"პირველ და მეორე დღეს ძვლებში მამტვრევდა, მიჭირდა ორიენტირება, ფეხზე წამოდგომა... გთხოვთ, თუ ვინმეს ბოლო ხანებში სიცხეები გაქვთ, მიაქციეთ ყურადღება" - რას წერს ბექა ყორშია?
ქვეყანაში ცირკულირებს გრიპის ვირუსი, რომელიც გადამდებია. იაშვილის სახელობის ბავშვთა ცენტრალური საავადმყოფოს სამედიცინო დირექტორის, თსსუ-ის პროფესორის, ივანე ჩხაიძის ინფორმაციით, "ქვეყანაში გრიპის ვირუსის სტატისტიკა აღმავალ მრუდზეა“.
როგორც ჩხაიძემ აღნიშნა, 2023 წლის 49-ე კალენდარულ კვირას გრიპის დადასტურებული შემთხვევები 16% იყო, 2 კვირის შემდეგ ეს მაჩვენებელი 27% გახდა.
მისივე თქმით, ბოლო 2 კვირაში გაორმაგებულია ლაბორატორიულად დადასტურებული გრიპის შემთხვევების რაოდენობა.
"ნებისმიერი ადამიანი, რომელსაც ტემპერატურა აქვს 38 გრადუსი და მეტი, ძლიერი თავის ტკივილი, სახსრების და კუნთების ტკივილი, საერთო სისუსტე მიუთითებს გრიპის ვირუსის არსებობაზე. ბავშვებში ამ ყველაფერს ემატება მომატებული ძილიანობა, საკვებზე უარის თქმა, ჭირვეულობა. ეს ყველაფერი გრიპის ვირუსის არსებობაზე მიუთითებს, განსაკუთრებით მცირე ასაკის ბავშვებში ეს შემთხვევა უნდა იყოს ექიმის მიერ მართული“,- აღნიშნა ჩხაიძემ.
სოცქსელში უამრავი ადამიანი წერს, რომ ვირუსი მათთან საკმაოდ მძიმე ფორმებით მიმდინარეობს. მათ შორის არის ჟურნალისტი ბექა ყორშია. ის სოციალურ ქსელში პოსტს აქვეყნებს:
"ხალხო, ძალიან გთხოვთ, წაიკითხეთ და გაითვალისწინეთ, რასაც აქ დავწერ. როგორც ბევრ თქვენგანს, მეც შემეყარა ეს ვირუსი. პირველი იანვრიდან ფეხზე ვერ ვდგავარ. სიცხე ახლაც მაქვს (37.9), მაგრამ პირველ და მეორე დღეს ძვლებში მამტვრევდა, მიჭირდა ორიენტირება, აზრების თავმოყრა, ფეხზე წამოდგომა და გავლა. ჩემგან გადაედო Nini-ს, რომელიც ჩემზე ბევრად ცუდ მდგომარეობაში ჩავარდა. ფეხის ფრჩხილებიდან დაწყებული თმის ღერებით დამთავრებული, ყველაფერი ტკიოდა.
თვალებს ვერ ახელდა სპაზმისგან. რაღაცნაირად მაინც მოვახერხეთ, რომ ერთმანეთისთვის მიგვეხედა. ხან ერთს დაუწევდა სიცხე, ხან მეორეს და ასე ვმონაცვლეობდით, რომ ერთი-მეორეს წამლებისა და სითხეების მიღებაში დავხმარებოდით.
ჩემს ცხოვრებაში ასეთი რამ არ მახსოვს. ორჯერ მქონდა კოვიდი, მაგრამ რა შედარებაა. ამ ვირუსმა მომკლა და ცხოვრება შემაძულა. გთხოვთ, თუ ვინმეს ბოლო ხანებში სიცხეები გაქვთ, მიაქციეთ ყურადღება და თქვენით გადაჭრით ნუ დაასკვნით, რომ ეს უბრალოდ, გრიპია. გაიკეთეთ პირბადე. ჩვენ ნელ-ნელა გამოვდივართ მდგომარეობიდან, ალბათ, ხვალ-ზეგ უკვე კარგად ვიქნებით" - წერს ყორშია.