"7 წლიანი ტანჯვა-წამების შემდეგ ურთულესი გზა ელის - ფიზიკური და სულიერი ტკივილით სავსე" - რა კადრებს აქვეყნებს გიორგი მამალაძის ძმა თურქეთის კლინიკიდან
ორი კვირის წინ გიორგი მამალაძე სამკურნალოდ თურქეთში გადაიყვანეს. სასულიერო პირმა რეაბილიტაციის პროცესი უკვე დაიწყო.
თურქეთის კლინიკიდან მისი ძმა, თორნიკე მამალაძე საზოგადოებას ახალ კადრებს უზიარებს და წერს:
"7 წლიანი ცილისწამების, უსამართლობის, გულგრილი დამოკიდებულებისა და ტანჯვა-წამების შემდეგ, როგორც ჩანს, ისევ ურთულესი გზა ელის - ხანგრძლივი, ფიზიკური და სულიერი ტკივილით სავსე, მაგრამ - იმედის გზა..." - წერს მამალაძე.
ცნობისთვის, ე.წ. ციანიდის საქმეზე მსჯავრდებული დეკანოზი გიორგი მამალაძე ე.წ. უდოს კომისიამ 14 თებერვალს გაათავისუფლა.
სასულიერო პირი თბილისის აეროპორტში 2017 წლის 10 თებერვალს დააკავეს. ის სამივე ინსტანციის სასამართლომ შურისძიების მოტივით ციანიდის გამოყენებით შორენა თეთრუაშვილის მკვლელობის მომზადებაში ცნო დამნაშავედ და 9-წლით თავისუფლების აღკვეთა მიუსაჯა.