23
აპრილიდღის ზოგადი ასტროლოგიური პროგნოზი
ქართული კულტურისა და სამზარეულოს შესახებ უცხოურ მედიაში კიდევ ერთი ვრცელი სტატია გამოქვეყნდა. საერთაშორისო გამოცემა ბლუმბერგი ხაჭაპურის შესახებ სტატიას ასე იწყებს: „თუ გურმანებს ჰკითხავთ, რა არის ის ერთი რამ, რაც შავიზღვისპირა ქვეყნის - საქართველოს შესახებ იციან, გიპასუხებენ, რომ მათ შექმნეს ხაჭაპური“.
სტატიის ავტორი წერს, რომ ფანტასტიკური მდნარი ყველითა და კვერცხით სავსე პურს, რომლის საუკეთესო აღწერა „ყველის ნავი“ იქნებოდა, ტრადიციული, უცვლელი სახით მიირთმევენ უცხოეთში და წლებია, ის საერთაშორისო სოციალური მედიის ყურადღების ცენტრშიც მოექცა. ხაჭაპურის დასაგემოვნებლად ერთ-ერთ საუკეთესო ადგილის მაგალითად კი არტიზანული საცხობი „გუნდა“ მოჰყავს.
AMBEBI.GE გთავაზობთ ამონარიდებს „ბლუმბერგის“ სტატიიდან.
„საქართველოში ფაქტობრივად შეუძლებელია იპოვო რესტორანი, კაფე ან გზისპირა კვების ობიექტი, სადაც არ ამზადებენ ადგილობრივების საყვარელ და იმ პირველ კერძს, რომელსაც ტურისტები ქვეყანაში ჩამოსვლისთანავე უკვეთენ. ქვეყნის მასშტაბით ხაჭაპურის ცომს სხვადასხვა ფორმით ამზადებენ. მისი გულსართი უმეტესად ძროხის რძის ყველი, ზემოდან კი კვერცხის მოუმზადებელი გულია. კერძი იჭმება ცხელ მდგომარეობაში და ხელით.
2019 წელს ხაჭაპური საქართველოს კულტურული მემკვიდრეობის დაცვის ეროვნულმა სააგენტომ კულტურული მემკვიდრეობის სიაში შეიყვანა. კერძი იმდენად პოპულარულია, რომ TSU-ის (ISET) საერთაშორისო ეკონომიკური სკოლა ინფლაციას ხაჭაპურის ინგრედიენტების ფასების მიხედვით ითვლის: ფქვილი, ყველი, სოკო, რძე, კვერცხი და კარაქი“.
გამოცემა წერს, რომ ახლა ქართული ტრადიციული კერძი მნიშვნელოვან განახლებას იწყებს:
„გუნდა“, ახალი საცხობი და კაფე თბილისში, ხაჭაპურისთვის სწრაფი კვებისთვის დამახასიათებელი ფორმის მიცემით, ცვლის კერძის ფუნდამენტურ კონცეფციას. ისინი ასევე უკრაინაში მიმდინარე ომის გამო ზღუდავენ რუსული ფქვილის გამოყენებას ხაჭაპურში. „გუნდა“ ნიშნავს ფუმფულა ცომის ბურთს და მისი სახელწოდების საცხობი მდებარეობს თბილისის ისტორიულ ნაწილში. „გუნდას“ პიტნისფერი კარი, რომელსაც ქვაფენილ გორაკზე დაინახავთ, მაშინვე მიიქცევს თქვენს ყურადღებას.
საცხობის ინტერიერი თანამედროვე და ვინტაჟურ ევროპულ სტილშია გადაწყვეტილი, თავისი ხავერდის სკამებით, ანტიკური სტილის აგურით, ახალი ყავის აპარატითა და ღია სამზარეულოთი, სადაც შეფების საქმიანობას შეგიძლიათ მიადევნოთ თვალი. „გუნდაში“ შესაძლებელია მინი დესერტების დაგემოვნებაც, მათ შორის ჩირისა და ტრიუფელისაც, თუმცა საცხობის სლოგანი ასეთია: „ჩვენ ვამზადებთ ხაჭაპურს“ და მათი ბიზნესიც სწორედ ამაზეა აწყობილი. აქ შეგიძლიათ შეიძინოთ ხაჭაპურის თემატიკით დაპრინტული ქუდები, ჭიქები და სხვა კერძის ფორმის სუვენირები. მომხმარებლებს ასევე შეუძლიათ გამზადებული ცომის შეძენა და ხაჭაპურის სახლში მომზადება“, - ნათქვამია სტატიაში.
ავტორი მკითხველს უამბობს, რომ „გუნდამ“ შექმნა პეტიცია და აგროვებს ხელმოწერებს, რათა ხაჭაპური იუნესკო-ს არამატერიალური მემკვიდრეობის სიაში მოხვდეს, როგორც ეს ფრანგული ბაგეტის შემთხვევაში მოხდა.
„ბლუმბერგი“ მკითხველს „გუნდას“ დამფუძნებლების შესახებაც აწვდის ინფორმაციას:
„2017 წელს „გუნდას“ გუნდმა: ლალი პაპაშვილმა, ლევან ქოქიაშვილმა, ნანა დოლიძემ და ინგა კვერნაძემ გადაწყვიტეს, დაერღვიათ ტრადიცია და ხაჭაპური დღევანდელ ცხოვრების წესზე მოერგოთ.
2022 წლის ოქტომბერში კი გაიხსნა „გუნდა“, სადაც შეგიძლიათ შეიძინოთ კომფორტულ ყუთებში მოთავსებული ხაჭაპური როგორც მთლიანად, ისე ერთი ნაჭერი, რომელსაც სპეციალურ ქაღალდში შეგიხვევენ. ყველაზე პოპულარული ხაჭაპური არის მეგრული, იმერული და მესხური, რომელსაც შეძენისთანავე მიიღებთ, „ყველის ნავს“ კი 15 წუთით უნდა დაელოდოთ“, - წერს „ბლუმბერგი“.
გამოცემა იუწყება, რომ „გუნდა“ გახსნისთანავე პოპულარული გახდა და დღის განმავლობაში უკვე დაახლოებით 100 ხაჭაპურს ყიდის, მომავალ თვეებში კი რაოდენობის გასამმაგებას გეგმავს. „ბლუმბერგი“ საცხობის სამომავლო გეგმებზეც იუწყება: „გუნდა“ გეგმავს, რომ ჯერ ნიუ-იორკში, შემდეგ კი სხვა ქალაქებში, გლობალურად გაფართოვდეს. ჩვეულებრივი კომერციული ხაჭაპურისგან განსხვავებით, „გუნდას“ ხაჭაპური ინდუსტრიული ფქვილისა და ყველისგან არ მზადდება. ყველა ინგრედიენტი ორგანული პროდუქციის ფერმებიდან არის მოწოდებული“, - ნათქვამია სტატიაში. ავტორი აღნიშნავს, რომ „გუნდას“ გუნდმა კვლევისას ხაჭაპურის 47 სახეობა აღმოაჩინა, რომელთაც განსხვავებული გულსართი აქვს. დღეს საცხობი მათგან 41-ს ამზადებს. გამოცემა მკითხველს უზიარებს, რომ ყველაზე გემრიელი იმერული და მეგრული ვერსიებია.
ჯიგარი ხარ მამედ, კარგად გამაცინე.
"ფასტფუდის" თურქულ ამერიკული სასაჭმელოები დინგში და ჩიჩვირში მავთულგაყრილი გოგობიჭებით არის სავსე .