"ეს არის რამდენიმე თაღლითი ადამიანის გადაწყვეტილება" - აფხაზეთის მორიგი საჩუქარი რუსეთს: როგორ ეხმაურებიან ადგილობრივები სოხუმის აეროპორტის რუსეთისთვის გადაცემას?
აფხაზური მედიის ცნობით, ე.წ. ადგილობრივმა პარლამენტმა აფხაზეთისა და რუსეთის ხელისუფლებებს შორის სოხუმის საერთაშორისო აეროპორტის აღდგენის ფარგლებში, მთავრობათაშორისი შეთანხმების რატიფიკაცია მოახდინა, რაც ნიშნავს, რომ აეროპორტი 49 წლით, სამართავად რუსულ კომპანიებს გადაეცა.
"დოკუმენტი პარლამენტში პრეზიდენტის წარმომადგენელმა და იუსტიციის მინისტრმა, ანრი ბარციცმა წარადგინა... მას 30 დეპუტატიდან ორმა არ მისცა ხმა, ერთმა კი, თავი შეიკავა" - წერს გამოცემა abkhaz-auto.ru.
გამოცემის ცნობით, ამ კანონის ფარგლებში, სოხუმის აეროპორტი რუს ინვესტორს, რუსულ იურიდიულ კომპანიებს, კერძო პირებს ან ორგანიზაციებს გადაეცემა, რომლის ფარგლებშიც მათ შეეძლებათ, აღადგინონ და 49 წლის განმავლობაში, შეღავათიანი პირობებით მართონ სოხუმის აეროპორტი.
ოკუპირებული აფხაზეთის ლიდერის, ასლან ბჟანიას თქმით, აეროპორტის აღდგენა სამი ათეული წლის განმავლობაში ადგილობრივი მოსახლეობის მოთხოვნა იყო.
- განსხვავებულ პოზიციაზეა ადგილობრივი პოლიტიკური საზოგადოების ნაწილი, მათი მოსაზრებით, ეს გადაწყვეტილება აფხაზეთის რუსეთისთვის ჩაბარებას და მოსახლეობის მონურ მდგომარეობაში ჩაყენებას ნიშნავს.
"სოხუმის აეროპორტის რუსეთისთვის გადაცემა მხოლოდ რუსეთისა და აფხაზეთის ხელისუფლების ცალკეულ პირთა ინტერესებში შედის... ინვესტიციის სავარაუდო მოცულობა - 6- 10 მლრდ რუბლია, იჯარის ვადა 49 წელია, თუმცა პირველი 25 წელი გადასახადებისგან თავისუფალი, შეღავათიანი პერიოდია.
ამასთან, ინვესტორს გადაეცემა როგორც აეროპორტის ინფრასტრუქტურა, ასევე საჭიროების შემთხვევაში, მიმდებარე ტერიტორიები და მასზე განთავსებული შენობა-ნაგებობები... თავის მხრივ, აფხაზური მხარე თავის თავზე იღებს აეროპორტამდე მიიყვანოს გზა, აეროპორტის შენობაში შეიყვანოს ელექტროენერგია და კაპიტალური რემონტი ჩაუტაროს აგუძერისა და დრანდის ქვესადგურებს" - წერს გამოცემა.
მისივე ცნობით, პროექტის განხორციელების სურვილი უკვე გამოთქვა რამდენიმე ინვესტორმა. ადგილობრივების თქმით, ერთ-ერთი და ყველაზე რეალური, მილიარდერი დერიპასკაა, პუტინის ახლო გარემოცვის წევრი და უძრავი ქონების მაგნატი.
თუმცა, აფხაზეთში საუბრობდნენ, რომ მიმზიდველი პირობების შემთხვევაში, სოხუმის აეროპორტით კიდევ ერთი რუსი მილიარდერი, რომან ტროცენკოც დაინტერესდებოდა.
ადგილობრივების თქმით, რუსეთს სოხუმის აეროპორტის აღდგენა იმიტომ სურს, რომ ამჟამად რუს ტურისტებს აფხაზეთში მოხვედრა მხოლოდ სოჭის გავლით შეუძლიათ, ხოლო უკრაინის ომის დაწყების შემდეგ სოჭის აეროპორტი დარჩა ერთადერთი მოქმედი რუსული აეროპორტი, რომელიც შავი ზღვის კურორტებზე მდებარეობს.
სოხუმის აეროპორტის ფართობი დაახლოებით 10 ათასი კვადრატული მეტრია, რაც აღემატება ვლადიკავკაზის ახალი აეროპორტის ტერიტორიას.
აფხაზეთის ვეტერანთა და მოქალაქეთა საზოგადოებრივი გაერთიანების "აიააირას“ წარმომადგენლის ბესლან ინაფშბას თქმით, ეს შეთანხმება კი არა, მონური ხელშეკრულებაა, რომელიც საბოლოოდ ჩამოართმევს აფხაზეთს, როგორც აეროპორტს, ასევე, მის მიმდებარე ტერიტორიებს, აფხაზეთის მოქალაქეების არაერთ თაობას დაუკარგავს ფინანსურ დამოუკიდებლობას.
"კაბალური შეთანხმებაა, ასეთივე პირობებით - რუს ინვესტორებს ყველაფერი მივყიდეთ, მიწა, შენობა-ნაგებობა, თანაც შეღავათიანი ფასში და თან მადლობელი უნდა ვიყო, რადგან თურმე ალტერნატივა არ გვქონდა... აეროპორტი 2024 წლის ბოლოსთვის ამოქმედდება და პირველ ეტაპზე წელიწადში 375 ათასამდე მგზავრს გაატარებსო, ოღონდ დაავიწყდათ ეთქვათ, რომ მხოლოდ ცალმხრივად", - წერს ინესა ბერია.
"იმედია, შემდგომი ხელისუფლება ძალიან მალე მოვა და თქვენს დანაშაულებრივ გადაწყვეტილებებს გააუქმებს... ეს არის რამდენიმე თაღლითი ადამიანის გადაწყვეტილება, როგორც აფხაზეთში, ასევე რუსეთში. რუსეთი თავის საქმეს გააკეთებს, რამდენიმე ჩვენი თანამემამულე კი, რომლებმაც პარლამენტში მსხდომი ქვეყნის მოღალატე დეპუტატები მოისყიდეს, უფრო გამდიდრდებიან... ასეთ აფხაზეთის ცხოვრებას, 90-იან წლებში გმირული სიკვდილი ჯობდა, ასე შერცხვენილი, გაყიდული და დაჩაჩანაკებული აფხაზი ხალხის ნახვას" - წერს იასონ აფხაზი.