პეტერბურგში ხელი მოეწერა შეთანხმებას, სოხუმის აეროპორტის აღდგენასთან დაკავშირებით - რა პირობებზე შეუთანხმდა აფხაზეთი რუსეთს?
რუსეთის ქალაქ პეტერბურგში, რუსეთის ეკონომიკის მინისტრმა მაქსიმ რეშეტნიკოვმა და ოკუპირებული აფხაზეთის ე.წ. ეკონომიკის მინისტრმა ქრისტინა ოზგანმა, ეკონომიკური ფორუმის ფარგლებში, “სოხუმის არძინბას სახელობის საერთაშორისო აეროპორტის” აღდგენის შესახებ შეთანხმებას ხელი მოაწერეს. ამის შესახებ ინფორმაციას Апсныпресс ავრცელებს.
- გამოცემის ცნობით, რუსეთში ხელმოწერილი შეთანხმების თანახმად, რუსეთი საინვესტიციო პროექტის შესრულების ყველა პირობას იღებს. აფხაზეთი კი – ობიექტების საინვესტიციო პროექტის ფარგლებში საკუთრების უფლებების დაცვის განსაკუთრებულ სახელმწიფო გარანტიებს იძლევა.
სოხუმის აეროპორტი 1993 წლიდან დაკეტილია. შესაბამისად, დახურულია საჰაერო სივრცეც. სამოქალაქო ავიაციის საერთაშორისო ორგანიზაცია (ICAO) აფხაზეთს საქართველოს შემადგენელ ნაწილად აღიარებს და არ აქვს მინიჭებული ადგილმდებარეობის განმსაზღვრელი ოთხნიშნა კოდი.
სოხუმის აეროპორტის აღდგენაზე რამდენიმე წლის წინაც იყო საუბარი, მაგრამ ადგილობრივ მოსახლეობას, ქართული მხარის პოზიციისა და იმ თანხის გამო, რომელიც აეროპორტის ინფრასტრუქტურის აღდგენას სჭირდებოდა, ამის არ სჯეროდა.
მაშინ საქართველოს საგარეო საქმეთა სამინისტროსა და სამოქალაქო ავიაციის სააგენტოში აცხადებდნენ, რომ “ოკუპირებული აფხაზეთის რეგიონში ვერ მოხდება საერთაშორისო ფრენების განხორციელება, ვინაიდან ეს ეწინააღმდეგება საერთაშორისო სამართალს, ICAO-ს წესდებას და საქართველოს კანონმდებლობას”.
ჯერჯერობით საგარეო უწყებას ამაზე კომენტარი არ გაუკეთებია. ქართული მხარიდან დაბლოკვის საფრთხეზე არც აფხაზური მხარე საუბრობს. რუსეთის ეკონომიკის მინისტრის განცხადებით კი, რუსეთსა და აფხაზეთს შორის პირდაპირი ავიამიმოსვლის აღდგენა აფხაზეთისთვის ისტორიული მოვლენაა და ტურიზმის განვითარების დიდი სტრატეგიის ნაწილი გახდება.
"რუსეთისთვის ახალი აეროპორტი ორ მნიშვნელოვან ამოცანას გადაჭრის – მოხსნის სოჭის აეროპორტისა და “ადლერის” საავტომობილო გამშვები პუნქტის დატვირთვას, რომლებიც მთავარი წერტილებია დღეს რუსეთის მოქალაქეებისთვის აფხაზეთში შესასვლელად" - ნათქვამია რუსეთის ეკონომიკის სამინისტროს განცხადებაში.
ქრისტინა ოზგანის თქმით, აეროპორტის ამუშავების შემდეგ, "აფხაზეთის ეკონომიკურ განვითარება გარდამტეხ ფაზაში შევა – გაიზრდება ტურისტების რიცხვი და გაფართოვდება აფხაზეთის შესაძლებლობები საერთაშორისო სატრანსპორტო-ლოგისტიკურ სისტემაში".
აფხაზური მედიის ცნობით, აეროპორტის ინფრასტრუქტურის აღდგენას კერძო ინვესტორი დააფინანსებს და სამუშაოები ორ ეტაპად განხორციელდება. პირველი ეტაპის ღირებულება, რომელიც ასაფრენ-დასაფრენი ზოლების მოწყობას მოიცავს, 6,5 მილიარდი რუსული რუბლი იქნება.
"მისი აღდგენა 2024 წლის ბოლოსთვის იგეგმება და წლიურად მგზავრთა ნაკადი 1,2 მილიონი იქნება" - წერს აფხაზური მედია.
ადგილობრივების აზრი ამ შემთხვევაშიც ორ ნაწილად გაიყო. არიან ისეთები, ვინც აეროპორტის ნებისმიერი პირობებით გახსნას მიესალმება, რადგან ასე რეგიონის ფუნქცია მეტ მნიშვნელობას შეიძენს, რაც მათ ეკონომიკურ მდგომარეობაზე აისახება.
სხვების თქმით, აეროპორტის აღდგენაზე საუბარი დაიწყო ახლა, მას შემდეგ რაც მთავარი მოკავშირე რუსეთი დასავლურმა სანქციებმა კუთხეში მოიმწყვდია და სავაჭრო, ეკონომიკური არეალი მაქსიმალურად შეუზღუდა...
"ორი კითხვა მაქვს - პირველი, რატომ არ არის მითითებული, ვინ არის კერძო ინვესტორი და მეორე - აფხაზეთის წილი რამდენია ბუნდოვნად არის მითითებული, წილის რამდენი პროცენტს ფლობს აფხაზეთი? საკონტროლო პაკეტს ჩვენ არ უნდა ვფლობდეთ?... მერამდენედ ვაკეთებთ ასეთ სისულელეს. არ ვიცით, საქმე ვისთან გვაქვს თუ ჭკუა ვერ ვისწავლეთ? ოღონდ ახლა არ მითხრათ, მთავარია, რამე აშენდესო. აღდგენასა და გაყიდვას, უფრო სწორად, მითვისებას შორის უდიდესი განსხვავებაა" - წერს აქტივისტი ასიდა აგრბა.
"ჩვენ ამისთვის ფული არ გვაქვს, ინვესტორის ვინაობა გასაიდუმლოებულია, მაგრამ უნდა გვიხაროდეს თურმე... რუსებმა რაღაც ჯგუფებში გამლანძღეს - თქვენს ბოსლებში რომ ჩამოვდივართ დასასვენებლად და ფულს ვხარჯავთ, უარესის ღირსები ვართო... როგორ გავბედე და ვიკითხე, ვინ არის ინვესტორი, მათსავით ტელევიზორში რასაც ეტყვიან, ის უნდა დავიჯერო" - წერს ასტანდა ვოზბა.
წაიკითხეთ ასევე: