"მე და მიხეილი სამოქალაქო ქორწინებაში ვართ... საერთოდ არ მაინტერესებს მის წარსულში რა იყო" - რას ამბობს ლიზა იასკო ექსპრეზიდენტისა და სოფო ნიჟარაძის ურთიერთობაზე?
მეექვსე თვეა, რაც მიხეილ სააკაშვილი საქართველოში იმყოფება. ინფორმაცია საზღვრის გადმოკვეთის შესახებ 1 ოქტომბერს გახდა ცნობილი და მალე ექსპრეზიდენტი თბილისში, ერთ-ერთ საცხოვრებელ ბინაში დააკავეს. სააკაშვილს პოპულარობა არასოდეს აკლდა, მაგრამ ამ ექვსი თვის მანძილზე ექსპრეზიდენტის გარშემო უამრავი ახალი ინფორმაცია გავრცელდა.
საზოგადოებისთვის პირველი შოკი, მისი ახალი მეუღლის, უკრაინის რადას დეპუტატ ლიზა იასკოს წარდგენა გახლდათ. შეგახსენებთ, რომ მიხეილის დაკავების შემდეგ, ერთობლივი ვიდეო ლიზამ გაავრცელა.
შემდეგ იყო გრძელვადიანი შიმშილობა, ცუდად გახდომა და რუსთავის ციხიდან გლდანის ციხეში სკანდალური ეტაპირება. ახალ წლამდე კი ექსპრეზიდენტმა მისი და მომღერალ სოფო ნიჟარაძის საერთო ქალიშვილი საზოგადოებას წარუდგინა. ელის მარიას შესახებ სააკაშვილის მიმართვა, მისსავე ოფიციალურ გვერდზე გამოქვეყნდა.
პირველად, ორი წლის წინ მიხეილ სააკაშვილისა და ლიზა იასკოს სასიყვარულო ურთიერთობაზე უკრაინულ მედია strana.news წერდა, რამდენიმე თვის წინ მათვე გამოაქვეყნეს სტატია, სადაც წერდნენ, რომ სოფო ნიჟარაძე ზაფხულში შვილთან ერთად კიევში იმყოფებოდა.
რამდენიმე კვირის წინ კი, ჯერ კიდევ უკრაინაში ომის დაწყებამდე ლიზა იასკო ექსკლუზიურად ჩაწერეს, სადაც კითხვა სოფო ნიჟარაძისა და მიხეილ სააკაშვილის საერთო შვილზეც დაუსვეს.
სტატიაში ვკითხულობთ:
"მიხეილ სააკაშვილს უკრაინის რადას დეპუტატის ლიზა იასკოს მხარდაჭერა აქვს, მაგრამ მას შემდეგ რაც გაირკვა, რომ მიხეილ სააკაშვილს ქართველი მომღერლისგან ქალიშვილი ჰყავს, სავარაუდოდ, ძალიან განაწყენებულია".
მედიამ ლიზასგან კომენტარის ჩაწერა იტალიურ რესტორან Buffalino-ში მოახერხა.
strana.news ლიზა იასკოს სიტყვებს ციტირებს:
"მე არ ვარ ის ადამიანი, ვინც სააკაშვილის, ან სხვა ვინმეს ქორწინების გარეშე შეძენილი შვილების შესახებ კომენტარი უნდა გააკეთოს. მე და მიხეილი სამოქალაქო ქორწინებაში ვართ. ჩვენ გვაქვს ჩვენი ოჯახური გეგმები. სხვა ყველაფერი, რაც მის წარსულში იყო, მე საერთოდ არ მაინტერესებს", - ამბობს იასკო და დასძენს, რომ მიშას მრავალრიცხოვანი სასიყვარულო ურთიერთობების შესახებ ინფორმაცია მას აბსოლუტურად არ აინტერესებს.
"თუ ვინმე დაინტერესებულია სააკაშვილის პოლიტიკური სიტუაციიდან ყურადღების გადატანით, ამას წარმატებით აკეთებს. ჩემთვის მთავარია მისი სიცოცხლე და თავისუფლება და სხვა ყველა ჭორი ჩემთვის მნიშვნელოვანი არ არის" - ამბობს ლიზა.
strana.news წერს, რომ სოფიას, როგორც ჩანს, დიდი ხნის ურთიერთობა აქვს მიხეილ სააკაშვილთან, რადგან ადგილობრივი მედია ჯერ კიდევ 2010 წელს წერდა, რომ გოგონა, სავარაუდოდ, სააკაშვილის დახმარებით, საქართველოს საგარეო საქმეთა სამინისტროში იყო დასაქმებული, მოგვიანებით კი კულტურის მინისტრის პოსტს დაჰპირდნენ. თუმცა, ჭორი არ გამართლდა.
მედიაში ასევე გავრცელდა ინფორმაცია, რომ პოლიტიკოსმა მომღერალს ბინა ნიუ იორკში 2 000 000 დოლარად უყიდა. სოფო ნიჟარაძემ 2020 წლის ივნისში შტატებში იმშობიარა და საქართველოში მიხეილ სააკაშვილის დაკავების შემდეგ დაბრუნდა.
რამდენიმე დღის წინ ლიზა იასკო სოციალურ ქსელში წერდა, რომ მისი საყვარელი ადამიანი საქართველოს ციხეში პუტინის ტყვეა. ის ძალიან განიცდიდა მიხეილ სააკაშვილის ჯანმრთელობის მდგომარეობას.
"უკვე ექვსი თვეა საშინელ სიზმარში ვცხოვრობ და ბოლო 2 კვირაა აღარც ვიძინებ და ვერც ვჭამ! იმიტომ, რომ პუტინს ჩემი ქვეყნის წართმევა სურს; მაგრამ საყვარელი ადამიანი ტყვედ წაიყვანა...
ახლა კი არა მხოლოდ მთელი ქვეყნის განადგურება უნდათ. არამედ საყვარელი ადამიანის ჯანმრთელობის განადგურება, ჩემი მშობლიური ქვეყნის ქალაქების, ქუჩების განადგურება" - წერდა ლიზა.