"უკანასკნელი მეფაიტონე ემშვიდობება თბილისს” - სიმღერისა და უწყვეტი აპლოდისმენტების ფონზე ბუბა კიკაბიძე ფილარმონიიდან გამოასვენეს
"უკანასკნელი მეფაიტონე ემშვიდობება თბილისს”, ამ სიმღერისა და უწყვეტი აპლოდისმენტების ფონზე სახალხო არტისტი ბუბა კიკაბიძე უკანასკნელ გზაზე გააცილეს. ისმოდა შეძახილები "ბუბა, ბუბა“.
პანაშვიდი ფილარმონიის დიდ საკონცერტო დარბაზში გაიმართა, სადაც დიდი ხელოვანის ხსოვნის პატივსაცემად მოქალაქეები, პოლიტიკოსები, მომღერლები, მსახიობები და საზოგადოების სხვა წევრები მივიდნენ.
დაკრძალვაზე იმყოფებოდნენ მეზობელი ქვეყნების დელეგაციები, მათ შორის, უკრაინიდან. სამოქალაქო პანაშვიდზე სამძიმრის წერილი გამოგზავნა კათალიკოს პატრიარქმა ილია მეორემ.
ბუბა კიკაბიძეს ყვავილების გვირგვინით პატივი მიაგეს უკრაინაში მებრძოლმა ქართველმა მეომრებმა.
პანაშვიდის მიმდინარეობისას ისმოდა მომღერლის მიერ შესრულებული სიმღერები, მათ შორის კინოფილმიდან “მიმინო”.
ბუბა კიკაბიძეს მისი ანდერძის თანახმად, ვერის სასაფლაოზე დაკრძალავენ. ის კვირას 84 წლის ასაკში გარდაიცვალა.
ფოტო: გიორგი ჟამერაშვილი/„ინტერპრესნიუსი"
ნახეთ ვიდეო: