"ჯო ბაიდენის გაერო-ს გენერალურ ასამბლეაზე გამოსვლა აბსოლუტურად უხამსად მიმაჩნია" - ზახაროვა
რუსეთის საგარეო საქმეთა სამინისტროს პრესსპიკერი, მარია ზახაროვა აცხადებს, რომ აშშ-ის პრეზიდენტის, ჯო ბაიდენის გაერო-ს გენერალურ ასამბლეაზე გამოსვლა „უხამსი“ იყო, რადგან მან პრეზიდენტ ვლადიმერ პუტინის სიტყვების არასწორი ციტირება მოახდინა.
"რაც შეეხება შეერთებული შტატების პრეზიდენტის გამოსვლას, აბსოლუტურად უხამსად მიმაჩნია, რითაც ის დაიწყო. საქმე იმაშია, რომ მან დაიწყო ვითომ რუსეთის პრეზიდენტის ციტირებით და რუსეთის პრეზიდენტს მიაწერა სიტყვები, რომ ჩვენი ქვეყანა მსოფლიოს ბირთვული იარაღით ემუქრება“, - აღნიშნა ზახაროვამ.
მისი თქმით, ბაიდენისა და დასავლური მედიის პროპაგანდა "ეწინააღმდეგება იმას, რაც რეალურად ითქვა".
- შეგახსენებთ, აშშ-ს პრეზიდენტის, ჯო ბაიდენის განცხადებით, რუსეთის ომი არის უკრაინის, როგორც სახელმწიფოსა და როგორც ხალხის უფლების არსებობის მოსპობა.
ბაიდენმა პუტინის ციტატა გაიხსენა, სადაც რუსეთის პრეზიდენტი ამბობს, რომ უკრაინა რუსეთმა შექმნა და მას ნამდვილი სახელმწიფოებრიობა არასდროს ჰქონია.
"ახლა ჩვენ ვხედავთ თავდასხმებს სკოლებზე, რკინიგზის სადგურებზე, საავადმყოფოებზე... კიდევ უფრო შემზარავ მტკიცებულებას რუსეთის ომის დანაშაულების შესახებ", - დასძინა ბაიდენმა.
მანვე ყურადღება გაამახვილა იზიუმში რამდენიმე დღუს წინ აღმოჩენილ მასობრივ საფლავებზე.
"ვინც არ უნდა იყოთ, სადაც არ უნდა ცხოვრობდეთ, რისიც არ უნდა გჯეროდეთ - ამან უნდა გაგიყინოთ სიხლი ძარღვებში. ამიტომ გენერალურ ასამბლეაში 141 ქვეყანა შეიკრიბა, რათა ერთხმად დავგმოთ რუსეთის ომი უკრაინის წინააღმდეგ“ , - დასძინა მან.
პრეზიდეენტის თქმით, აშშ მუშაობს მსოფლიოს სხვა ქვეყნებთან, რათა დაიცვას ერები „იძულების ან ბატონობისგან და უზრუნველყოს, რომ არცერთ ქვეყანას არ შეუძლია გამოიყენოს ენერგია იარაღად“.
პრეზიდენტი ბაიდენი მოუწოდებს ყველა ქვეყანას, ხელახლა გამოხატონ ვალდებულება დიპლომატიური გზით გააძლიერონ ბირთვული იარაღის გაუვრცელებლობის რეჟიმი.
"ბირთვული ომი არ შეიძლება მოიგონ და ბირთვული ომი არ უნდა მოხდეს“, - დასძინა მან.
მისი თქმით, რუსეთი უპასუხისმგებლო მუქარას ახორციელებს ბირთვული იარაღის გამოყენებით.
ჯო ბაიდენმა გამოსვლა მსოფლიოს ქვეყნების მიერ ადამიანის უფლებების დაცვის აუცილებლობაზე საუბრით დაასრულა.
"მომავალს მოიგებენ ის ქვეყნები, რომლებიც მოსახლეობის სრულ პოტენციალს გამოიყენებენ. გამოწვევები, რომლებსაც დღეს ვაწყდებით, მართლაც დიდია. ჩვენ არ ვართ ისტორიის პასიური მოწმეები, ჩვენ ვართ ისტორიის ავტორები. ჩვენ შეგვიძლია ამის გაკეთება, ჩვენ ეს უნდა გავაკეთოთ, საკუთარი თავისთვის და მომავლისთვის, კაცობრიობისთვის “, - განაცხადა ბაიდენმა.