სიცოცხლის ძიება დედამიწის მიღმა: მეცნიერებმა აღმოაჩინეს პლანეტა "მდუღარე ოკეანით"
შესაძლებელია თუ არა სიცოცხლე დედამიწის მიღმა, ამ თემაზე მეცნიერები საუკუნეებია მუშაობენ, თუმცა ამ დრომდე საბოლოო პასუხი არ აქვთ. ახლახან მკვლევრებმა აღმოაჩინეს შორეული პლანეტა, რომელიც დიდი ალბათობით, დაფარულია ღრმაწყლოვანი, მდუღარე ოკეანით. ასტრონომების თქმით, ჯერჯერობით უცნობია, არის თუა არა იქ სასიცოცხლო პირობები.
"ამგვარი აღმოჩენა არის წინსვლა დედამიწის მიღმა სიცოცხლის პირობების ძიების გზაზე", - წერს The Guardian.
NASA-ს ჯეიმს უების კოსმოსური ტელესკოპის დაკვირვებით, პლანეტაზე აღმოჩენილია წყლის ორთქლი და მეთანისა და ნახშირორჟანგის ქიმიური ნიშნები. ახალი პლანეტა ორჯერ აღემატება დედამიწას და ჩვენგან დაახლოებით 70 სინათლის წლის მანძილზე მდებარეობს.
კემბრიჯის უნივერსიტეტის მეცნიერები ამბობენ, რომ აღნიშნული ქიმიური ნარევი მიეკუთვნება წყლის სამყაროს, და გვხვდება ისეთ ადგილებში, სადაც ატმოსფერო მდიდარია წყალბადით.
"ოკეანის ტემპერატურა შეიძლება აღწევდეს 100 გრადუს ცელსიუსს ან მეტს“, - ამბობს პროფესორი ნიკუ მადჰუსუდჰანი, რომელიც კვლევას ხელმძღვანელობს.
მისი თქმით, მაღალი ატმოსფერული წნევის გამო, ოკეანე შესაძლოა თხევადი იყოს.
ამავდროულად, ამ ინტერპრეტაციას უარყოფს კანადელ მეცნიერთა გუნდი, რომელმაც ჩაატარა დამატებითი კვლევები იმავე ეგზოპლანეტაზე. მათი თქმითაც, პლანეტაზე მსგავსი ატმოსფერული ქიმიკატები აღმოაჩინეს, მაგრამ აღნიშნავენ, რომ ასეთი პლანეტა წყლის არსებობისთვის ზედმეტად ცხელია და ამის ნაცვლად ექნება კლდოვანი ზედაპირი წყალბადისა და წყლის ორთქლის დიდი, მკვრივი ატმოსფეროთი.
არ აქვს მნიშვნელობა მეცნიერების რომელი გუნდია მართალი, ამ ამბავში ყველაზე გასაოცარი ის არის, რომ ჯეიმს უების ტელესკოპი გვაწვდის მზის სისტემის მიღმა არსებული პლანეტების ბუნებაზე უამრავ ინფორმაციას. ტელესკოპი იჭერს ვარსკვლავურ შუქს, რომელიც გაფილტრულია ორბიტაზე მოძრავი პლანეტების ატმოსფეროში, რათა მოხდეს არსებული ქიმიური ელემენტების დეტალური დაშლა. აქედან, ასტრონომებს შეუძლიათ შექმნან პლანეტის ზედაპირზე არსებული პირობების სურათი და გაარკვიონ, შესაძლებელია თუ არა აღნიშნულ პლანეტაზე სიცოცხლის არსებობა.