"ომის პირველივე დღიდან ვამბობდი, რომ არესტოვიჩი არის საკუთარ თავზე შეყვარებული საქონელი" - სკანდალი არესტოვიჩის გარშემო: რა განაცხადა და რით იმართლებს თავს?
14 იანვარს რუსმა ოკუპანტებმა უკრაინაზე მასობრივი შეტევა მიიტანეს, რის შედეგადაც დნიპროში ცხრასართულიანი საცხოვრებელი კორპუსის ორი სადარბაზო ჩამოინგრა. შედეგად 30-მდე ადამიანი დაიღუპა და 70-ზე მეტი დაშავდა. იმავე დღეს საღამოს, უკრაინის პრეზიდენტის ოფისის მრჩეველმა ოლექსეი არესტოვიჩმა განაცხადა, რომ რაკეტა, რომელიც დნიპროში ცხრასართულიან საცხოვრებელ კორპუსს მოხვდა, სავარაუდოდ, უკრაინის საჰაერო თავდაცვის ძალებმა ჩამოაგდეს.
"ჩამოაგდეს, ვერანდაზე დაეცა. დაცემისას აფეთქდა“, - განაცხადა არესტოვიჩმა მარკ ფეიგინის გადაცემაში YouTube-ის არხზე.
მისივე თქმით X-22-ის ტიპის რაკეტა ტოქსიკურ საწვავზე მუშაობს და სავარაუდოდ, განადგურების დამატებით ელემენტად სწორედ ეს იქცა.
"რაკეტა ჩამოაგდეს, ის სადარბაზოს დაეცა და აფეთქდა. "X-22" ტიპის რაკეტა, რომელიც უკიდურესად ტოქსიკურ საწვავზე მუშაობს. შეგვიძლია ვივარაუდოთ, რომ განადგურების დამატებით ელემენტად სწორედ ტოქსიკური საწვავი იქცა, - აცხადებს უკრაინის პრეზიდენტის ოფისის ხელმძღვანელის მრჩეველი ოლექსი არესტოვიჩი.
არესტოვიჩის განცხადება იმის შესახებ, რომ რაკეტა უკრაინის საჰაერო თავდაცვის ძალებმა "ჩამოაგდეს", რუსულმა მედიამ აქტიურად გააშუქა.
დნიპროს მერმა ბორის ფილატოვმა თავის "ტელეგრამ არხზე" მწვავედ გააკრიტიკა ოლექსეი არესტოვიჩი.
"ომის პირველივე დღიდან ვამბობდი, რომ არესტოვიჩი არის საკუთარ თავზე შეყვარებული საქონელი... მაგრამ პრეზიდენტის აპარატში ვიღაც აშკარად ფსონს დებს მასზე. უკაცრავად, მე ვერ გავუწიე წინააღმდეგობა, მაგრამ უშიშროების სამსახური და კონტრდაზვერვა ვალდებულნი არიან უპასუხონ“, - წერს ფილატოვი.
ფილატოვმა არესტოვიჩს "ბოროტი" და "ვოლანდი" უწოდა.
უკრაინის შეიარაღებული ძალების საჰაერო ძალების სარდალმა, გენერალ-ლეიტენანტმა მიკოლა ოლეშჩუკმა, თავის მხრივ, განაცხადა, რომ უკრაინის შეიარაღებულ ძალებს "არ აქვთ ცეცხლსასროლი იარაღი, რომელსაც შეუძლია ამ ტიპის რაკეტების ჩამოგდება“. ოლეშჩუკმა ასევე განაცხადა, რომ მრავალსართულიან შენობას მოხვდა X-22 რაკეტა, რომელიც კურსკის ოლქიდან იყო გაშვებული.
15 იანვრის ღამეს არესტოვიჩმა კიდევ ერთი განცხადება გააკეთა. მისი თქმით, "არავინ დაადანაშაულებს უკრაინას საცხოვრებელ კორპუსზე რაკეტის ჩამოვარდნაში".
"რუსეთის ფედერაციის დანაშაული ცალსახაა და არ შეიძლება იყოს ეს ბუნდოვანი. ყველას კარგად ესმის, რომ თუ არ იქნებოდა რუსული დარტყმა, არ იქნებოდა ტრაგედია...“- დაწერა მან სოციალურ ქსელში.
მოგვიანებით, არესტოვიჩმა გამოაქვეყნა ახალი განცხადება, რომელშიც განმარტა, რომ ინფორმაცია მას მიაწოდა "ამხანაგმა, PVE-ს ყოფილმა ჯარისკაცმა“, რომელიც თავდასხმის დროს ქუჩაში იმყოფებოდა.
"მან მითხრა, რომ 100%-ით გაიგო ორი აფეთქების ხმა. აქამდე ის არ შემცდარა და დარწმუნებული ვიყავი, რომ რაკეტა ჩამოგდებული იყო“, - წერს არესტოვიჩი.
უკრაინის პრეზიდენტის ოფისის მრჩეველმა აღნიშნა, რომ მარკ ფეიგინთან ინტერვიუს დროს, გადაღლილი იყო და ძლივს ლაპარაკობდა.
"ხალხო, უბრალოდ, დავიღალე. 320 -ე დღეა ყოველ საღამოს პირდაპირ ეთერში ვარ, დანარჩენ სამუშაოს თუ არ ჩავთვლით, ამას ემატება: ძილის მუდმივი ნაკლებობა, ინფორმაციით გადატვირთვა, მივლინებები. მილიონობით კონტაქტი დღეში”, - თავს იმართლებს არესტოვიჩი.
უკრაინის შეიარაღებული ძალების საჰაერო ძალების სარდლობის წარმომადგენელმა, პოლკოვნიკმა იური იგნატმა უკრაინული ტელემარათონის ეთერში განაცხადა, რომ საჰაერო ძალები მოუწოდებენ ყველას, ფრთხილად იყვნენ უკრაინის საჰაერო თავდაცვის ძალების მუშაობის კომენტარებისას .
"ხედავთ, რა ხდება დნიპროში, რუსული პროპაგანდა ოსტატურად იყენებს ხელისუფლებაში ჩართული ნებისმიერი ადამიანის და სხვათა განცხადებებს ჩვენს წინააღმდეგ საინფორმაციო ომის საწარმოებლად“, - თქვა მან.