13
აპრილიდღის ზოგადი ასტროლოგიური პროგნოზი
"დირსის“ საცხოვრებელ კომპლექსში მომხდარი მკვლელობისა და დაჭრის საქმეზე ბრალდებულ გრიგოლ დოჩიას, ასევე ამავე დანაშაულის შეუტყობინებლობის ბრალდებით დაკავებულ მის ნათესავ ილია აბლოთიას აღკვეთის ღონისძიების სახით პატიმრობა შეეფარდათ. აღნიშნული გადაწყვეტილება თბილისის საქალაქო სასამართლოს მოსამართლე რომეო ტყეშელაშვილმა მიიღო.
პროკურატურა დაკავებულის მიმართ ყველაზე მკაცრი აღკვეთის ღონისძიების, პატიმრობის გამოყენებას ითხოვდა. როგორც საქმის პროკურორი ლევან ვეფხვაძე აცხადებდა, ბრალდებულის მხრიდან არსებობდა მიმალვის, მოწმეებზე ზემოქმედების და მტკიცებულებების განადგურების საფრთხე, რის გამოც მის მიმართ ყველაზე მკაცრი აღკვეთის ღონისძიება უნდა გამოყენებულიყო.
რაც შეეხება დაცვის მხარეს, როგორც ადვოკატი გოგა ბოგვერაძე აცხადებდა, აღკვეთის ღონისძიების სახით პატიმრობის გამოყენების საფუძველი არ არსებობდა. მისივე თქმით, მისი დაცვის ქვეშ მყოფის წინააღმდეგ განხორციელდა თავდასხმა და ძალადობა და ამის შემდეგ მოხდა ბრალდებულის მხრიდან თავდამსხმელებზე რეაგირება და ის იმყოფებოდა აუცილებელი მოგერიების პირობებში. ადვოკატის თქმით, ნებისმიერ ადამიანს აქვს უფლება დაიცვას საკუთარი სიცოცხლე.
რაც შეეხება ილია აბლოთიას ადვოკატს, მარიამ შათირიშვილის თქმით, ბრალდებულის მიმართ აღკვეთის ღონისძიების სახით 8 000 ლარის ოდენობით გირაო უნდა ყოფილიყო გამოყენებული, რადგან
ილია აბლოთია გამოძიებასთან თავიდანვე თანამშრომლობდა და მისი მიმალვის ან მის მიერ მტკიცებულებების განადგურების საფრთხე არ არსებობს.
ამასთან, მოსამართლის გადაწყვეტილებით, წინასასამართლო სხდომა 2022 წლის 22 ივნისს ჩაინიშნა.
ცნობისთვის, გრიგოლ დოჩიას ბრალი საქართველოს სისხლის სამართლის კოდექსის 108-ე, 19-109-ე მუხლის მეორე ნაწილის „ბ“ და მე-3 ნაწილის "ა“ ქვეპუნქტებით, 150-ე მუხლის პირველი ნაწილით წარედგინა, რაც განზრახ მკვლელობას, (წინასწარი შეცნობით არასრულწლოვანის და ორი, ან მეტი პირის განზრახ მკვლელობის მცდელობასა და იძულებას გულისხმობს.
ილია აბლოთიას ბრალი სისხლის სამართლის კოდექსის 376-ე მუხლის მეორე ნაწილით და 375-ე მუხლის მე-3 ნაწილით წარედგინა, რაც განსაკუთრებით მძიმე დანაშაულის შეუტყობინებლობასა და განსაკუთრებით მძიმე დანაშაულის დაფარვას გულისხმობს.
...მიჰხედეთ დირსს! განუკითხაობაა სრული! ერთ დროს თბილისის საუკეთესო საცხოვრებელი კომპლექსი, მოუწესრიგებლობის და უპატრონობის სიმბოლოდ იქცა!!!