რა მიზანი აქვს კრემლს, როდესაც უკრაინას "ბინძური ბომბის" შესაძლო გამოყენებას აბრალებს? - "პუტინს სურს ბრძოლის ველზე ტემპერატურა უფრო მაღლა აიწიოს"
რუსეთის განცხადებას, რომ უკრაინა "ბინძური ბომბის“ გამოყენებას აპირებს, აშშ-მა, დიდმა ბრიტანეთმა და საფრანგეთმა აშკარა სიცრუე უწოდეს ერთობლივ, სამთავრობო განცხადებაში, რომელიც 23 ოქტომბერს გამოქვეყნდა სახელმწიფო დეპარტამენტის ოფიციალურ ვებსაიტზე.
მანამდე რუსეთის სამხედრო უწყების ხელმძღვანელი შეეცადა თავისი კოლეგების დარწმუნებას, რომ უკრაინის ხელისუფლება, სავარაუდოდ, "ამზადებს პროვოკაციას თავისი ქვეყნის ტერიტორიაზე ეგრეთ წოდებული "ბინძური ბომბის", ან დაბალი წარმადობის ბირთვული იარაღის აფეთქებასთან დაკავშირებით", რომლის მიზანი, რუსული სააგენტოს ცნობით, რუსეთის დადანაშაულებაა მასობრივი განადგურების იარაღის გამოყენებაში.
რუსეთის მიერ წაყენებული ბრალდება უკრაინამ უარყო. ოფიციალური კიევის განცხადებით, "ბინძური ბომბის" აფეთქება შესაძლოა, თვითონ რუსეთს აქვს დაგეგმილი და სურს, შემდეგ ეს მათ გადააბრალოს.
მსოფლიოს მაქსიმალურად მკაცრი რეაგირებისკენ მოუწოდა უკრაინის პრეზიდენტმა ვოლოდიმირ ზელენსკიმ. გამოქვეყნებულ ვიდეომიმართვაში ზელენსკი აცხადებს, რომ როცა რუსეთის თავდაცვის მინისტრი "სატელეფონო კარუსელს" აწყობს, უცხოელ მინისტრებს ურეკავს და "ბინძური ბომბის" შესახებ უყვება, ყველამ კარგად იცის, რომ ყველანაირი სიბინძურის წყარო რუსეთია.
რა პოლიტიკური მიზანი აქვს კრემლს? - ამ თემაზე გვესაუბრება GIPA-ს პროფესორი გიორგი კობერიძე.
"ე.წ. ბინძური ბომბი, ზოგადად, ბირთვული იარაღის შემცველი ვარიანტია. ყველას ეშინია, რომ ეს იარაღი ტერორისტების ხელში არ აღმოჩნდეს ან არ შექმნან "ბინძური ბომბი“, რაც ნიშნავს ბირთვული ან სხვადასხვა რადიაციული ნარჩენებისაგან შექმნილ იარაღს და ბომბს, რომელიც აფეთქებისას იშლება ნაწილებად და საითაც ქარი ან წვიმა წაიღებს, იქით მოხდება რადიაციის გავრცელება. ანუ იდეაში, ეს არის საშუალება, რათა მაქსიმალური ზარალი მოვიდეს ცოცხალ ძალაზე, ადამიანებზე, რომლებიც ამ ტერიტორიაზე ან მის მიღმა ცხოვრობენ. ეს არის რადიაციული ბირთვული ნარჩენები, რომლებიც სხვადასხვა მიზნისათვის შეიძლება იქნას გამოყენებულ. მისი შედეგი კი ისაა, რომ ადამიანებს აავადებს და თანდათან კლავს.
"ბინძური ბომბი“, რა თქმა უნდა, აფეთქებაზე არ არის ორიენტირებული, ან იმაზე, რომ დიდი ნგრევა მოიტანოს.
ასეთი რამის შექმნის პოტენციალი და საშუალება, რუსეთს ნამდვილად აქვს. ბომბი რომ თავისთავად, დამზადებულ მდგომარეობაში იდოს, ასე არაა, მაგრამ მისი კუსტარულად შექმნა შეუძლია ნებისმიერ სახელმწიფოს, რომელსაც აქვს ურანიუმი და სხვა ბირთვული ნარჩენები. ეს კონკრეტული ნარჩენები დიდი რაოდენობით აქვს რუსეთს და თუ კი გადაწყვეტს, რომ შექმნას მსგავსი ტიპის ბომბი (ან თუ უკვე შექმნილი აქვს), შეუძლია უკრაინის წინააღმდეგ გამოიყენოს კიდეც, არსებობს ამის საფრთხე ნამდვილად, ამიტომაცაა ეს მუქარა საფრთხის შემცველი.
აღსანიშნია ის ფაქტი, რომ ერთი სახელმწიფოს მიერ მეორე სახელმწიფოს მიმართ ასეთი ბომბის გამოყენების პრეცედენტი მსოფლიოში არსად ყოფილა. ტერორისტულ ჯგუფებსა და ორგანიზაციებს კი ჰქონიათ ამისი მცდელობა - ქიმიური, ან ბიოლოგიური იარაღის გარკვეული ნარჩენები გამოეყენებინათ მეტროში ან სადმე, მაგრამ მასშტაბური განადგურებისთვის მსგავსი რამ არასდროს მომხდარა".
როგორც პოლიტოლოგი ამბობს, პუტინი ამ ახალ საინფორმაციო კამპანიასაც შანტაჟისთვის იყენებს და ტესტავს მსოფლიოს. გიორგი კობერიძე იმასაც დასძენს, რომ რუსეთისგან არაფერია გამორიცხული.
"რუსეთი და პუტინი იმდენად ხშირად მიმართავს ტერორსა და შანატაჟს, ეს შეიძლება ასეთივე ჩვეულებრივი შანტაჟი იყოს, მაგრამ აქ მეორე გარემოებაცაა - შეიძლება ჩავთვალოთ, რომ ის ამ ვითარებას ტესტავს, ანუ ამ საინფორმაციო კამპანიას იმისთვის იყენებს, რომ გაიგოს, როგორი იქნება დასავლეთის რეაქცია, თუ კი ასეთი რამ მართლა მოხდებოდა. რეაქცია უკვე იყო მკაცრი და მათ მიიღეს პასუხი, გააგებინეს, რომ ვერავინ ვერავის ვერაფერს მოატყუებს, ამას არავინ დაიჯერებს. თუმცა რუსეთის მხრიდან არაფერს გამოვრიცხავ, მაგრამ ეს ნაკლებად სავარაუდოა თუნდაც იმიტომ, რომ ნაკლებად პროგნოზირებადია, მისი გამოყენების შემთხვევაში სად, როგორ და რა მიმართულებით გავრცელდება რადიაცია. იმდენად დიდი ხანია, რაც რუსეთი ფსიქოლოგიურ ტერორს აწარმოებს, რომ ვფიქრობ, თითქოს ადამიანები ამას შეეჩვივნენ და ამ ყველაფერზე პუტინი ახალ-ახალ რაღაცეებს ამატებს, რათა ბრძოლის ველზე ტემპერატურა უფრო მაღლა აიწიოს. ეს განცხადება შიდა მოხმარებაზეც იყო ორიენტირებული და მოსახლეობის დაშინებაზეცაა გათვლილი, თითქოს, აი, რა საშინელებას გვიპირებენ უკრაინელები", - ამბობს პოლიტოლოგი.
იხილეთ ასევე: