"არ მესმის, როგორ არის ჩემი 2 წლის შვილი ლატვიის ეროვნული უსაფრთხოებისთვის საფრთხე" - რატომ შეუწყვიტა ლიცენზია ლატვიამ ტელეკომპანია "დოჟდს" და რას აცხადებს ეკატერინე კოტრიკაძე?

ამ ცოტა ხნის წინ ცნობილი გახდა, რომ ლატვიის ელექტრონული მედიის ეროვნულმა საბჭომ (NEPLP) ტელეკომპანია "დოჟდს“ მაუწყებლობის ლიცენზია გაუუქმა. საბჭოს თავმჯდომარემ ივარს აბოლინშმა განაცხადა, რომ ეს გადაწყვეტილება სპეციალურ სხდომაზე, არსებული ვითარების შეფასების შემდეგ მიიღეს.

"გადაწყვეტილება მიღებულია "სახელმწიფო უსაფრთხოებისა და საზოგადოებრივი წესრიგის“ გათვალისწინებით...“ - დასძინა აბოლინშმა.

• როგორ მოხვდა "დოჟდი“ ლატვიაში

ომის დაწყების შემდეგ, “დოჟდი” რუსეთის ხელისუფლებამ დაბლოკა ომის კრიტიკულად გაშუქების გამო. საბოლოოდ, კი ტელეარხი იძულებული გახდა, დროებით შეეჩერებინა მუშაობა. ივნისში ცნობილი გახდა, რომ ოპოზიციურმა რუსულმა ტელეკომპანიამ ლატვიაში მაუწყებლობის ლიცენზია მიიღო.

• რა მოხდა 1 - ელ დეკემბერს?

მას შემდეგ, რაც არხმა ლატვიიდან განაგრძო მაუწყებლობა, არაერთ სკანდალში გაეხვა. აგვისტოში ლატვიის მასობრივი ინფორმაციის ელექტრონული საშუალებების საბჭომ ტელეარხი 10 000 ევროთი დააჯარიმა, ანექსირებული ყირიმის რუკის რუსეთის შემადგენლობაში და რუსულ ჯართან მიმართებაში სიტყვა "ჩვენის“ გამოყენების გამო.

2 დეკემბერს ლატვიის უშიშროების სამსახურმა, "დოჟდის“ მიმართ გამოძიება დაიწყო და აღნიშნა, რომ უკრაინაში რუსეთის სამხედრო შეჭრის ნებისმიერი მხარდაჭერა მიუღებელია მედიაორგანიზაციისთვის, რომელიც ლატვიაში მუშაობს.

1 - ელ დეკემბერს საღამოს ტელეკომპანიის პირდაპირ ეთერში, გადაცემაში "აქ და ახლა“, ჟურნალისტმა ალექსი კოროსტილიოვმა მაყურებელს მოუწოდა, რომ მობილიზაციის დროს მომხდარი დარღვევების თაობაზე აცნობონ ტელეკომპანიას, რომელსაც შეუძლია აღჭურვილობით დაეხმაროს ფრონტზე მყოფ რუს ჯარისკაცებს.

2 დეკემბერს, არხმა ტელეწამყვან ალექსეი კოროსტილიოვთან თანამშრომლობა შეწყვიტა.

"დღეიდან ჩვენ გადავწყვიტეთ ალექსეი კოროსტილიოვთან თანამშრომლობის შეწყვეტა. ეს ჩვენთვის ძალიან რთული გადაწყვეტილებაა, მაგრამ "დოჟდის“ მენეჯმენტი ამას ერთადერთ სწორ და შესაძლებელ გადაწყვეტილებად მიიჩნევს", - განაცხადა მაშინ ტელეკომპანიის საინფორმაციო სამსახურის უფროსმა ეკატერინე კოტრიკაძემ.

არხის მთავარი რედაქტორის, ტიხონ ძიატკოს თქმით კი "ის რუსეთის არმიას არ უწევდა, არ უწევს და არც გაუწევს დახმარებას“.

მომხდარზე განმარტება "ტელეგრამარხზე" გააკეთა ალექსი კოროსტილიოვმა. ის წერს, რომ მას რუსეთის არმიისთვის დახმარების მოთხოვნით არასოდეს მიუმართავს. ის მობილიზებულებს მხოლოდ იმით ეხმარება, რომ მათზე საუბრობს.

"მე ამის კეთებას გავაგრძელებ ჩემი შესაძლებლობების ფარგლებში. ომის წინააღმდეგი ვარ, ამიტომაც ცხრა თვეა, რუსეთში არ ვცხოვრობ - უცნაურია ჩემში ეჭვის შეტანა, თითქოს შეჭრას ვემხრობოდე. სისულელეა“, - წერს ჟურნალისტი.

კოროსტილიოვის გათავისუფლების შემდეგ, "დოჟდი" კიდევ ორმა ჟურნალისტმა, ვლადიმირ რომენსკიმ და მარგარიტა ლიუტოვამ დატოვა.

საინფორმაციო სამსახურის უფროსმა და ტელეკომპანია "დოჟდის“ წამყვანმა ეკატერინა კოტრიკაძემ რუსული LRT-სთვის მიცემულ ინტერვიუში განაცხადა, რომ NEPLP-ის ბრალდებებს უსაფუძვლოდ მიიჩნევს და ამბობს, რომ ჯერ არ იცის, როგორ იმუშავებს არხი შემდგომ.

"ეს ამბავი ძალიან ცუდად მივიღეთ, უბრალოდ, ძალიან ცუდად... მოგეხსენებათ, კომისიის სხდომა დილას დაინიშნა და გადაწყვეტილებაც სწრაფად მიიღეს. ძალიან გაგვიკვირდა და რბილად რომ ვთქვათ, არ ველოდით. ტელეკომპანია "დოჟდი“ ოფიციალურად იყო მიწვეული ლატვიის ხელისუფლების მიერ ლატვიაში. მათ არ ჰქონიათ მცდელობა, რომ მოესმინათ ჩვენგან განმარტებები. ამ შეხვედრაზე ტელეკომპანია "დოჟდის“ არცერთი წარმომადგენელი არ ყოფილა მიწვეული.

ვხედავთ, რომ არ ყოფილა ასეთი განხილვა, არ ყოფილა დისკუსია, მიიღეს პოლიტიკური გადაწყვეტილება, ეს ჩვენთვის უკიდურესად უსიამოვნო და ძალიან შეურაცხმყოფელია…

ამ გადაწყვეტილებაში არის ფორმულირება, რომელიც ყურადღებით წავიკითხე, "საფრთხეს უქმნის ლატვიის ეროვნულ უსაფრთხოებას“. სერიოზულად მაინტერესებს, უბრალოდ, მოქმედებების ლოგიკის გაგება მინდა...

ყირიმის რუკის ჩვენების შემთხვევაშიც სრულად ავუხსენით ჩვენი პოზიცია ამ საკითხთან დაკავშირებით ლატვიის მარეგულირებელ ორგანოებს.

ყირიმის რუკა შეცდომით გავიდა, რადგან ყველა მასალა, რომელიც მაშინ გადიოდა ეთერში, ტექნიკურად გაუმართავი იყო. ჩვენ ხელახლა შევიკრიბეთ მას შემდეგ, რაც რუსეთის ხელისუფლებამ გამოგვაძევა რუსეთის ფედერაციიდან. ეჭვი, რომ რუსეთის ფედერაციის მიერ უცხო ტერიტორიის ანექსიის მხარდამჭერები ვართ, აბსურდია. რუსეთის მიერ ყირიმის ანექსიის დაწყებიდან, ჩვენ პირდაპირ და ძალიან მკაფიოდ ვთქვით ჩვენი პოზიცია, ყოველთვის ვლაპარაკობდით საერთაშორისო სამართლის დარღვევაზე. მაგრამ ეს დიზაინერის შეცდომა იყო, რომელმაც პროგრამა სხვა ქალაქში დაამონტაჟა. ეს იყო ჩემი გადაცემა, მე იმ მომენტში ვხელმძღვანელობდი გადაცემას.

ეს იყო დიზაინერის შეცდომა, ეს არ არის ტელეკომპანია "დოჟდის“ პოზიცია და მით უმეტეს, რომ ჩვენ არ წარმოვადგენთ საფრთხეს ლატვიის სახელმწიფოს ეროვნული უსაფრთხოებისთვის...

რაც შეეხება ბოლო შემთხვევას, ბოდიში მოვიხადეთ, სრულად ავიღეთ პასუხისმგებლობა და გავათავისუფლეთ ტელეკომპანია "დოჟდის“ თანამშრომელი, რომელმაც ეს შეცდომა, რბილად რომ ვთქვათ, დაუშვა. რამდენიმე განცხადება გავაკეთეთ, მაგრამ ეს საკმარისი არ აღმოჩნდა. მეჩვენება, რომ არსებობს გლობალური პრობლემები, რაც დაკავშირებულია დემოკრატიასთან და სიტყვის თავისუფლებასთან. ყველაფერი რაც ხდება, არის სრული აბსურდი.

არ მესმის, როგორ არის ჩემი 2 წლის შვილი მიხაილ ძიადკო, ლატვიის ეროვნული უსაფრთხოებისთვის საფრთხე ან მე და ჩემი ნებისმიერი კოლეგა, რომელებიც მთელი დღის განმავლობაში ვშრომობთ და ყველაფერს ვაკეთებთ, რათა ხელი შევუწყოთ ამ საშინელი ომის დასრულებას და ყველა იმ დამნაშავის დასჯას, ვინც ეს ომი წამოიწყო უკრაინაში. იმისთვის, რომ სიმართლემ გაიმარჯვოს, რუსეთში მოსახლეობის მაქსიმალურმა რაოდენობამ უნდა გაიგოს, რა ხდება უკრაინაში და რა დანაშაულებს სჩადიან ვლადიმერ პუტინი, პროპაგანდისტები და სხვა ადამიანები, რომლებიც პასუხისმგებელნი არიან ამ სისხლიან, ამაზრზენ ბოროტებაზე, რომელიც ახლა ხდება..." - ამბობს კოტრიკაძე.

დღეს ცნობილი გახდა, რომ 8 დეკემბრიდან ტელეკომპანია "დოჟდის" მაუწყებლობა ლიეტუვაშიც შეწყდება, ამის შესახებ ინფორმაციას ლიეტუვის რადიოსა და ტელევიზიის კომისიაზე დაყრდნობით Delfi ავრცელებს.

ცნობილია, რომ ლატვიის სახელმწიფო უსაფრთხოების სამსახურმა (VDD) შინაგან საქმეთა სამინისტროს რეკომენდაცია მისცა, ტელეკომპანია "დოჟდის“ ყოფილი წამყვანი ალექსეი კოროსტილიოვი იმ პირთა "შავ სიაში" შეიყვანოს, რომლებსაც ლატვიაში შესვლა ეკრძალებათ. ინფორმაცია ლატვიის სახელმწიფო უსაფრთხოების სამსახურის ვებგვერდზეა გამოქვეყნებული.