"როგორი ამბავია, ამოდენა მტერი რომ დაგაფასებს, ეს ამბავი რომ გავიგე, ხასიათზე მოვედი" - რუსეთმა ალეკო ელისაშვილსა და დავით ქაცარავაზე ძებნა გამოაცხადა

"მედიაზონა" აქვეყნებს იმ პირების სიას, რომლებზეც რუსეთმა ძებნა გამოაცხადა. აღნიშნული სიის ბმული ამ დროისთვის, ჩვენთვის გაურკვეველი მიზეზებით, ხელმისაწვდომი აღარ არის, თუმცა ცნობილია, რომ ძებნილთა სიაში რუსეთის შინაგან საქმეთა სამინისტროს შეყვანილი ჰყავს საქართველოს მოქალაქეებიც.

მათ შორის არიან უკრაინაში მებრძოლი "ქართული ლეგიონის" წევრები, ასევე დავით ქაცარავა და ალეკო ელისაშვილი.

• "როგორი ამბავია, ამოდენა მტერი რომ დაგაფასებს", - ასე ეხმიანება "მოქალაქეების" ლიდერი, ალეკო ელისაშვილი აღნიშნულ თემას და განმარტავს, რომ ამ ამბავმა "ხასიათზე მოიყვანა".

"სიმართლე გითხრათ, უხასიათოდ ვიყავი, ადრე იტყოდნენ, უქეიფოდ გახლდით და ეგ ამბავი რომ გავიგე, ხასიათზე მოვედი. როგორი ამბავია, ამოდენა მტერი რომ დაგაფასებს და პატივს დაგდებს და სახელმწიფოს მტრად გამოგაცხადებს, არ არის პატარა საქმე, ძალიანაც გამიხარდა და ხასიათზე მომიყვანა. თან რომ ჩავხედე იმ ჩამონათვალს, პირველ ადგილზე ვართ ქართველები, ყველაზე მეტს ჩვენ გვეძებენ რუსები. ძირითადად საუბარია მათზე, ვინც უკრაინაშია, ან ვინც უკრაინაში იყო. მადლობა რუსეთს ჩემი აღიარებისთვის", - ამბობს ელისაშვილი.

თემას ეხმიანება დავით ქაცარავაც:

"მეძებენ რუსები თურმე, ზდეს ია, ზდეს", - წერს ის სოციალურ ქსელში.

ცნობისთვის, როგორც "მედიაზონა" წერს, ძებნილთა სიაში საქართველოს 100 მოქალაქეა შეყვანილი.

რუსეთმა ძებნილთა სიაში შეიყვანა ესტონეთის პრემიერ-მინისტრი, კაია კალასიც, თუმცა მითითებული არ არის რაიმე კონკრეტული ბრალდება. ძებნა გამოცხადდა ესტონეთის სახელმწიფო მდივან ტაიმარ პეტერკოპზეც.

წაიკითხეთ ვრცლად: რუსეთმა ესტონეთის პრემიერ-მინისტრზე ძებნა გამოაცხადა