოკი. მერე ვიფიქრე, გადავრჩი-თქო. ეგოისტურად გავიფიქრე, რა სიკეთე აქვს გაკეთებული მამაჩემს ან ჩემს წინაპრებს, რომ გადავრჩი. ნაკაწრი არ მქონდა. ღმერთმა დამიფარა, რომ ყველა ცოცხალი გადარჩა გარშემო და დღემდე მადლიერი ვარ ღმერთის" - აღნიშნა როინიშვილმა.
- ორი წლის წინ, ამ ავარიაზე სოციალურ ქსელში ვრცელი პოსტი გამოაქვეყნა ერთ-ერთმა დაშავებულმა, ფიტნეს-ტრენერმა ნინა ილურიძემ, რომელიც წერდა, რომ ავარიის დროს, ის საერთოდ გარდაცვლილი ეგონათ, როდესაც მანქანიდან გადმოიყვანეს.
"ახალგაზრდა გოგო გონზე რომ მოვედი, სარკეს მიმალავდნენ, მარჯვენა მხარე მოხეული მქონდა. როდესაც სარკეში ჩავიხედე, ეს იყო საშინელი მომენტი, ვუყურებდი და ვერ ვხედავდი საკუთარ თავს. არ მეგონა ოდესმე ადამიანურ სახეს თუ დავიბრუნებდი" - წერდა ილურიძე.
წაიკითხეთ ასევე: